HEPRĀI 6 - TÖHET LĪPÖRE (Re-edited) Bible (BSI)

¹ Lökten ta-a ṙāngô hī tö ranehlö Kristū, iṙūöhöröön im tölngö sanīöpö; un ṙātu chūök röönti nö ṙā-ang i tökapah la-en, ngam mikah inrē tö kū-ötö im Tēv,

² Inköptö vinôkö, ṙinātö eltī inrē, invanlö tökapah inrē, töt chanūhuvṙen kinṙôka inrē.

³ Angū-ö an la-en hī min, yĕn halöng ngam Tēv.

⁴ I inlahen cha yip tö ngaich nö hĕng heuh inhatlö elmat, tö ngaich nö kalahlöngkūö tö aṅ elhalīöngö inlōnti, vītu inrē nö hamòl ngam Töhet Fanöinylö,

⁵ Kalahlöngkūö nö ngaich tö ngam tölöök ṙô ngam ṙēti inrē yamih,

⁶ Ngaich pitūḵngöre, ötkô cha-a nö tumfömlöngö nö hēk nö im invöölö ellōn; pò cha nö harātö ngam Kūön ngam Tēv nö tumfömlö tīre nö in re, lingānyen Ò ngaich nö im sinrōngkūö.

⁷ Pò ngam tumlat nö teūngen tö inkôlò aṅ im Tēv, ngam amòk ngam kumṙah ngam tö ṙöpen nö yih nö in e, sīöplö aṅkūö tö nuk kun chōn kamheuṅk samyeūheu nö nyangngö röönti, tökôlòkūö tö cha yip tö chööḵnyu inrē tö e nö ūlö:

⁸ Yē e pöri nö sīöplö aṅ kūö tö vòk nūötö, tö lòkhukaha inrē, sōḵovö ngaich angū-ö ngaich öhten nö rūtiṙen, ngam töng manāngen tö inṙāpngö.

⁹ Kahōlö, ṙūölöng alaha pöri ihö, tö nup tölöök in yīö, ane inrē nup hamòl ngam inyööken, pòrô ihö ngatī ṙô:

¹⁰ Rö-ö an ngam Tēv nö tötlöök, nö tövaichngö tö la-en yīö ngam hanāngenlōn inrē, hameuktö yīö lā i mine-eny Ò, tī yīö meukṙen yip töhet, ṙòngmö meukṙen inrē.

¹¹ Hōten yīö in kö pētngen hameuktö töngatī, im kanô-en mineūka, söl ip manā-aṅ:

¹² Hòṅ yīö öt ṙahata, asīnken cha pöri yik tö amīnu tö minë kinlēḵngô, lökten i mikah, manöiyö inrē.

Tökò-en Kinlēḵngô Ngam Tēv

¹³ Hē ngam Tēv nö kinlēḵngôre nö in Aprahām, pòn öt tö kiröṅngu chūök ṙô Anga-aṅ, chūökṙô tore pöri Anga-aṅ,

¹⁴ Nö ngö ṙô, Kô-en chin min hakôlò meh tö inkôlò, ṙūölö ṙôngö meh chin min inrē i ṙinūölö.

¹⁵ Ngatī, pītnyöre nö i manöiyö, teūngen ngaich anga-aṅ tö ngam kinlēḵngô.

¹⁶ Pò ngòh tarik nö i tökiröng nö chūöku ṙô: ngaich i nup kinīlö ṙô, manā-aṅ ngam chūök ṙô Ò nö haköphanga.

¹⁷ In e ngam Tēv nö hòṅ pōyen tī nö hameukhöti nö i yip tö amīnu tö ngam töt hanṙīken inlēnö aṅ in Ò, lökten Anga-aṅ nö haköpngö nup kinlēḵngôre.

¹⁸ Hòn lökten minë tö nët töthanṙīken, in u ngam Tēv nö öthōḵ nö minyôinyaṅ, Īnu ayī-ö tö tökalēḵ inruhul alaha, öi ma-afalkö innyatlöre öi ṙaptö tīre im mineūka tö ṙātu nö i kūö hī,

¹⁹ Ngam in hī, nö sā sanumti ngam nômö mineūka, hĕnghöre tö kô-en, tököp inrē, mameuthöt inrē nö el ngam lātulēt ranangkūö;

²⁰ In e nö sā mu-urĕh Ang Yēsū nö kuhēthötre tö pòkūö hī, ngaich nö örheūheu nö mākūö kūönṙô sā ngam chöngö Melkisētĕk.