HEPRĀI 9 - TÖHET LĪPÖRE (Re-edited) Bible (BSI)

Vinë-ekūötēv El Tumlat El Halīöngö Inrē

¹ Ngam raneh chöngö inrē nö hachöngtuṙen inlahen nö im vine-eṅkūötēv, ngaich ap töhet ël e nö töhet ngih panam.

² Pò ök umuh hĕng töhalēnö inrūkui, ök raneh, tö aṅhaṅv tö ök chūök rööntö manyaṅk, ök mīs inrē tö nuk töhet ròtī inrē ök tö kaheūkö nö Töhetchūök.

³ Ngaich lā-uk ök innët ranang, ök inrūkui tökaheūkö nö Töhet kūö nup töhet;

⁴ Aṅhaṅv ël tök humlum chūök tötahūsa töföngö, ök kansòng ngam chöngö inrē tövinngö aṅ alaha tö humlum, ël e ök humlum tanīöyö tö aṅtö manna, ök tösīöp inrē tinkung Āròn, nuk tömitāk chūök kinūichö ngam chöngö inrē;

⁵ I kui e nak kërupim nö yanöṅtö, hanyattö kui ök anūichö neūkölōn; ötkô in töngamuh milētṙô eūken u.

⁶ Ngaich nun yih anū-ö nö halēnö nö ngatī, öt heumkenre yip kūönṙô nö kuhēthötre nö ël ök raneh inkūkui, hateungngö nuk la-en;

⁷ El ngam innëtö pöri höng hĕng tak ngam mākūö kūön ṙô, hĕng heuh i töhĕng samyeūheu, rö-ö nö öt holtö mahām, öp kahëtö ò tö pòkūöre, kūö fālen yip tarik ò inrē:

⁸ Hameuktö ngih ngam Töhet Fanöinylö, tö ngam talöökö el ngam töhet chūök nö öl nö hameuktu i saha ngam raneh inrūkui nö sökhaka;

⁹ Ngam töng inchōḵoṙô ngih ing töngamuh, sā nuk tökētu hĕnghöre inlōnti inrē nö öt kô, nö teungten tī tö el kuilōn ngam samlām,

¹⁰ Pòn höng (nya-aṅkūö, òk inrē, nup tö ṙōlkangen inrē sinöichö) töng me-el kahôiṙen nö inlaha, tö hachöngtuṙen hanöng saha ṙētak ngam inlööktit.

¹¹ Ngaich pöri Kristū nö yih, nö mākūö kūönṙô nup tölöök yamih, löktö el ngam tömötlö ṙôkö, taneungta inrē inrūkui, öt vahī kuntī, öt rēhĕn nö aṅ ngih tövīlöngö.

¹² Öt rēhĕn nö lökten i mahām pököre, kun nuā inrē; lökten i mahām Ò pöri, Ana-aṅ nö kuhēthötre, nöng hĕng van, el ngam töhet chūök, ngaich teūngen tö ngam tö örheūheu ṙinānyö.

¹³ Yē nup mahām pököre, nuā inrē, nup tisum kan nuā inrē, nö piṙōngö nö ikui cha, yip tökuvīö, nö ahetlö, i tölngö inlahen cha nö ahetlöre;

¹⁴ Iṙôkhöl öre ngam mahām Kristū, ngam lamökten im tö-örheūheu-aṅ Töhet Fanöinylö, nö kēḵngöre nö im Tēv, nö töt mirūnuvö, ahetlö elkui lōn yīö, i nup tökapah la-en, öi lök la-en ngam tö-aṅ Tēv.

¹⁵ Angū-ö an lökten Ò nö aṅ elṙat ngam tufömngöre kinlēḵngô, pòn hōtu ngam kinpaha nö ṙināngö nup tökööl me-elkatòh ngam raneh kinlēḵngô, hòṅ yip töhavëtu nö teūngen tö ngam kinlēḵngô ngam tö örheūheu amin.

¹⁶ I ngam inlēnngen inlahen, ngaich nö ötkô, nö öt kapah ngam mahalēnngen e.

¹⁷ Kanô-òṅvö ṙöng ngam inlēnngen yē ngam mahalēnngen nö ṙòngmö aṅ? Kô pöri ngam inlēnngen unôichrit kinpaha,

¹⁸ Lökten ngam mu-uĕh inlēnngen nö ötkô nö teungta, yĕn öt mahāmu.

¹⁹ Pòn i tumö nup chöngö, tö ahangnyu tö Môsös, nö i yip tarik, asā ngam chöngö, kēḵ mahām pököre inrē, holtö mak, töngāṅv sanôi pököre, chōn hissòp inrē; ngaich hĕnghöre kicheny kui ngam līpöre, tö yik tarik inrē;

²⁰ Nö ngö ṙô, Ngih ön mahām ngam inlēnngen, ngam hachöngten ngam Tēv, nö in yīö.

²¹ Ngatī inrē ngam inrūkui, ṙòkhöre nuk chehetī ël e, nö kichënyö tö mahām.

²² Ngaich sā ngam chöngö, öhten nö ṙòkhöre nö ahetlöngö tö mahām; yĕn öt kitaktu maham, ngaich öt inṙēlu tökööl,

Kēḵngö Nup Tökööl Ngam Kinëḵngöre Tö Kristū.

²³ Yĕn öt ṙanāngen nup inmeuktö aṅ el halīöngö nö ahetlöngö tö u: ngaich nup aṅ el halīöngö nö hòṅ kē-ĕvkūö tö tömööḵlö tö u.

²⁴ Pò Kristū nö öt kuhēthötre nö el vahī kuntī töhet chūök, insāken ngam tökô-en; el haliöngö takô pöri, hameuktöre nö i kūö ngam Tēv, tö pòkūö hī.

²⁵ Öt rēhĕn nö ṙōl heuh nö kētöre; nö sā ngam mākūö kūönṙô, nö öt hĕng hang samyeūheu, nö kuhēthötre nö kumtö mahām, öt mahām Ò pöri;

²⁶ Yĕn ngatī öre, ngaich tö ṙōl heuh kanihngen Kristū, hētentö ranehlö ngih panam. Ngaich pöri töngamuh nö kētuvö nöng hĕng heuh, i chanūhu ngam höteh, Anga-aṅ nö hameuktöre nö kēḵngö tökööl, i tī Ò nö kēḵngöre.

²⁷ Sā ngih nö ngaich nö hachöngtuṙen, tö tarik nöng hĕng heuh kinpaha; unôichrit e ngam kinṙôka.

²⁸ Ngatī Ang Kristū hĕng heuh nö kēḵngöre, nö keun kanöölö tömaṙôngö; ngaich meūkö min im innëtvan, tö cha yip hamöngkö kūö Ò, nö kumtö inyööken, nö köhngen töm tökööl.