INRĀMÖRE 3 - TÖHET LĪPÖRE (Re-edited) Bible (BSI)

Chinökṙen, Ṙinātö Ellōn, Tö Ngam Mineūka

¹ Chū-ö chin tarik mameuk kanihngen el katòh ngam tinkung lanīnö ò;

² ngaich an nö ahōngen chu kēten chu inrē el sinngūlö öich öt ëāṅvu;

³ kô-en an nö havöötökūö këlre nö lā-al chu nö hēk nöng hēk irô-òtö sakāmö.

⁴ Vītöng alaha chu an uk alaha chu inrē nö lëvngö, likölngö tangëḵ chu inrē;

⁵ Kayīngö chu an ngaich lömngen chu nö aṅtī tö tö-angū-öṅvö kinihngen inrē;

⁶ Vīten chu un iyöng el sinngūlö sā kupah töha-ehangen.

⁷ Havötö chu an kiröönö chu lökten chin öthō ötkô-òngvah; halökö chu an tö tölangan sayōk;

⁸ Pòrô chū-ö havë-a hūkö holṙen inrē löpngökūö ngam vinë-eṅkūöre anga-aṅ tö chu;

⁹ Harahkūö talöökö chu an tö töfāsö ihong, vīten kanröönö chu an nö kuròk.

¹⁰ Sā për an nö in chu hulalhaka nö höng, sā lāyön nö hayunngöre;

¹¹ Hökngen chu an kānngöre ngaich teūchö chū-ö öich panyëny; vīten chu an ötkôlò;

¹² Sōntö linreny re an asöklen chu inrē öich kinlahalkūö chòk ò.

¹³ Ellōn chu tī an nö lirenyhöt nup chòk aṅ ël chūök chòk ò;

¹⁴ Vītöre chin ngaich hayīölngö taṙòkhöre tarik, kaha tinkökö cha inrē irô-òtö sakāmö.

¹⁵ Hatööḵngen chu an tö tö-angū-öṅvö, hakô-òngkūö chu an tö tö-aṅgū-öṅvö chōn

¹⁶ Vīten në kanap chu an nö kuṙup kiṙuöh, vīten chu inrē rööichhaka öich tisūmu alaha;

¹⁷ Haṙöömiṙen ngih nômö chu tö lanāmö, vaichngö chin ngaich tö kumchiklōn;

¹⁸ lökten chu ngö ṙô, Ngāichen ök kanôlò chu, ök maheūṅkkö chu inrē aṅ im Mā Tēv.

¹⁹ Köpölōn tö kanihngen chu inngū-öṅkūö chu inrē, ngam tö-angū-öṅvö chōn tö-angū-öṅvö inrē!

²⁰ Iṙūöhen an ngam nômö chu nö fēken e ngaich angū-ö nö salūti nö ellōn chu.

²¹ Fēken ngih pöri chū-ö lökten chu maheūṅkkuvö:

²² Ngam tököp hanāngenlōn ngam Mā Tēv öthētu nö ṙāngenre, nup neūkölōn ò öthētu nö keuheūt;

²³ Kaheuk peuheū nup tufömngöre; kiröng an ngam kanô-en meh.

²⁴ Minchööḵö chu an ngam Mā Tēv, ṙô ngih nômö chu, lökten chin in ò meūka.

²⁵ Tölöök an ngam Mā Tēv nö in cha yip hamökken ò, ip nômö chamöhan.

²⁶ Tölöök an yĕn hĕng tak öp mahaṙēmngenre nö hökkö öp inyööken aṅ im Mā Tēv.

²⁷ Tölöök an nö im tarik yĕn keun ngam kaneun hē ò nö ayal.

²⁸ Hökngen ò yēḵ nö hĕngtöṙah nö ūichhak el chanëvö yĕn hakeunlen ò anga-aṅ tö e;

²⁹ Hökngen ò yēḵ nö kētö elvāng re nö el tumlat-sön ap umuh mineūka;

³⁰ Hökngen ò nö kētö arëkūöre nö im famtākkūö, hatööḵngenre inrē tö inyëḵngen.

³¹ Pò ngam Mā min nö öt urā-angtī nö kavalhanga,

³² Pòrô anga-aṅ nö miṙivngölōn, örheūheu pöri min anga-aṅ nö aṙē-ĕlōn sā ṙôken öp tököp hanāngenlōn ò,

³³ Pò ò nö örhöng hō nö hakihten hēk miṙivngölōn vē kūön tarik.

