Isayā 3 - TÖHET LĪPÖRE (Re-edited) Bible (BSI)

Öt Lanënö Nö I Yeruselem

¹ Yĕh meuk, pò ngam Mā, ngam Mā Tēv yip tömaṙôngö, nö kēngö ngam inköp nö ṙā-ang Yērusalem Yūtā inrē, keuheūtngöre ngam inköp nyā-aṅkūö, keuheūtngöre inrē ngam inköp mak;

² Öp tökalēḵ tarik, öp tarik kumyung inrē; öp ma-akah fālen pròfĕt inrē, chamòng alaha, mā misī inrē;

³ Öp yöngkūö tö taneui anāi, tö-akaha tarik, mahalēn inrē, öp tömilichngen inrē tömilūönö, öp töhuveū-en inrē mahachū.

⁴ Ngaich chū-ö min kētö nyīö nö mākūö cha, tënö nyīö inrē nö mahayöngö cha.

⁵ Ngaich hakihtuṙen min yip tarik, kö hakihtuṙen inrē tö holre: ngaich min ngam tököiny, ngam yāich inrē nö im tökôlò.

⁶ Yē öp tarik min nö kētö tīre nö ip mëm re kikōnyö nö el patī öp yöng re kikōnyö, nö ngö ṙô, Inyūtu man me-eṅ; hayöngö hī man yĕh, hökngen ngih töpayāyi nö eltī meh:

⁷ Ip sakāmö angū-ö anga-aṅ min nö pōitô, nö ngö ṙô, Hö-ö chin chū-ö hòṅ mahalinken tövahavö; pò chu öt aṅhaṅv patī rēhĕn tö nyā-aṅkūö öt rēhĕn inyut: uh yin pöchö vīlen chu mahayöng vē tarik.

⁸ Pò Yērusalem nö payāyi, fukngö inrē Yūtā: kūö ngam litāk cha ngam vahīṙen cha inrē nö lā-al ngam Mā Tēv, nö harunnyö mat ngam kanôlò ò.

⁹ Hameuktö arëkūöre cha-a nö inmeuktö e nö lā-al cha; ve-eny tökööl re cha-a sā Sôtöm, hö-ö cha-a nö hayunngö e. Tökôklò an yēḵ ngam nômö cha? Pò cha nöng kahngenre nö reushöre tö öt lanöökö.

¹⁰ Ngö ṙô yin tö ngam tölöök, tö e min nö lööken nö in ò: pò cha min nö nyā ṙòng nup la-en re.

¹¹ Tötkôlò an yēḵ ngam tötlöök! ötlööken an min nö in ò: pò nup raneushö tī min nö kētu nö in ò.

¹² Vē tarik chu pöri, hakihtuṙen tö yip nyīö, ngaich kikānö min mahayöngö cha, Ō yī-ö tarik chu, lō-ongkūö tī yin tö meh më mahachōkūö meh, ngaich yin nö pasū-utī tö ngam töng kanröönö talöökö meh.

Akah Fālen Tarik Re Ngam Tēv

¹³ Söklöre an ngam Mā Tēv nö hòṅ hāngö ṙô, söklöre inrē nö akah fālen vē tarik.

¹⁴ Kuhēthötre an min ngam Mā Tēv nö im inkaha fālen nö holtö yip mā vē tarik ò, tö yip kūön rācha inrē umuh: yī-ö yin tökeūheūt nyāngö ap panô-òṅ vāin; el patī yīö nuk tökīlö tö yīö nö i yāich:

¹⁵ Asuh öng angū-ö kinrāchngö yik tarik chu, kinröichngö kūö yip yāich inrē? Ṙô ngam Mā ngam Mā Tēv yip tömaṙôngö.

¹⁶ Hēkngö ṙô inrē ngam Mā Tēv, Kūö yip kikānö kūön Sīyôn nö ngë-eṅkūö, kiröönngöre cha-a nö hakeh likeun re chilī matre inrē, kiröönngöre uṙākūöre inrē, nö kiröönngöre, ngaich piring kalröön re.

Mikahlöng Lōn Yip Kikānö I Yeruselem

¹⁷ Lökten an min ngam Mā nö hachök aṅtī tap vah tömôlnyi nö el chalòng kui yip kikānö aṅ Sīyôn, ngaich min ngam Mā Tēv nö lingānyö nup töhayūni alaha cha.

¹⁸ Ip sakāmö angū-ö ngam Mā min nö kēngö nup tövai mörkul cha, tö nup tösā mat inhāṅl, nup tösā vanônö chingëṅt inrē;

¹⁹ Tö nup kinlöl kūö aneūmö, sayōk inrē, tö inyul kuntī inrē:

²⁰ Tö yanöṅtö keūyö, sayōk kël inrē, tövöntu hilā, kasòng chūök tötahūsa inrē, kane-engkūö tötlöök inrē:

²¹ Kinlong, inlök elmeh inrē;

²² Inyut el tökiröng sakāmö, kinṙum, vanön likeun inyul inrē;

²³ Tinmël kūö tökiṙapka, tövai linen hilā, vanön kui, kinṙulkui inrē.

²⁴ Ngaich ngö inlahen angū-ö min, nö ṙënngen nup tötahūsa min öp chinhūngö; ṙënngen öp nyanëkṙat min öp pisik tölöinyö; ṙënngen öp tövai keūyö min öp nganānyö kui; ṙënngen öp nyanëk aich öp sāk min nö vöntu; ṙënngen öp vanāyö tarik öp töfönghötvö minkahngö alaha.

²⁵ Fukngö yip min tarik meh tökūö sanët, yip tökalēḵ kūö meh inrē nö fukngö nö i kinyūngö.

²⁶ Ngaich nup inkūp ò min nö haṙivlōn nö harāmöre; öt aṅhaṅvkūö min ngaich anga-aṅ höng ūichhakṙen nö el tumlat.