HEPRĀI 13 - TÖHET LĪPÖRE (Re-edited) Bible (BSI)

Töṙamölōn Tī Töm Tēv

¹ Hökngen ngam hanāngenlōn tö holre nö iṙuhen.

² Hameuktö hanāngen re i aṅ tahëng, un vaichngö; tön ngatī yik misī rēvre mahaṙūötken ma-ahānga nöng ötakahngenre.

³ Köpölōn tö yip töhakövö, sā tö halöki hol cha: cha-a yip tötlēkaṙen, sā mī-im alaha cha inrē tölōnre.

⁴ Hökngen ngam pinīhö, i taṙòkhöre, nö hanāngen, un hachōichi ngam chamam; pò vē chamô-òkānö, ma-asĕhha inrē min nö kahòkkaṙen töm Tēv.

⁵ Ui aṅhaṅv-in tö hanāngen tö rupīö, ngāichö ṙôngònglōn tö nup in yīö inlānen: pòn ngö ṙô Anga-aṅ, Öthōḵ Chin löhlö tö meh ötrēhĕn Chin min löktu ṙāngen meh.

⁶ Lökten hī holtö nyanatlö öi ngö ṙô, Ngam Mā Tēv an hamòlṙen chu; öt pa-ekūö chin min, töp tī öp tarik min tö chu.

⁷ Köpölōn tö cha yip mahayöngö yīö, yip tö ṙôtö ṙô ngam Tēv nö in yīö; ngëichngö ngam Tēv nö in yīö; ngëichngö ngam löklö nômö cha, asīnkö ngam ṙinātö ellōn cha.

⁸ Hĕngren An Yēsū Kristū tök vahë, tötaheui inrē, hôṅ, örheūheu inrē.

⁹ Uh yin hëmngö tökūö nup töṙōlkangen inköphöti: tön tölöök an yē ngam ellōn nö haköpi tö ngam inlōnti: röön lökten i nya-aṅkūö, ngam töt kanôluṙô tī tö cha yip lamök in e.

¹⁰ Hēngö aṅin in tö tahāklö, öp chūök cha nö öthuveū-en nö nyā, yip mameukṙen ngam inrūkui.

¹¹ Pò minë alaha minë töṙeūla, minë tö kēḵhötvö mahām nö el ngam töhet chūök töp mākūö kūönṙô nö tökētu kūö tökööl, nö föngö nö lā-uk ngam elyöngö.

¹² Lökten Yēsū inrē, pòn hòṅ ahetlö yip tarik Anga-aṅ nö lökten i mahāmre, kihngen nö lā-uk ök inkūp.

¹³ Ta-a lökten, töi chuh in Ò lā-uk ngam elyöngö, keun ngam sinrōngkūö Ò.

¹⁴ Tön rö-ö in ihih elpanāmu tö tököp, chöh öp el panam pöri ayī-ö öp yamih min.

¹⁵ Lökten in Ò in ta-a, kētö öp tökētu nöinyö im Tēv örheūheu, ngam ṙòng në minuh, në mahalööknyôre tö ngam mine-eny Ò.

¹⁶ La-evṙen pöri tö tölöök, meukṙen inrē, un vaichngö: pò në töngatī tökētu nö ṙanāmölōn ngam Tēv.

¹⁷ Hang chöngö yip mahayöngö yīö, hökngö lōn cha: tön aṅtö minë nômö yīö yip, nö sā yip mahameuktö kinṙötöre min; hòṅ cha nö la-evṙen nö holtö ṙanāmölōnre, tö holtö inlöinyöre: tön öt tö kanôluṙô an sin nö in yīö.

¹⁸ Ve-elkui ih: tön mikah tuṙen in töre öi lööken elkuilōn, öi hòṅ chiplö i taṙòkhöre.

¹⁹ Kalēḵĕṙô Chin hōten yīö ngatī, hòṅ chu ka-eūyen hö-ö havantu in yīö.

Manā-angrit Ṙô Vinë-ekūötēv

²⁰ Ngam Tēv lanāmö an töngamuh, ngam mahavanlö ngam yöng tökiröng Yōm pököre nö ṙā-ang i yip tökapah, nö holtö mahām ngam tö-örheūheu kinlēḵngô, ngam Mā hī Yēsū.

²¹ Vīten yīö teungten i tökeuheūttöre tölöök, öi la-evṙen tö lōn Ò, vahī-ivṙen nö in hī töp ṙanāmölōn nö i kūö Ò, lökten Yēsū Kristū: kanôlò Ò yēḵ örheūheu. Āmen.

Manā-aṅ Ṙô

²² Ve-ekūö yīö pöri chu-ö, kahōlö, kēḵ ngam ṙô inlēnö yin: tön ṙōl milôhò tī chin kūichtö ṙô in yīö.

²³ Akahalōn yin tö ngam hol hī Timòtī, nö ngaich nö ṙānyuvö; holten ò chin min chöhken yīö, yē ò nö ngaich nö yih.

²⁴ Salāmö cha nö ṙòkhöre yip yöngṙen yīö, ṙòkhöre inrē yip töhet, Salāmö yin tö cha vē aṅ Italī.

²⁵ Inlōnti yēḵ in yīö ṙòkhöre Āmen.