AMŌS 1 - TÖHET LĪPÖRE (Re-edited) Bible (BSI)

¹ Në ṙô Amôs, ök mī-in yik yōm pököre i Tēkoā, në maheuṅk ò lāinyngen Israel hē nuk sakāmö Usayā ök rācha aṅ Yūtā, hē nuk sakāmö Yēropoām inrē ök kikōnyö kūön Yô-as rācha aṅ Israel nët samyeūheu urĕh tö ök kumyeūnö.

² Ngö ṙô anga-aṅ, Pōitô an min ngam Mā Tēv nö löktö Sīyôn, kaknyö ṙô re an inrē nö löknyö Yērusalem; ngaich min nup kiyôp yip yōm pököre nö haṙīvölōn, ngesngö min inrē öp kui Kārmel.

Ṙô Tö Ötlanënö Ngam Tēv Nö In Yip Ranghö Israel. Sīrīa

³ Ngö ṙô an ngam Mā Tēv: Kūö tölūöi fālen Tamaskös, hôṅ, kūö töfën, hö-ö chin min havööngö kūö ngam sācha e; pò cha nö fōhoh Kilīöt nö aṅtī tö vët piṙōngnyö ṙòng sāiny

⁴ Söömtö tameūyö pöri chū-ö min I patī Hasa-ĕl, ngaich angū-ö min nö haṙāpngö nup patī rācha in Penhatat.

⁵ Likölngö ap kālkūö Tamaskös chin min ngaich rökngen yip aṅ e löktökūö öp Achāṙö Aven, anga-aṅ inrē öp ṙamapkö kinchīṙö rācha nö ṙēu-eung i patī Ēten: ngaich min inrē yip tarik aṅ Sīriā nö chuh el inkövö nö i Kīr, ṙô ngam Mā Tēv.

Filistīa

⁶ Ngö ṙô ngam Mā Tēv: Kūö tölūöi fālen Kasā, hôṅ, kūö töfën, hö-ö chin min havööngö kūö ngam sācha e: pò cha nö halaingö töhakövö nö keuheūtngöre tī tö yik tarik, nö kēten cha ö i Ētöm.

⁷ Söömtö tameūyö pöri chū-ö min I kui ap ihong kinlōngö Kasā, ngaich angū-ö min nö haṙāpngö nup patī rācha umuh.

⁸ Ngaich chū-ö min rökngen yip aṅ e löktökūö Astòt, anga-aṅ inrē öp ṙamapkö kinchīṙö rācha löktökūö Eskēlòn; hö-ö chin min havöökūö tī re lā-al Ēkròn, yip chööḵṙen inrē in yip aṅ Filistain min nö ötkôlò, ṙô ngam Mā Tēv.

Tūrös

⁹ Ngö ṙô An ngam Mā Tēv: Kūö tölūöi fālen Tūrös, hôṅ, kūö töfën hö-ö chin min havööngökūö ngam sācha e: pò cha nö keuheūtngöre tī tö yip tarik nö kēten cha nö i Ētöm, ngaich rö-ö nö köpölōn tö kinlēḵngô mak ahala re:

¹⁰ Söömtö tameūyö pöri chū-ö min i kui öp ihong kinlōngö Tūrös, ngaich angū-ö min nö haṙāpngö nup patī rācha umuh.

Ītöm

¹¹ Ngö ṙô An ngam Mā Tēv: Kūö tölūöi fālen Ētöm,hôṅ, kūö töfën, hö-ö chin min havööngökūö ngam sācha e: pò ò lūḵ ap hanöng kisānöre nö aṅ eltī tö fël, ngaich kavalngö miṙēlōn, ngaich ap tanānyö ò nö iṙūöhötī nö chiṙes, ngaich inrē anga-aṅ nö örheūheu nö haköp lanīnö re:

¹² Söömtö tameūyö pöri chū-ö min i kui Tēman, ngaich angū-ö min nö haṙāpngö nup patī racha i Pòsrā.

Amòn

¹³ Ngö ṙô An ngam Mā Tēv: Kūö tölūöi fālen yip kūön Amön, hôṅ, kūö töfën, hö-ö chin min havööngökūö ngam sācha e; pò cha nö fungngö aich kikānö puyōsö nö i Kīlīöt, pò cha ö hòṅ ṙūöyö kūöngö panam re:

¹⁴ Tōttökūö tameūyö pöri chū-ö min ip ihong kinlōngö Rapā, ngaich angū-ö min nö haṙāpngö nup patī rācha umuh nö sā ṙôktô hē el sakāmö kinyūngö, holtö chanôchö mai hē el sakāmö lamfeui kuföt:

¹⁵ Ngaich ap rācha cha min nö chuh el inkövö, anga-aṅ tö yip kūön rācha nö hol ò, ṙô ngam Mā Tēv.