2 SAMUĔL 8 - TÖHET LĪPÖRE (Re-edited) Bible (BSI)

Mihòiṅ Yik Kumyunglen Tāvit

¹ Ngaich unôichrit ngih, ang Tāvit nö kiyung yik Filistain, ngaich mihôiṅ tö cha: ngaich Tāvit inrē nö kē ök yöngkūö nuk elpanam nö ṙā-ang eltī yik Filistain.

² Kiyūngö Mô-āp inrē anga-aṅ, ngaich haṙākö cha nö töökhaka, tölṙô cha nö ṙōlngöre nö el tumlat; ngaich anga-aṅ nö nët mitöökö fahëlngö nö i tölūöi mitöökö, ngaich hĕng tit mitöökö töṙātu nö aṅ. Ngaich yik aṅ Mô-āp nö tarik Tāvit ngaich kētu raneushö.

³ Kiyūngö Hatātesör inrē Tāvit, ök kikōnyö kūön Rēhòp, rācha aṅ Sōpāh, ik saha ò nö kiröönngöre nö havan ök pūlngöre i kui ök tahël Yufratīs.

⁴ Ngaich ṙā-ang in ò ang Tāvit nö kē yik mī-i-uk kōra kumyung hĕng köṅny sātòng, nët anāi köṅny inrē yik kumröön kumyung: ngaich Tāvit nö kasôh ellōtö nuk mu-unôich kalröön nuk kōra tamūök inröl, ngaich ma-iṅlen u nö tamūök töhēngòng inröl.

⁵ Ngaich hē yik aṅ Sīria i Tamāskös nö yih nö holṙen Hatātesör ök rācha aṅ Sōpah, kiyung yik aṅ Siria ngaich Tāvit yik tönët anāi nët köṅny tarik.

⁶ Ṙātö kumyung ngaich Tāvit nö i Sīriā i Tamāskös: ngaich yik aṅ Siriā nö tarik Tāvit, ngaich kētö raneushö. Ik töng kū-ö ò nö kiröönngöre, kētö minhôiṅyö Tāvit ngam Mā Tēv.

⁷ Ngaich Tāvit nö kē nuk humlum lanaklö nö in yik tarik Hatātestör, ngaich kēten u nö i Yerūsalem.

⁸ Löktökūö Petah Perōtai inrē, nuk elpanam Hatātesör, ang Tāvit nö pōyen kahë tö mās.

⁹ Ngaich hē Toi ök rācha aṅ Hamat nö hāngö Tāvit nö keuheūtngöre vahtī tö yik kumyung aṅ in Hatātesör,

¹⁰ Tīnngen ök kikōnyö kūönre ngaich ang Toi, ang Yōrām, nö in Tāvit ök rācha, nö salāman, hakôlò ò inrē, pò ò nö kiyung nö lā-al Hatātesör ngaich mihôiṅ tö ò: pò Hatātesör nö kiyung sin nö lā-al Toi. Kumtö nup rupīö chūökṙen anga-aṅ nö in ò, humlum chūökṙen, mās inrē chūökṙen;

¹¹ Anū-ö në inrē tökētu tök rācha Tāvit nö im Mā Tēv, nö holtö nuk rupīö, humlum inrē tökētu tö ò aṅ i yik pumnāmö tarik tötkô tö tī ò;

¹² Aṅ Sīriā, aṅ Mô-āp, aṅ in yik kūön Ammön, aṅ in yik Filistain, aṅ i Amalek, aṅ i nuk pô aṅ in Hatātesör inrē, ök kikōnyö kūön Rēhòp rācha aṅ Sōpāh.

¹³ Kē minë-enyre ngaich ang Tāvit hē invantö ò nö ṙā-ang i kinyūngö yik aṅ Siriā el Achāṙö öp Sāl, hëvhör sīön köṅny yik tarik.

¹⁴ Ṙātö kumyung anga-aṅ ngaich nö i Itöm, keuheūtngöre chūök tī anga-aṅ nö ṙātö kumyung nö i Itöm, ṙòkhöre ngaich inrē yik aṅ Itöm nö tarik Tāvit. Kētö minhôiṅyö inrē ngam Mā Tēv nö in Tāvit ik töng kū-ö ò nö kiröönngöre.

¹⁵ Hayöng ngaich Tāvit nö i kui Israĕl nö ṙòkhöre; akah fālen inrē ngaich ang Tāvit ngaich chīpöti nö in yik tarik re.

¹⁶ Ngaich Yō-ap ök kikōnyö kūön Serūya nö i kui yik kumyung; Yēhosafet ök kikōnyö kūön Ahīlöt kamūich nuk töhaköpiyö:

¹⁷ Sēktòk inrē ök kikōnyö kūön Ahitöp Ahimelek inrē ök kikōnyö kūön Apiātör, nö kūönṙô cha-a; kamūich inrē ang Sērayā.

¹⁸ Pennayā inrē ök kikōnyö kūön Yēhoyāta i kui yik aṅ Yërit aṅ Pēlĕt inrē; ngaich yik kikōnyö kūön Tāvit nö kūönṙô.