2 SAMUĔL 9 - TÖHET LĪPÖRE (Re-edited) Bible (BSI)

Tāvit Tö Mefipōsět

¹ Ngaich ngö ṙô ang Tāvit, Tö ōtrevö hòng aṅ patī Sôl, hòṅ chu hameuktö miṙēlōnre in ò öich chöönyöten tö Yônātan?

² Ngaich hĕng tak ök umuh aṅ patī Sôl ök tarik alaha tö minënyu tö Sīpa, ngaich cha-a nö havëten ò nö in Tāvit; ngaich ngö ṙô ök rācha tö ò, Sīpā öm më-eṅ? Ngaich ngö ṙô anga-aṅ, Anga-aṅ an tarik meh.

³ Ngaich ngö ṙô ök rācha, Tö ōtrevö hòng aṅ patī Sôl, hòṅ chu hameuktö miṙēlōn ngam Tēv in ò? Ngaich ngö ṙô Sīpa tök rācha, Hĕng tit taka öp kikōnyö kūön Yônatan öp tökaròk.

⁴ Ngaich ngö ṙô ök rācha tö ò, Isuāpa? Ngaich ngö ṙô Sīpa tök rācha, Yĕh meuk, i patī Makīr ap ap kikōnyö kūön Amī-ĕl, i Lōtēpār.

⁵ Ngaich ök rācha Tāvit nö tīnngö kamë-erkūö ò nö ṙā-ang i patī Makīr ök kikōnyö kūön Amī-ĕl, ṙā-ang Lōtēpār.

⁶ Ngaich ök kikōnyö kūön Yônātan, ök kikōnyö kūön Sôl, ang Mefīpōset nö yihtöre nö in Tāvit, ngaich fātngökūöre nö afukngöre, ngaich salāman. Ngaich ngö ṙô Tāvit, Mefipōset. Yĕh meuk ngòh tarik re man ngö ṙô anga-aṅ nö sap ṙô ò!

⁷ Ngaich ngö ṙô Tāvit tö ò, Um pa-ekūö: tön hòṅ hameuktö miṙēlōnre chin in meh öich chööḵnyöten tök yöng meh kikōnyö ang Yônatan, ane inrē min keuheūttöre tī havan tö nup taṙeū Sôl ök yöng meh kikōnyö; öt latôkaṙen min më-eṅ nyā el mīs chu.

⁸ Ngö ṙô ngaich anga-aṅ nö salāman, Asuh ang ngòh tarik meh, töp lökten meh môktökui ò öich chū-ö töng sā am tökapah?

⁹ Havëtu ngaich Sīpā tök rācha, ök tarik Sôl ngaich ngö ṙô anga-aṅ tö ò, Ṙòkhöre nup inlānen Sôl ṙòkhöre inrē nup aṅ patī ò nö kētu tö chu nö i ngòh kikōnyö kūön ök yöngṙen meh.

¹⁰ Ul ngam tumlat pömchö öm kūönkūö ò, më-eṅ, tö yip kūön meh kikōnyö inrē tö yip tarik meh; kētö nup ṙòng pömchö min, i ngòh kikōnyö kūön ök yöngṙen meh hòṅ ò nö nyā-aṅvkūö: öt heūheu pöri min Mefīpōset ngam kikōnyö kūön ök yöngṙen meh nö nyā nö el mīs chu. Taneui sīön tak yik kikōnyö kūön Sīpā nët anāi inrē yik tarik ò.

¹¹ Ngaich ngö ṙô Sīpā tök rācha, Sā minë chöngö ngam mā ngam rācha nö tölṙô ngòh tarik re, ngatī inlahen min ngòh tarik meh. Ngö ṙô ök rācha, El mīs chu an min Mefīpōset nö nyā, sā töhĕng tak aṅ i yip kūön rācha kikōnyö.

¹² Hĕng taka ök töṙòngmö kūöṅnö kikōnyö kūön Mefīpōset, ök tö minënyu tö Maika. Ngaich ṙòkhöre yip mī-iyöng patī Sīpa nö tarik Mefīpōset.

¹³ Iyöng Yerusalem ngaich Mefīpōset: pòn öt latôkaṙen nö nyā nö el mīs ök rācha; āṅngöre lā-al nuk kalröön ò nö karòk.