³⁴ Nö kirāichhang nö elröön tö yip töhakövö tarik ing tumlat,

³⁵ Nö havēngökūö ngam töchip nö i tarik nö I kūö ngam Lamātulönghöre,

³⁶ Nö hachōichngen tarik im chööḵnyö ò, öthō-en e an ngam Mā.

³⁷ Achīö ap mahachöngten ngaich teungtökūö angū-ö, yē ngam Mā öre nö öt halēnlö e?

³⁸ Röh öng nö ṙamā-ang elvāng ngam Lamātulöng nö yih ngam tölöök tötlöök inrē?

³⁹ Kūöyòh ang ngòh tö-aṅ tarik, nö vë-eny miṙivlōn, ngòh tarik, tö ngam sācha ò kūö tökööl ò?

⁴⁰ Tā-a töi kalah kanô-en ngëichken në talöökö hī inrē, ngaich havantöre im Mā Tēv!

⁴¹ Tā-a töi hachohlö ellōn re këlre inrē imTĒv el halīöngö:

⁴² Tôichngen in ngaich ahôngen inrē, ngaich rö-ö me-eṅ aṙē-ĕl.

⁴³ Kahūmöre man ngaich tö tanānyöre ngaich lū-u ih, fëlhanga öt-aṙē-ĕlōn;

⁴⁴ Kahūmöre man tö taṙul lökten ök vine-eṅkūö meh nö öt lökhötvö.

⁴⁵ Vītuṙen in ngaich tö meh sin-òkkūö tösō-ovö inrē in vē tarik.

⁴⁶ Ṙòkhöre yip tökunyaha elmat tö hī nö ötlēḵkôre tö hī;

⁴⁷ Yih an nö I kui hī ngam pinhë-eṅkūö insuk inrē. Pinyāihanga tinṙōlhanga inrē;

⁴⁸ Hëmö mak mat chin tö tahël tökūö finëlngö ngam kikānö kūön yip tarik chu.

⁴⁹ Öt ṙāköre hanëmö makmat chin min, öt haneuhtu,

⁵⁰ Hanöng saha ngam Mā Tēv nö ṙā-ang el halīöngö nö ngëichkö lātaṙeū meuk inrē;

⁵¹ Haṙīvölōn tī nun në mat chu i chanuhngen yip taṙòkhöre rēlö aṅ ngam el ngam elpanam chu.

⁵² Chöhöh chin ngaich, sā chehechōn tö cha nöng öt löknyu chööḵnyi yip tökunyaha elmat tö chu:

⁵³ Sōḵtu chin höng aṅ tö cha el anūlö kulehtukui chin inrē tö ihong;

⁵⁴ Kahultökui chu ngam mak; ngö ṙô chū-ö ngaich, Ngāichen chin.

⁵⁵ Havëkö minë-eny meh chū-ö, Ō Mā Tēv, löknyö lātaṙeū el anūlö;

⁵⁶ hangṙô chu ngaich me-eṅ havë-a, Uh man löpngökūö elnang re i ṙô chu havëkö hinòlṙen!

⁵⁷ Ngaich me-eṅ haröhtöre öm yih hē chu havëken meh; ngaich ngö ṙô me-eṅ, Un pa-ekūö!

⁵⁸ Kēḵ ngam fālen chu man ngaich; Ō Mā, ngaich man ṙānyö ngih nômö chu.

⁵⁹ Ngaich man meuk ngam tövaich inlinken chu, Ō Mā Tēv; Akah fālen chu man.

⁶⁰ Ngaich man meuk nup invāhal tī cha, nuk halēnlö cha tī cha nö in chu.

⁶¹ Ngaich man hang miyëḵṙô cha, Ō Mā Tēv, nuk töhalēnlöng tī cha nö in chu.

⁶² Nup minuh lōn cha inrē yip töchökhu tī tö chu irô-òtö sakāmö.

⁶³ Ngëichkö anūichö cha chanôhòl cha inrē; chū-ö chin kaha nup tinkökö cha.

⁶⁴ Havëkö u man in cha, Ō Mā Tēv, sā nup la-en kuntī cha.

⁶⁵ Kētö ṙanāhata ellōn cha man min: i kui cha yēḵ ap rinūtngövah aṅ in cha.

⁶⁶ I tanānyöre man min lū-u cha fëlngen cha inrē ṙā-ang el katòh ngam halīöngö meh, Ō Mā Tēv.