FILIPĪ 4 - TÖHET LĪPÖRE (Re-edited) Bible (BSI)

Inchōḵten

¹ Lökten, kahōlö, hanāngen chu, töpīṙūtka, ṙanāmölōn chu, sapīöv chu inrē, ngatī yin köp sökhaka im Mā, yī-ö hanāngen chu.

² Halēnö Yū-ötiā chin, halēnö Sintĕki chin inrē nö hĕngrelōn nö im Mā.

³ Hòṅ, vë-ekūö meh chin inrē, tökô-en hamòl elranôṙö, meuklen yip kikānö, tön holṙen chu yip nö la-evṙen im tölöök inhānga; holṙen Klemen inrē, yip tahëng inrē hamòl alaha chu, yip tö minënyu nö i mat ngam līpöre nômö.

⁴ Ṙāmölōn örheūheu im Mā Tēv hēk chin ngö ṙô, Ṙāmölōn.

⁵ Hökngen ngam ṙināpö yīö nö akaha tö taṙòkhöre tarik. Röhta An ngam Mā.

⁶ Un piṙūtkuvö; i nup tökeuheūttöre pöri, höng i vinë-ekūötēv, vinë-elkui inrē, holtö nöinyö, öi mikahtölōn ngam Tēv tö nup havëkö yīö.

⁷ Ngaich ngam lanāmö ngam Tēv, ngam chamööḵngö taṙòkhöre mikah min, nö aṅtö nômö, lōn yīö inrē, in Kristū Yēsū.

⁸ Manā-aṅ, kahōlö, nup taṙòkhöre töng kô-en, nup taṙòkhöre töng tö ineū-euṅv, nup taṙòkhöre töng löök, nup taṙòkhöre töng het, nup taṙòkhöre töng hanāngen, nup taṙòkhöre töng löökö ineūkö; yĕn tölöökuvö in e, yĕn ineū-euṅvö inrē in e, fēkö u anū-ö.

⁹ Nup haköp yīö, kahëḵ yīö, hĕng höre ahang yīö, maheuṅk yīö inrē in chu, anū-ö kahëken yīö: ngaich ngam Tēv lanāmö nö holtöṙah yīö.

Ha-öiny Nup Inlōnti

¹⁰ Kiröng pöri ap ṙanāmölōn chu im Mā, pò yīö möl havanlö lōnre tö chu; kô-en yin afēḵa, rö-ö pöri löktuṙen.

¹¹ Rö-ö chin ṙôtö hanāṅtenre: pò chu ngaich tö ulòhten, i nup töng sitih inlaha chu, höng ngāichö lōn chu-ö in u.

¹² Huveū-en chin hayāichngöre, huveū-en inrē kôlò: i tökeuheūttöre chin keuheūtvat mu-ulòhtenre, hĕnghöre tööḵngen kapahare inrē, hĕnghöre kôlò, hāṅten inrē.

¹³ Mihôiṅ chin keuheūttöre la-en in Ò ngam mahangëken chu.

¹⁴ Huveū-eu tī yinri yī-ö ngaich pò yīö ngaich innôltuvö im kanihngen chu.

¹⁵ Akahalōn yin yī-ö inrē aṅ Filipī tö e, hē ranehten ngam tölöök inhānga, hē chu ṙāngö Makētònī, öt mahanôltörevö nö in chu aṅ im Māṅ, i kinë-eṅti kinë-eṅ inrē, höng yī-ö yin;

¹⁶ Pò yīö uroh hĕngheuh söömhanga i Tösalònikē, ngaich hēk tö hanāten chu.

¹⁷ Ök kūö chu lukkö ngam inlōnti; lukkö nup ṙòng pöri chu-ö tö ṙūölöre tö pò tī yīö.

¹⁸ Keuheūttöre aṅ in chin, kôlò inrē: tööḵngen chin, pò chu teūngen in Epafròtitös tö nup sahöömtö yīö, tö tahūsa tinôngö, töhōḵovö tökētū, ṙanāmölōn nö im Tēv.

¹⁹ Ngaich ngam Tēv chu min nö hatööḵlö nup hanāṅten yīö sā nup kanôlò Ò, ineū-euṅ in Kristū Yēsū.

²⁰ Kanôlò ngam Tēv hī yēḵ, Yöng hī örheūheu. Āmen.

Sinlāmö

²¹ Salām yip töhet ṙòkhöre in Kristū Yēsū. Salāmö yin tö vē kisānö in chu.

²² Ṙòkhöre yin vē töhet nö salāmö yīö, möthë vē aṅ patī Kaisöör.

²³ Ngam inkôlò aṅ im Mā Yēsū Kristū holtöṙah ma-alaha yīö yēḵ.