Isayā 4 - TÖHET LĪPÖRE (Re-edited) Bible (BSI)

Hachohlöngö Min Yeruselem

¹ Ngaich sat tak min yip kikānö ip sakāmö angū-ö nö kēḵ tö tī re ip tö hĕng tak tarik, nö ngö ṙô, Höng nyā-aṅkūöre in min, kafānöre inrē tö hilā re: höng hökngen ih pöri minë-eny tö minë-eny meh; kēngö ngam sinrōngkūö ih me-eṅ.

² Ip sakāmö angū-ö ngam pak aṅ im Mā Tēv nö vai löök takô inrē, nup ṙòng ngam tumlat inrē min nö kiröngö lanöökö vai inrē nö in cha yip töt kô-òngvah in Israĕl.

³ Ngaich ngö inlahen angū-ö min, tö ò öp töṙā-ayö nö i Siyôn, anga-aṅ inrē öp tö-ōtre nö in Yērusalem, havëka min nö töhet, ṙòkhöre inrē yip tökūichi i yip tö-aṅ i Yērusalem:

⁴ Hē ngam Mā Tēv min nö söichngö mum yip kikānö kūön Siyôn, ahetlö mahām Yērusalem min nö ṙā-ang ellōn e, aṅtī töp tö kalēḵ kuföt inkaha fālen, aṅtī tö öp tökalēḵ töhūkūö inrē.

⁵ Ngaich ngam Mā Tēv min nö hēk nö keuheūtlöre tī nö vīlö elyöngö aṅ kui rung Siyôn, i kui nup manūlö ò inrē, öp taṙul lul inrē tö sakāmö, öp pinchālö hanūkūö tameūyö inrē tö hatööm: pòn ṙòkhöre min nö i kui ngam kanôlò öp inrūkui nö hanyāṅknyuvö.

⁶ Hĕng min öp inrūkui umuh innyat kui hē el öp tö ṙāich sakāmö, innyatlö ane inrē rananglö hē el chanôchö kumṙah inrē.