Biblia Todo Logo
Bib sou entènèt

- Piblisite -

FILIPĪ 2 - TÖHET LĪPÖRE (Re-edited) Bible (BSI)


Inyāichngö Tö Ngam Ṙôkö Kristū

1 Lökten yĕn ingëḵkuvö in Kristū, yĕn inṙāmulōn aṅ im hanāngenlōn, yĕn innôluvö aṅ im Töhet Fanöinylö, yĕn neūkölōnvö, miṙēlōn inrē,

2 Hateungngö ngam ṙanāmölōn chu, hòṅ yīö hĕng re ellōn, īnu töm angū-ö hanāngenlōn;

3 Un lökten inmūltö i tötlöök, hēk tötöl kanôlò, im inyāichngö ellōn pöri, kö taṙeūḵ tölōnre tö yip tahëng.

4 Un kö höngkö nup in re yī-ö, kö ngëichkö nup i yip holre pöri yī-ö inrē.

5 Aṅ ellōn tö ngih yin ngam mi-in Kristū Yēsū.

6 Ngam nehngenre nö öt sā ngam Tēv, öt kaheuktö e nö raneushö töt ṙanāngen, nö hĕngren töm Tēv;

7 Kēḵngöre pöri Anga-aṅ, ngaich kēḵ inlaha mahalanṙen, fötnyuvö nö sā tarik.

8 Ngaich hē Ò nö meūkö nö sā tarik, hayāichngöre ngaich, hökngenre nö im kinpaha, ngam kinpaha im töhakālö.

9 Lökten ngam Tēv nö hapōilen Ò, ngaich kētö Minë-eny Ò töp lamātulöng tö në minë-eny nö ṙòkhöre;

10 Hòn i Mine-eny Yēsū në kui kinmônö nö simngöre, nö ṙòkhöre, nup aṅ elhalīöngö, aṅ el tumlat, aṅ lātaṙeūḵ töng tumlat inrē:

11 Hòṅ në taṙòkhöre litāk nö vë-eny tö Yēsū Kristū nö Mā, i kanôlò ngam Tēv Yöng.


Yang Sāḵ Ëāṅvö Ngih Panam

12 Lökten, kahōlö, sā yīö ngaich öt ahôngen, öt höng yē chu in, tön möthë yē chu rö-ö, vīlö inyöökenre yin, holtö pinhe-eṅkūö, kinchëyöre inrē;

13 Tön ngam Tēv An töla-evṙen nö in yīö, hĕnghöre hōtö tö la-evṙen inrē, im tölöök lōn Ò.

14 La-evṙen tö taṙòkhöre un uyëkuvö, un kil ṙô,

15 Hòṅ yīö öt vinëkuvö, öt chökhu inrē, kūön ngam Tēv töt mirūnu, ellōn ngih tökuròk töminôṙô tūmö in cha yin meūkö sā ëāṅvö ngih panam,

16 Kiṙapkö ngam ṙô ngam nômö; hòṅ chu löknyuvö ineū-euṅ hē ngam sakāmö Kristū, öich öt töchök alaha röön fal, öt töchök alaha la-evṙen inrē.

17 Hôṅ, yē chu kētu im tökētu ane inrē mineukṙen ngam mikah yīö, ṙāmölōn chu-ö, ṙāmölōn hòṅ hol yīö ṙòkhöre:

18 Ngatī yī-ö inrē ṙāmölōn, hol chu inrē ṙāmölōn.


Timôtī Nā Epafrôtitös

19 Meūka pöri chu-ö im Mā Yēsū tö tinīntö Timòtī nö in yīö öt ṙòktörevö, hòṅ chu chu-ö inrē ṙāmölōn yē chu akahalōn tö inlahen yīö,

20 Pò chu öt īnu tö tarik tö sā ellōnre, öp tökô-en chumkūökṙen tö inlahen yīö.

21 Pò cha nö ṙòkhöre nö lukkenre, tö nup töt aṅ in Kristū.

22 Akahalōn pöri yī-ö tö ò, tö ò nö sā nyīö nö meukṙen yöngre, ngatī anga-aṅ nö hol chu nö meukṙen i ṙinūönyö ngam tölöök inhānga.

23 Lökten chin meūkkenre tīnten ò, ilööṙen, yē chu min ngaich meuk öp inlahenre:

24 Hayönglenre chinri im Mā tö chu min yih chu-ö inrē öt ṙòktörevö.

25 Öt ṙanāngen pöri tölōn chu ngam tinīntö Epafròtitös nö in yīö, ngam kisānö chu, hol chu tö la-evṙen, hol chu kumyung, ma-aṅhangken yīö inrē, mameukṙen chu inrē tö nup töhāṅten;

26 Pò ò nö paṙūtalōn tö yīö ṙòkhöre, haṙīvölōn takô, pò yīö hāngan nö vahavö:

27 Pòn kô anga-aṅ nö vahavö, öhta nö im kinpaha: aheūkölōn pöri ngam Tēv tö ò; öt höng in ò, tön in chu inrē, hòṅ chu öt haṙömö tö miṙivlōn,

28 Lökten chin mötlö ṙanāmölōn tīnten ò, hòṅ yīö ṙāmölōn yē yīö meukkūö ò hēk, hòṅ chu chu-ö inrē, höhlö tö miṙivlōn.

29 Lökten hōḵen ò im Mā holtö ṙanāmölōn, ṙapkö töngatī i milēḵṙen:

30 Pò ò nö öhta nö im kinpaha tökūö la-en Kristū, hakihten ngam nômöre nö meukṙen nup töhāṅten im mineukṙen chu tö yīö.

Car Nicobarese (Re-edited) Bible - TÖHET LĪPÖRE 

Copyright © 2010 by The Bible Society of India

Used by permission. All rights reserved worldwide.

Bible Society of India
Swiv nou:



Piblisite