2 SAMUĔL 6 - TÖHET LĪPÖRE (Re-edited) Bible (BSI)

Kumtuvö Ök Kasòng Chöngö Nö I Yëruselem

¹ Hēk ang Tāvit nö hamūl yik tökatöllöng tarik Israĕl nö ṙòkhöre, lūöi anāi köṅny.

² Choholre ngaich Tāvit, ngaich kiröönngöre nö hol yik tarik nö ṙòkhöre yik mī-in ò, nö ṙā-ang Pē-ālēyūta, nö kē-ĕre ök kasòng ngam Tēv nö ṙā-ang umuh, ök tökaheūkö minënyö, tö minënyö ngam Mā Tēv yip tömaṙôngö ngam amūchhaha nö ihôi kērupim.

³ Ṙālöngö ngaich ngam kasòng ngam Tēv nö el ök tufömngöre inröl, ngaich kēnyu angū-ö nö ṙā-ang el patī Apinātap ök mi-i kui rung: i kūö ök tufömngöre inröl nak kikōnyö kūön Apinātap, nā Usāh, nā Ahiō.

⁴ Kē-ĕny e achā-a ngaich nö ṙā-ang el patī Apinatap, ök mi-ikui rung, nö aṅtö ök kasòng ngam Tēv: urēhĕkūö ngam kasòng ang Ahīö nö kiröönngöre.

⁵ Ngaich Tāvit tö yik aṅ patī Israĕl nö ṙòkhöre nö nyamtô nö i kūö ngam Mā Tēv nö aṅtī tö nup töṙōlkangen fanöö ranöng inrē tö chōn fir, hol tö līör holtö hārp, holtö Salmai, holtö kòrnet holtö simpôl.

⁶ Ngaich hē cha nö sölta nö el ök chūök pinṙōngö ṙòng sāiny Nakōn, ngaich lūöl tö tīre Usāh nö ik kasòng ngam Tēv, ngaich ṙapkö e; pò nuk kōiny nuā nö kavē-ĕre.

⁷ Hūlökūö ngaich ngam lanīnö ngam Mā Tēv nö in Usāh; fëlan ngaich ngam Tēv tö kūö ngam vanāchö ò; kapah ngaich anga-aṅ nö umuh ik kasòng ngam Tēv.

⁸ Kunyahalōn ngaich Tēvit pò ngam Mā Tēv nö līn nö in Usāh: kaheuk ök chūökö ngaich anga-aṅ nö Pērĕsusāh söl ing töngamuh.

⁹ Pa-ekūö ngaich Tāvit tö ngam Mā Tēv ik sakāmö angū-ö; ngö ṙô ngaich anga-aṅ, Sitih yanīhih öngvö min ngam kasòng ngam Mā Tēv nö in chu?

¹⁰ Lökten Tāvit nö sōḵ nö kēngö ngam kasòng ngam Mā Tēv nö in ò nö ik elpanam Tāvit, höng kēngö e pöri Tāvit nö lā taseū el patī Opĕtētöm ök aṅ Kit.

¹¹ Lūöi chumngëṅtö ngam kasòng ngam Mā Tēv nöng ngöh nö el patī Opĕtētöm ök aṅ Kit: ngaich ngam Mā Tēv nö hakôlò Opĕtētöm tö nup patī ò nö ṙòkhöre.

¹² Ngaich vënyu angū-ö nö in Tāvit, nö ngö, Hakôlò patī Opĕtētöm an ngam Mā Tēv, ṙòkhöre inrē nup töng inlānen ò, kūö ngam kasòng ngam Mā Tēv. Kiröönngöre ngaich Tāvit nö kēhĕt ngam kasòng ngam Tēv nö hol tö ṙanāmölōnre nö ik elpanam Tāvit nö ṙā-ang patī Opĕtētöm.

¹³ Ngaich angū-ö nö ngö, hē cha nö keun ök kasòng ngam Mā Tēv nö ṙòngmö tafūöl vanāng, kētö kōiny nuā anga-aṅ ngaich tökētu hĕng nòng, hĕng nòng inrē tö-alahav kun nuā.

¹⁴ Kiṙīöm ngaich Tāvit nö ma-āinyre; kahumlöre inrē tök linen sörplis.

¹⁵ Ngatī ang Tāvit tö yik aṅ patī Israĕl inrē nö ṙòkhöre nö kēnyö ngam kasòng ngam Mā Tēv nö ayôṙa ṙô, hol ṙô tö römpet.

¹⁶ Ngaich angū-ö hē ngam kasòng ngam Mā Tēv nö yih nö ik elpanam Tāvit, löknyö kūö inkūp ngaich Maiköl ök kinānö kūön Sôl nö môknyökūöre, ngaich meuk ök rācha Tāvit nö tisôköre kiṙīöm inrē nö i kūö ngam Mā Tēv; ngaich höng ellōnre lōn anga-aṅ nö ahūöngen ò.

¹⁷ Kēhöt ngam kasòng ngam Mā Tēv cha-a ngaich, ṙātö e ngaich nö ik chūökre ellōn ök inrūkui vahītö Tāvit chūök e: kētö töföngö ngaich Tāvit tökētu nö i kūö ngam Mā Tēv tökētu lanāmö inrē.

¹⁸ Ngaich hē Tāvit nö keuheūten nö kētö töföngö tökētu ane inrē lanāmö tökētu, hakôlò yik tarik ngaich anga-aṅ nö i mine-eny ngam Mā Tēv yip tömaṙôngö.

¹⁹ Ngaich anga-aṅ nö kö michööḵ yik tarik nö ṙòkhöre in yik tömaṙôngö aṅ Israĕl, hĕnghöre kikōnyö kikānö inrē, hēngö tī anga-aṅ i töhĕng tak tö rôti, hĕng milôhò alaha, hĕng milôhò inrē kēk raisin. Kiröönngöre ngaich yik tarik nö ṙòkhöre nö kö chuh patīre.

²⁰ Havantöre ngaich Tāvit nö hakôlò yik aṅ patīre. Kunyī-inyre ngaich ök kikānö kūön Sôl ang Maiköl nö höngkūö Tāvit, ngaich ngö ṙô, Yöng vanāyö ngam rācha Israĕl töngamuh, ngam ṙamòngngö hilā re nö i kūö vē pīhö vē mahalanṙen ò nöng öt sirōngkūö nöng sā vē tökulō-ov nö chumlālö alaha?

²¹ Ngaich ngö ṙô Tāvit tö Maiköl, Ikūö ngam Mā Tēv an angū-ö, ngam kamtöllen chu lātulöng inrē tö yip aṅ patī ò nö ṙòkhöre, vīlen chu inrē rācha i kui vē tarik ngam Mā Tēv, i kui Israĕl: lökten chin nyamtô i kūö ngam Mā Tēv.

²² Höichngen höng yanô-òv chin min tö e angū-ö, ane inrē kulō-ov min öich i kūö re: i yip ṙô meh pöri taheui mahalanṙen kikānö, in cha chin min ineū-euvö.

²³ Ngaich Maiköl ök kikānö kūön Sôl nö öt kūönuvö söl kinpahare.