2 SAMUĔL 2 - TÖHET LĪPÖRE (Re-edited) Bible (BSI)

Vīlöngö Ang Tāvit Nö Rācha Yūtā

¹ Ngaich unôich tö ngih, ang Tāvit nö hatöntöre nö i ngam Mā Tēv, nö ngö ṙô, Chuh i nup el panam öich kòh i Yūtā? Ngaich ngö ṙô ngam Mā Tēv tö ò, Kô-òren kuṙòh. Ngö ṙô ngaich Tāvit, Chuh yih öich min? Ngö ṙô ngaich anga-aṅ, Chuh Hepròn.

² Lökten ang Tāvit nö chuh in e tö nak pīhö ò inrē, nā Ahīnôam aṅ Yesrīl, Apīkēl inrē ök pīhö Nēpòl ök Karmel.

³ Tö yik tarik ò inrē yik mī-in ò nö kumröön Tāvit ṙòkhöre yik tarik nö holtö pīhöre kūönre inrē: ngaich cha-a nö i yöng ël panam i Hepròn.

⁴ Yihtöre ngaich yik tarik aṅ Yūtā. Ngaich in e cha-a nö hachām el kui Tāvit nö rācha i kui aṅ Yūtā. Ngaich cha-a nö ve-eny nang Tāvit, nö ngö ṙô, Yip tarik yip aṅ Yapeskilīöt lamāpngen Sôl.

⁵ Ngaich Tāvit nö tīnngö vame-eny nang yik tarik aṅ Yapeskilīöt, nö ngö ṙô tö cha, Tökôlò yin yī-ö i ngam Mā Tēv pò yīö hameuktö ngih neūkölōnre ik mā yīö, in Sôl, ngaich lāpngen ò yī-ö inrē.

⁶ Hameuktö neūkölōnre An ngam Mā Tēv kanô-en inrē nö in yīö: ngatī chū-ö inrē havahlö e in yīö tö ngih neūkölōn, pò yīö ngaich ngatī la-en tö e.

⁷ Lökten yin yĕh ngaich hangëṅlö minë kël re, uh yī-ö inrē pa-ekūö: tön kapahare ök yöng yīö ang Sôl, ngaich inrē vē aṅ patī Yūtā nö hacham kui chu rācha i kui cha.

Vilöngö lspōsĕt Nö Rācha Israĕl

⁸ Ngaich ang Apnör öp kikōnyö kūön Nör, yöngkūö kumyung Sôl nö kē ök kikōnyökūön Sôl ang Ispōset, ngaich nö kēten ò nö i Mahanēm;

⁹ Ngaich anga-aṅ inrē nö vīlen ò nö rācha nö i kui Kilīöt, i kui Asör, i kui Yesrēl, i kui Ifrēm, i kui Penyamin, i kui Israel inrē nö ṙòkhöre.

¹⁰ Fën anāi samyeūheu ṙēti ang Ispōset ök kikōnyö kūön Sôl hē ò nö rultenre nö hayöng i kui Israĕl, ngaich nët samyeūheu anga-aṅ nö hayöng ngaich pöri yik aṅ pati Yūtā nö tömrit Tāvit.

¹¹ Sat samyeūheu tafūöl chumngëṅtö ang Tāvit nö rācha hē e nö i Hepròn i kui patī Yūtā.

Kiyūngö Höö Israĕl Tö Yūtā

¹² Ngaich ök kikōnyö kūön Nör ang Apnör, yik tarik Ispōset ök kikōnyö kūö Sôl, nö chuh Kīpiön nö ṙā-ang Mahanēm.

¹³ Kiröönngöre inrē Yô-ap ök kikōnyö kūön Seruyā tö yik tarik Tāvit, ngaich meuk kūö cha nö ip törūngö mak i Kipīön, ūichngöre cha-a ngaich, hĕng lā më töhĕng nö i kui ngam mak, im tahëng lā kui ngam mak yik tahëng.

¹⁴ Ngaich ngö ṙô ang Apnöt tö Yô-ap Töich vë-ekūö meh, hökngen më ṙāl tarik nö choholre nö nyamkö kūö hī ngaich ngö ṙô ang Yô-ap, Hökngen cha nö choholre.

¹⁵ Choholre cha-a ngaich ngaich havāngngöre nö kö lā-alre; nët sīön tak lā in Penyamin nö lamā in Ispōset ök kikōnyö kūön Sôl, nët sīön tak inrē yik tarik Tāvit,

¹⁶ Ngaich cha-a nö kö kē lā-al re nö i kui tī, saphötkūö fëlre inrē nö i kanëng ngam lā-alre; lökten cha nö ṙōngngö vah nö fukngö: lökten ök chūökö angū-ö nö kaheūkö nö Helkāthāsurim, ap mi-i Kipīön.

