HEPRĀI 10 - TÖHET LĪPÖRE (Re-edited) Bible (BSI)

¹ Pò ngam chöngö nöng nyat nup tölöök yamih, öt nup tökô-en takô nö insā; ötkô anū-ö nö holtö nup tökētuvö töt hĕnghang samyeūheu, nup kahëtö cha nö örheūheu, nö teungtentī tö yip yamih.

² Yē e öre nö ngatī, röh yip öre nö rāngö tīre nö kētö u? Pò yip vamë-ekūötēv nö ngaich nö ahetlöngö, ngaich öt ōtre elkuilōn tö tökööl.

³ In u pöri nö fēkaṙen nup tökööl, öthĕnghang samyeūheu.

⁴ Pòn öt kanô-òṅvö nup mahām nuā, mahām pököre inrē, nö kēḵngö tökööl.

⁵ Lökten hē Ò nö yih nö ing panam, ngö ṙô Anga-aṅ, Ötlōnu Man tö tökētu: alaha pöri öp tö halēnö tö Meh nö pòkūö Chu.

⁶ Rö-ö Man töṙāmölōn i nup töföngö tökētu töpòkūö tökööl.

⁷ Ngaich ngö ṙô Chu-ö, Yĕh meuk; yih Chin ngaich, Öich la-evṙen tö lōn Meh, Ō Tēv, sā kinūichngö e nö in Chu, i mat ngam līpöre.

⁸ Ngam mu-urĕh ṙô tö ngö, Öt lōnu Man, ötrēhĕn ṙāmölōn, i nup tökētuvö, nup töföngö inrē tökētu, töpòkūö tökööl, nup insāken ngam chöngö, tökētu;

⁹ Ngaich ngö ṙô Anga-aṅ, Yĕh meuk; yih Chin ngaich, Öich la-evṙen tö lōn Meh. Kēngö ngam mu-urĕh Anga-aṅ; pòn vītö ngam innëtö

¹⁰ Lökten e, angū-ö lōn, ayī-ö ngaich ahetlöngö, i kinëtö ngam alaha Yēsū Kristū, nöng hĕng heuh öt hēk.

¹¹ Öthĕng hang sumkam vē kūönṙô nö sökhaka nö meukṙen, ṙōlheuh tī inrē nö kētö nup töng hĕngren tökētuvö, nup töt kanô-òṅvö nö kēḵngö tökööl,

¹² Anga-aṅ pöri tö kinheūṅtenre nö kētö ngam töng hĕng tökētu töpòkūö tökööl, ūichngöre ngaich örheūheu nö lahāmö ngam Tēv;

¹³ Töngamuhöten nö meūka, hanöng saha yip tökunyahaṅ elmat tö Ò, nö vītu nö ranöönö röön Ò.

¹⁴ Pòn lökten i ngam töhĕng tökētuvö, Anga-aṅ nö hateungten cha nö örheūheu yip tö-ahetlöngö.

¹⁵ Eū-a an inrē ngam Töhët Fanöinylö nö in hī, nö ngö ṙô,

¹⁶ Ngih ön inlēnngen inlēnö cha tö Chu, Unôichrit nup sakā- mö, ngö ṙô ngam Mā Tēv; Kēhöt nup chöngöre chin min ellōn cha: kūichngö u inrē nö ellōn cha;

¹⁷ Ngaich i nup tökööl cha, ötlnöökö cha inrē, öt köpölōn Chu-ö min hēk.

¹⁸ Yĕn inṙēlu tökööl, ngaich öt hēk nö tökētuvö töpòkūö tökööl,

Tā-a Töi Yihtöre Im Tēv

¹⁹ Lökten in ngaich kuhēthötre, höltö inyönglen, ël ngam töhet chūök, lökten i mahām Yēsū,

²⁰ Ngam talöökö ahetlö Ò töpòkūö hī, tufömngöre, talöökö ngam nômö inrē, lökhöt ngam tananglö, ngam alaha Ò.

²¹ Ngaich hĕng tak ngam el patī ngam Tēv, mākūö kūönṙô;

²² Ta-a, töi ṙūöhtöre, holtö tökô-en ellōn, i inkahngen töm mikah; kichënyö nup ellōn hī, inhôngö nup tötlöök kui lōn; söichö inrē në alaha hī tö töhet mak.

²³ Ta-a, töi haköpngöre im vinënyö ngam mineūka, öi öthanlöinyken; tön tökô-en An ngam kumlēḵngôre.

²⁴ Ta-a, töi kö haruhkö alaha höö im hanāngenlōn, tölöök la-en inrē.

²⁵ Ta-a, ui ṙāngenre hamūlöre, öi sā yip inrē; ṙuhöl alaha höö pöri, möthë i mat yīö meuk ranöhta ngam sakāmö.

²⁶ Pò hī yē hī tölngenre köölö fālen, unôichritre teūngen tö ngam inkaha aṅ im kanô-en, öt ōtre ngaich tökētu tö kūö tökööl,

²⁷ Höng öp pinhe-eṅkūö tömeūkka im kinṙôka, öp töhūkūö tameūyö inrē inṙāpngö yip tökunyahaṅ elmat tö ngam Tēv.

²⁸ Ngòh tarik ma-ahôngen chöngö Môsös, ngaich kumpaha nö öt inṙētu i ṙô tö nët tak hēk lūöi tak mameuk:

²⁹ Iṙôkhöl öt inkôlò min, tö lōn yīö, anga-aṅ, ngam ramööntö kui ngam Kūön ngam Tēv nö elröönre ngaich inrē nö kaheuktö ngam mahām ngam kinlēḵngô nö töthet, ngam löktö ò nö ahetlöngö, ngaich miyëḵṙen inrē tö ngam Töhet Fanöinylö inlōntö?

³⁰ Pò hī akahakūö tö ngam tö ngö ṙô, Aṅ in Chu an ngam invahalvah, havahal Chin min. Hēḵ inrē, Kahòkken yip tarikre An min ngam Mā.

³¹ Pinhe-eṅkūö an ngam fanuk eltī ngam tö-aṅ Tēv.

³² Fēkö nuk misī sakāmö, unôichrit yīö ngaich mikahtu elmat, ngam chūök yīö hökngenre tökiröngö kanihngen;

³³ Kūö yīö vītu nyam mat, hĕnghöre i minṙēngö, kanihngen inrē; kūö yīö inrē hamòl cha yip tö ngatī kinëka alaha.

³⁴ Sā yīö hĕnghöre aṙē-ĕlōn tö cha yip tö hakövö, ngaich ṙāmölōn öi kēḵ inyëḵngen nup amin yīö, kūö mikahlōnre töre öi amīnu töp tö hönlöre tö köp inrē.

³⁵ Uh yin lökten kavalngö ngam inyönglenre, ngam tö kumtö tö kiröng raneushö.

³⁶ Öp tö köp öp manöiyö töt ṙanāngen nö in yīö, hòṅ yīö teūngen tö ngam kinlēḵngô, yē yīö ngaich teūngen tö lōn ngam Tēv.

³⁷ Pòn rahëichtöreṙen, Anga-aṅ ngam yamih min, nö yih öt höka an min.

³⁸ Ngòh tölöök pöri min nö in chu nö aṅ lökten im ṙinātö ellōnre. Ngaich yĕn hōkhötre anga-aṅ ngaich öt kumchīkūlōn Chu-ö in ò.

³⁹ Rö-ö pöri ayī-ö aṅ in cha yip hamôkhötre nö im öt kanôlò; tön aṅ in in cha yip tö aṅhaṅv-in tö ṙinātö ellōn, im inyööken ngam nômö.