2 SAMUĔL 1 - TÖHET LĪPÖRE (Re-edited) Bible (BSI)

Hanglöre Tāvit Tö Kinpāha Sôl

¹ Ngaich unôichrit kinpaha Sôl, hē Tāvit nö havan tö ṙineū-eung finëlö yik aṅ Amelek, nët sumkam ngaich Tāvit nö iyöng Siklek;

² Ngaich im linūöyö sakāmö, yĕh meuk, hĕng tak ök tarik yamih nö ṙā-ang elyöngö Sôl nöng chaṙësa inyut, aṅ el kui tö tumlat inrē, afukngöre ngaich nö salāman.

³ Ngö ṙô ngaich Tāvit tö ò, Ṙamā-ang yih ömeh? Ngö ṙô ngaich anga-aṅ tö ò, Ṙā-ang elyöngö Israĕl chin öich töt kô-òngvah.

⁴ Ngö ṙô ngaich Tāvit tö ò, Sitih öku inlahen? Vë-ekūö meh chin, vë-eny nang chu. Ngaich sap ṙô anga-aṅ, Falngöre yip tarik tö ök kinyūngö, maṙôngö inrē yik tarik töfukngö nö kapah; kapah ök Sôl tök kikōnyö kūön ò inrē Yônatan.

⁵ Ngö ṙô ngaich Tāvit tök ṙāl tarik ök vamë-eny nang ò, Sitih mikahlōn ömeh tö Sôl nö kapah tö Yônatan inrē ök kūön ò kikōnyö nö kapah?

⁶ Ngaich ök vamë-eny nang ò ṙāl tarik nö ngö ṙô, Kūöre chin möinytitṙen i kui öp rôngö Kilpuā, ngaich yĕh meuk, harôntöhëchṙen ang Sôl nö i kūö ök vöire; ngaich yĕh meuk nuk inröl tö yik tarik i uk kōra inrē nö röhlö nö unôichrit ò.

⁷ Ngaich hē ò nö tēk uk re, meūkö chu ngaich anga-aṅ ngaich havëten chu. Ngaich sap ṙô ò chū-ö, öich ngö ṙô, Ihih chīni.

⁸ Ngö ṙô, ngaich anga-aṅ tö chu, Achīö meh? Ngö ṙô chū-ö ngaich sap ṙô ò, Aṅ Amelek chin.

⁹ Ngö ṙô ngaich anga-aṅ tö chu, Vë-ekūö meh chin, söklöre man ranghen chu, fëlngen chu, tön ngaich chin chavīlöng el kui; pò ngih nômö chu nö ṙòngmö ōtre nö in chu.

¹⁰ Lökten chu ngaich söklöre in ò, ngaich fëlngen ò, pò chu akahalōn takô tö ò nö öthō nö aṅ unôichrit fanukngö ò: kē ngam sapīöv ò chū-ö ngaich ngam mī-i kui ò, tö minë mörkul inrē, minë mi-i kël ò, ngaich kēten u chū-ö ihih im mā chu.

¹¹ Ngaich Tāvit nö kētö tī re nö i inyut ò, tikachngö u ngaich: ngatī tī inrē anga-aṅ tö nuk mi-in ò nö ṙòkhöre:

¹² Sanòk cha-a ngaich, ngaich harāmöre, söl harap inrē nö ahik tökūö Sôl, kūö ök kūön ò inrē kikōnyö Yônatan, kūö yik tarik ngam Mā Tēv, yik aṅ patī Israĕl inrē; pò cha nö fukngö tökūö fël.

¹³ Ngö ṙô ngaich Tāvit tök ṙāl tarik ök vamë-eny nang ò, Ṙamā-ang yih ömeh? Sap ṙô ngaich anga-aṅ, Kūön aṅ tahëng chin, aṅ Amelek.

¹⁴ Ngö ṙô ngaich Tāvit tö ò, Sitih ömeh öt pa-ekūö öm hateutnyö kël re fëlngö ngam töhachāmö kui tö ngam Mā Tēv?

¹⁵ Hĕng tak havëti ngaich Tāvit tö ṙāl tarik, ngaich ngö ṙô, Haröhtöre in ò afuktöre in ò. Kapah ngaich anga-aṅ tö tī ò nö fëlan.

¹⁶ Ngö ṙô ngaich Tāvit tö ò, El kui meh ap yēḵ mahām meh; pò ngam elvāng meh nö ngö ṙô nö lā-al meh, Fëlngö ök töhachāmö kui chin tö ngam Mā Tēv.

Inrāmö Sôl Nāṅ Yônatan Tö Tāvit

¹⁷ Ngaich Tāvit nö harāmöre tö ngih inrāmö Sôl tök kūön ò inrē Yônatan:

¹⁸ Ngaich anga-aṅ nö tölṙô cha nö haköpten yik kūön Yūtā tö ngam tinkökö linreny: yĕh meuk, kūichiyö an i mat Līpöre Yēsör.

¹⁹ Fëliyö an ngam ineū-eu meh, Ō Israĕl nö i kūi ngam tömarô- òl kui chūökö: yöng fanuk- ngö ngam tökalēḵ!

²⁰ Un eūka an nö i Kāt, Un ahangka an nö el talöökö Askēlòn; Hòn öt ṙāmölōn yip kikānö kūön Filistain, Hòn öt mihôiṅ yip kikānö kūön töttunyīnyi.

²¹ Yī-ö ṙôngö Kilpuā, uh pöi- chö tachāmu kui, un rēhĕn kumṙah, i kui yīö, un rēhĕn tökētuvö aṅ panô-òṅ; tön in e ök lanaklö ngam tökalēḵ nö hachōichiyö kinvalngö, Ök lanaklö Sôl nöng sā töt hachāmö kui tö tavī-i.

²² I mahām yik töfëli, i tösangöö yik tökalēḵ, ök linreny Yô- natan nö öt havanritre, Öt chanlööpṙen ök fël Sôl nö havan.

²³ Vai nak nā Sôl nā Yônatan tölöök i saha cha nö aṅ, Öt köhngen cha-a tö höö inrē i kinpaha re: Veut nak töma- tēṙö, Kalēḵ nak tö lāyön.

²⁴ Yī-ö kikānö kūön Israĕl, peū- nyö Sôl yin, Ök kamfānö yīö tö laturë tö-amëla mat, Ök mahanyöṅt hilā yiö tö humlum.

²⁵ Yöng fanukngö ngam töka- lēḵ nö el kinyūngö! Im tö- maṙô-òl kui chūök meh ang Yônatan nö fëliyö.

²⁶ Kahëm chu Yônatan, kih- ngen chin tökūö meh: Töl- ngö kumchikṙen man in chu: Pinnangkūö ök hanāngen- lōn meh tö chu, Tô-òlkūö tö hanāngen kikānö.

²⁷ Yöng fanukngö ngam töka- lēḵ, Payāyi nuk nöngaich aṅtī kumyung!