AMŌS 2 - TÖHET LĪPÖRE (Re-edited) Bible (BSI)Môāp 1 Ngö ṙô an ngam Mā Tēv: Kūö tölūöi fālen Mô-āp, hôṅ, kūö töfën, hö-ö chin min havööngökūö ngam sācha e: pò ò nö föngngö nuk tangëḵ ök rācha aṅ Etöm nö lanit. 2 Söömtö tameūyö pöri chū-ö min i kui Mô-āp, ngaich angū-ö min nö haṙāpngö nup patī rācha i Kerīyòt; ngaich i tinṙōlen min Mô-āp nö kapah, höltö ṙënṙô holtö ṙô römpĕt inrē. 3 Ngaich chū-ö min rökngen ma-akah fālen löktökūö ellōn e, ngaich fëlngö yip kūön rācha min umuh nö anòngngen ò, ṙô ngam Mā Tēv. Yūtā 4 Ngö ṙô an ngam Mā Tēv: Kūö tölūöi fālen Yūtā, hôṅ töfën, hö-ö chin min havööngökūö ngam sācha e: pò cha nö sō-o ngam chöngö ngam Mā Tēv, öt haköp ngam inchöngten inrē aṅ in ò, ngaich nup minyôinyaṅ cha nö pô-òvkūö tö cha nö vaich, nöng sā talöökö yik muvöhngö cha: 5 Tintö tameūyö pöri min chū-ö i kui Yūta, ngaich angū-ö min nö haṙāpngö nup patī rācha i Yērusalem. Kinṙòkken Israel 6 Ngö ṙô an ngam Mā Tēv: Kūö tölūöi fālen Israel, hôṅ, kūö töfën, hö-ö chin min havööngö kūö ngam sācha e: pòcha nö inyihngö yip tölöök nö ṙāi rupīö, yip töhāṅten inrē nöng hĕng höt tahôl tö kunröpö: 7 Yip tö tarūka lōn tö nup pitung ngam tumlat i kui öp yāich, ngaich kānngöre tö ngam talöökö inyāichngö: hĕng tak öp tarik tö öp yöng ò kikōnyö inrē min nö chuh im töhĕng tak kikānö, nö hachōichngö ngam töhet minënyö chu: 8 Ṙōlngöre cha-a nö ranghö nup tahāklö nö el nup hilā tökē-ĕyö nö kinlēḵngô, el patī ngam Tēv cha inrē cha-a nö ka-eūt vāin nup töhaṙāyö inchūḵngen. 9 Urēhĕkūö cha pöri chū-ö min keuheūtngö vah yip aṅ Amôr, yik tösā rôlòng sītör, sā nganë-eṅ ōk inrē; löktö lā tulöng tī chū-ö min keuheūtngö vah nup ṙòng ò, ngaich löktö lā taṙeū tī inrē i nuk ṙĕh ò. 10 Kēnyen yīö chin inrē ṙā-ang ap panam Aikup, hachō-o yīö inrē el tönyalnyi fën anāi sumkam, öi kē ngam panam yip aṅ Amôr. 11 Hachohlö yip kūön yīö chin kikōnyö nö pròfĕt, yip ṙāl tarik yīö inrē nö aṅ Nasaret. Röh ṙöng öng nö ngatī, Ō yī-ö kūön Israel? Ṙô ngam Mā Tēv. 12 Ngaich pöri yī-ö kē-ĕkūö yip aṅ Nasaret nö òk vāin; ngaich ngö ṙô öi tölṙô yip pròfĕt, Uh yin ṙô-òv tö nup maheuṅk re. 13 Yĕh meuk, tīpten yīö chin min el chūök yīö sā ap inröl tötīpö aṅ tö nuk törōire ṙòng sāiny. 14 Ngaich yip töpāngö min nö lëlngö tö tī yip töveut, ngaich yip tökalēḵ min nö öt hangëkö yip kunyung in cha, öt rēhĕn öp tömihôiṅ min nö ṙānyö nômö re: 15 Öt rēhĕn anga-aṅ min nö sökhaka öp tö aṅhaṅv eltī tö linreny; anga-aṅ inrē öp töveūtö röön min öt ṙānyöre: öt rēhĕn anga-aṅ min öp mī-i uk kōra nö ṙāyö nômö re: 16 Anga-aṅ inrē öp töt pa-ekūö in yip tö mihôiṅ falngöre min nöng chumlal ip sakāmö angū-ö, ṙô ngam Mā Tēv. |
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
Bible Society of India