HAPAKŪK 3 - TÖHET LĪPÖRE (Re-edited) Bible (BSI)

Vë-ekūötēv Ang Hapakūk

¹ Vinë-eṅkūötēv ṙô ök pròfĕt Hapakūk, tösa ëlö Sikiōnòt.

² Ō Mā Tēv, hang ineūkö meh chin, ngaich pa-ekūö chū-ö: Ō Mā Tēv, ha-aṅkö ngam la-enre man ël në samyēuheu, el në samyeūheu mikahtöklōn tö e; fēkö miṙēlōn hē el lanīnö.

³ Ṙā-ang Tēman an ngam Tēv nö yih, ṙā-ang Rung Paran inrē ngam Töhet. Hanyatngö minë halīöngö ngam kanôlò ò, tööḵlö inrē ngam tumlat tö nöinyö ò.

⁴ Ngam in-yāṅngö ò inrē sā hanātö; rāyu mat an nö löknyö lā hāmö ò; umuh inrē öp innyatngö kumlēḵ ò.

⁵ Urēhĕkūö ò ngam invah tölëlngökūö nö kiröönngöre; löknyö i röön ò nup töhūkūö ta-ök tameūyö.

⁶ Sökhaka anga-aṅ ngaich kalah ṙôkö ngam tumlat; ngëicha anga-aṅ, ngaich ahōngö pumnāmö tarik nö parāti: parāti ngaich rôngö töha-ëhelen, sōnngöre nup kun rung tö ha-ëhelen. Sā tö misī nuk kinröönngö ò.

⁷ Kihten nup inrūkui Kūsan nö meūkö tö chu; kichëyöre nup ranangkūö panam aṅ Mītiā.

⁸ Kunyahalōn ang ngam Mā Tēv nö i nup tahël? I nup tahël ök tanānyö meh, hēk inrē ök lanīnö meh nö im mai, töp lökten meh i uk minë kōra re, el minë inröl meh inyööken?

⁹ Ngaich an ngam linreny meh nöng chanlööpṙen, tökô-en ngam ṙô in yik miyöngö tarik kinlēḵngô tö chūöku. Ngaich me-eṅ harēvngö ngam tumlat tö minë tahël.

¹⁰ Meūkö meh minë rôngö, ngaich pa-ekūö; lökngö muh nup chanôchö el mai: ṙô-òvö ngaich ngam tö-aṙū, hachônglö këlre inrē nö lātulöng.

¹¹ Tavūöi töm chingëṅt inrē öthalöinyköre nö sökhaka nö i chūökre; i pinchālö röön nup chòk meh tö chanuhu u, i pinchālö kūö ngam vöi meh inrē.

¹² I tanānyöre me-eṅ kiröön lök el ngam panam, i lanīnöre me-eṅ sōng pumnāmö tarik.

¹³ Kiröönngöre me-eṅ ngaich i inyööken yip tarik meh, i inyööken ök töhachāmö kui tö meh; nyahavö tī me-eṅ i kui öp aṅ patī tötlöök, hameuklö rööntö machööḵlö nö söllö nö i likeun.

¹⁴ Tafūni tī me-eṅ tö kui yip kumyung in ò öm aṅtī tö nuk tinkung ò; yih cha-a sā tī lamfeui kuföt nö pirātngen chu: unlāikenre ngineūṅktö yāich ṙanāmölōn cha.

¹⁵ Röön ël ngam mai me-eṅ öm holtö nup kōra e, ngam tökālēḵ tö-ëlu mai.

¹⁶ Hang chū-ö, kichīchöre ngaich ngih ellōn chu, kichëyöre minuh chū-ö i ngam ṙô; meuthöt chinhūngö nö el tangëḵ chu, kichëyöre chū-ö inrē i chūök re: lökten chu hòṅ heūheure ip sakāmö kanihngen, chalô angū-ö nö in yip tarik yip mahavīhölö nö kayīngan kumyung.

¹⁷ Pòn pòrô ngam anychīr chōn nö öt larukköṅny kūö ṙòng, öt rēhĕn min vāi nö ṙônguvö; öt la-evṙen min tö la-envö nö i ngam ôliv, ngaich nup elkahôyö min nö öt asīöplö tökā-a alaha; rökiṙen min pököre nö ṙā-ang im manūlöre, öt aṅhavö min inrē nup chūök tö pököre:

¹⁸ Sön chū-ö min ṙāmölōn im Mā Tēv, ṙāmölōn chin min im Tēv inyööken cha.

¹⁹ Yāvē an ngam Mā, kumlēḵ chu, vīten në röön chu an nö sā röön hain, vīten chu kui tömarô-òl chūök re.