¹⁷ Kalēḵ ngaich ngam kinyūngö im sakāmö angū-ö: öktô ngaich Apnör, yik tarik Israĕl inrē, nö i kūö yik tarik Tāvit.

¹⁸ Umuh inrē yik tölūöi tarik kikōnyö kūön Serūyā, Yô-ap Apīssai, Asahĕl inrē: tö panyôta röön ök Asahĕl sā röön hanchōn re.

¹⁹ Lū-u Apnör ngaich ang Asahĕl; öt kāngköre anga-aṅ tö kinröönngöre nö lā hāmö öt rēhĕn nö lātavē im linū-u Apnör.

²⁰ Tēk ukre ngaich ang Apnör ngaich ngö ṙô, Asahĕl öm më-eṅ? Chū-ö chīni, ngö ṙô anga-aṅ nö sap ṙô ò.

²¹ Ngaich Apnör nö ngö ṙô tö ò, Kān hāmöre man hēk tavēre, kētö tī re ip töhĕng tak ṙāl tarik, öm kē öp lanaklö ò. Hö-ö pöri Asahĕl nö hòṅ kānköre nö im linū-u ò.

²² Ngö ṙô hēk ang Apnör tö Asahĕl, Kānngöre mana um lū-u chu: sitih ṙöng öich min tāmö meh öm tanti el tumlat? Ngaich sitih kanô-òṅ chū-ö min hatīön kö kūö Yô-ap ap mëm meh.

²³ Sōḵ pöri anga-aṅ nö kānngöre: lökten ang Apnör nö aṅtī tö rōi ök vöi re nö sapngö āich ò, ngaich ök vöi nö tafun köṅny kūö nö i uk ò; fukngö ngaich anga-aṅ nö umuh ngaich kapah nöng umuh: ngaich i tum tak cha yik tösölta nö ik chūök Asahĕl nö fukngö nö kapah sökngöre cha-a inrē.

²⁴ Iṙūöhöröön pöri Yô-ap, Apisai inrē nö lū-u Apnör: ngaich ngam tavūöi nö sipti hē cha nö sölta nö ik rung Ammah, öp lā kūöngö Kīah el talöökö öp el inchōn Kipīön.

²⁵ Hamūlöre ngaich yik kūön Penyamin nö unôichrit Apnör, hĕng kiteūm ngaich, söklöre ngaich nö i kui ök rung hĕng.

²⁶ Hūken Yô-ap ngaich ang Apnör nö ngö ṙô, Höng öt heuh kö kūöre ang min ngòh fël? Öt akahalōn ömeh tö e min nö yöng miṙīvlōn ip manāngen e? Iṙôktöre öng pökeh lang, urēhĕkūö meh tölṙô më tarik nö havantöre i linū-ū vē holre?

²⁷ Ngaich ngö ṙô Yô-ap, Sā ngam Tēv nö tö-aṅ, yē meh öre öt ṙô-òvö, ngaich yin öre vē tarik taheui tö peuheū nö kiröönngöre, nö öt lū vē holre.

²⁸ Föönyö kūö ök römpet ngaich ang Yô-ap, sökngöre ngaich yik tarik nö ṙòkhöre, öthēk nö lū yik Israĕl, öt rēhĕn nö kinyung nö hēk.

²⁹ Hĕng mitööm röön ngaich Apnör tö yik tarik ò nö lök Arapā; havāngngö el Yôtön cha-a inrē, ngaich lök i Pitròn yih ngaich nö i Mahanēm.

³⁰ Havantöre ngaich Yô-ap nö ṙeū-eung i linū-u Apnör: ngaich hē ò nö hamūl yik tarik, machūötör sīön hang tak hanātö kūö yik tarik Tāvit tö Asahĕl inrē,

³¹ Lūöyòng tafūöl anāi yik tarik tökapah töfëli aṅ Penyamin tö tī yik tarik Tāvit.

³² Ngaich cha-a nö kē ök alaha Asahĕl ngaich lāpngen ò nö i kui kupah ök yöng ò kikōnyö, ök mī-i Petlihem. Hĕng mitööm röön ngaich ang Yô-ap tö yik tarik ò inrē, malīlöng ngaich ngam sakāmö nö i kui cha nö i Hepròn.