FILIPĪ 3 - TÖHET LĪPÖRE (Re-edited) Bible (BSI)

Ngam Tökò-en Lanöökö

¹ Manā-aṅ kahōlö, ṙāmölōn im Mā, rö-ö chin chei höng hĕngretī kūichhöti in yīö, pòn lanak yīö angū-ö,

² Ṙēmem tö nup am, ṙēmen tö yip töla-evṙen tö tötlöök, ṙēmen tö yip tötunyīnyi,

³ Pò ih ihö tötunyīnyi, vamë-ekūötēv lökten im Töhet Fanöinylö ngam Tēv, kanôlò inrē in Kristū Yēsū, öt inyönglenvö im alaha:

⁴ Pòrô chu-ö lang inyönglenvö i alaha: yĕn tarīkuvö tahëng tö inyönlenvö tö lōnre nö i alaha, möthë chu-ö:

⁵ Tunyīnyi im hinëvhöre sumkam, löklö in Israĕl, lamā in Penyamin, Heprāi takô: i ngam chöngö, Feresī:

⁶ Sā ngam kumlēḵlōn, öthakôlò ngam Māṅ; sā ngam lanöökö ngam aṅ im chöngö; ötvinëkuvö.

⁷ Nuk taneūngen pöri nö in chu, ngaich kaheuktu tö chu nö yanëḵngen töpòkūö Kristū.

⁸ Hôṅ kô; kaheuktö u chin nö yanëḵngen, kūö ngam tölngö lanöökö mikah aṅ in Kristū Yēsū ngam Mā chu: ngam töpô-òvkūö tö chu yëḵngen tö taṙòkhöre, ngaich kaheuktö u ngö sôḵ nuā, hòṅ chu teūngen tö Kristū,

⁹ Ngaich kôti in Ò, öt īnu tö kanahngen lanöökö, tö aṅ im chöngö, ngam mikah pöri, tö lökten im mikah in Kristū, ngam lanöökö aṅ im Tēv lökten i mikah:

¹⁰ Hòṅ chu akahakūö tö Ò, ngam minhôiṅyö ngam invanlö Ò inrē, ngam innôlti inrē im kanihngen Ò, ngaich asātu im kinpaha Ò;

¹¹ Yē chu min löktu sölta im invanlö ṙā-ang i yip tökapah.

Fal kū-ö Tö Im Tölngö

¹² Öt kūö chu ngaich teūngen, hēk vītu ngaich teungten: iṙūöhen pöri chu-ö, yĕich hōtu ngatī kētötīre im lökten chu kiṙapka tö Kristū Yēsū.

¹³ Kahōlö, rö-ö chin kaheuktöre sin kiṙapka; hĕng pöri öp la-en chu, vaichngö nuk taṙòkhöre lā-unôich, ngaich silônyöre lā-urĕh i nup lākūö,

¹⁴ Iṙuhöröön kū-ö tö im tölngö, im raneushö,ngam invëkö aṅ tulöng im Tēv in Kristū Yēsū,

¹⁵ Lökten, ta-a töi ngatī lōn, i tumtaka töteungten; yē yīö harīkngöre lōn i nup tahëng, hameuktu min angū-ö tö ngam Tēv nö in yīö:

¹⁶ Höng lökten im taneūngen hī ngaich, ta-a töi lök in e angū-ö chöngö.

¹⁷ Kahōlö, ṙòkhöre yin yēḵ asīnken chu; mikahngen cha yip töngatī talöökö nö sā ih, nö inchōken yīö.

¹⁸ Tön maṙôngö yip lamök, yip ṙô chu ṙung ṙōlheuh ṙô tö yīö; öich paneunyngöre vë-enynang yīö töngamuh, tö cha nö tökunyahaṅ elmat tö ngam töhakālö Kristū.

¹⁹ Yip töng manāngen tö ötkanôlò; töng tēv tö aichre; töng kanôlò tö sumrōngkūöre; töng lōntö nup chehen aṅ ngih panam.

²⁰ Pò ngam halīöngö nö panam hī, ngam löktö ngam Mahayööken, ngam Mā Yēsū, ngam ahökkö hī;

²¹ Ngam mahaṙīngö në yāich alaha hī, nö im tökôlò alaha Ò: lökten im minhôiṅyö Ò, nö kēhöt taṙòkhöre chehen nö elkatòhre.