2 RĀCHA 3 - TÖHET LĪPÖRE (Re-edited) Bible (BSI)

Kinyūngö Höö Israĕl Tö Mô-āp

¹ Rĕhtenre ngaich ang Yēhōrām nö hayöng ök kikōnyö kūön Ahap nö i kui Israĕl nö i Samariā im hinëvhöre sīön samyeūheu Yēhōsafāt ök rācha aṅ Yūtā, nët sīön samyeūheu ngaich anga-aṅ nö hayöng.

² Ngaich la-evṙen anga-aṅ tö tötlöök nö i kūö ngam Mā Tēv; hö-ö pöri nö sā ök yöng re kikōnyö, sā ök yöng re inrē kikānö, pò ò nö tiṙölngö ök insā Pē-al ök vahī ök yöng ò kikōnyö.

³ Sön pöri anga-aṅ nö köpngö nö i nuk tökööl Yērōpo-ām ök kikōnyö kūön Nëpôt, nuk aṅtī ò nö vīten Israĕl nö köölö fālen; öt kē-ĕngre anga-aṅ nö ṙā-ang in u.

⁴ Yōm sīṅp ök Mēsā rācha aṅ Mô-āp; ngaich kaheuk samyeūheu anga-aṅ nö kētö sanôi nuk töhēngòng kōiny kūön sīṅp nö ik rācha aṅ Israĕl, hēngòng köṅny inrē kan kūön sīṅp.

⁵ Ngaich ngö inlahen pöri angū-ö hē Ahap nö ngaich nö kapah, ök rācha aṅ Mô-āp nö ahôngö chöngö ök rācha aṅ Israĕl.

⁶ Hē e ök rācha Yēhōrām nö kunyī-inyre nö ṙā-ang Samariā, ngaich hamūl yik aṅ Israĕl nö ṙòkhöre.

⁷ Kiröönngöre ngaich anga-aṅ ngaich söömngö tö ngö ṙô nö in Yēhōsafāt ök rācha aṅ Yūtā. Ahôngö chöngö chu ap rācha aṅ Mô-āp: Hōḵ öm in chu kiyung lā-al Mô-āp? Ngö ṙô ngaich anga-aṅ, Hōk chin kiröönngöre: sā meh chin chū-ö, sā tarik meh vē tarik chu, sā kōra meh në kōra chu.

⁸ Ngaich ngö ṙô anga-aṅ, Ap yòh ap talöökö hī? Ngaich sap ṙô ò anga-aṅ nö ngö, Ngam talöökö ngam tönyalnyī i Ētöm.

⁹ Lökten ök rācha aṅ Israĕl nö kiröönngöre, tök rācha aṅ Ētöm inrē; sat sumkam röön cha-a nö havīngöre: ngaich öt mākuvö yik kumyung, öt rēhĕn nuk töṙeūla mī-in cha.

¹⁰ Ngö ṙô ngaich ök rācha aṅ Israĕl, Aōla! Pò ngam Mā Tēv nö havëten vē tölūöi tak rācha nö mūl nö kēten cha nö eltī aṅ Mô-āp.

¹¹ Ngö ṙô pöri Yēhōsafāt, Öt hĕng tak ök aṅ i yik tarik ök rācha aṅ Israĕl, tö ngö ṙô nö sap ṙô, Ēlaisa öp ihih öp kikōnyö kūön Sāfāt, öp ṙamöstö mak nö eltī Ēlaicha.

¹² Ngaich ngö ṙô ang Yēhōsafāt, In ò ap yih ṙô ngam Mā Tēv. Lökten nö chuh in ò ök rācha aṅ Israĕl tö Yēhōsafāt inrē ök rācha aṅ Ētöm.

¹³ Ngaich ngö ṙô Ēlāisa tök rācha aṅ Israĕl, Suh la-en öich chū-ö in meh? Kuṙòh chuh in yip pròfĕt ök yöng re man kikōnyö, pròfĕt ök yöng meh kikānö inrē. Hö-ö, Ngö ṙô ök rācha aṅ Israĕl: pò ngam Mā Tēv nö havëten vē tölūöi tak rācha nö mūl nö kēten cha nö eltī Mô-āp.

¹⁴ Ngaich ngö ṙô ang Ēlaisa, sā ngam Mā Tēv yip tömaṙôngö nö tö-aṅ, ngam tö aṅhāṅvkūö tö chu sökhak, hö-ö chin öre chumngāken meh öt rēhĕn ngëichken meh tön kūöre chin milēṙen i kūö Yēhōsafāt ngam rācha aṅ Yūtā.

¹⁵ Ngaich pöri kētöp tumkökṙôre in chu hĕng tak. Ngaich ngö inlahen angū-ö, hē ök tumkökṙôre nö röng, ök kël ngam Mā Tēv nö teungtöre nö in ò.

¹⁶ Ngö ṙô ngaich anga-aṅ, Ngö ṙô An ngam Mā Tēv, Hatööḵlö ngih achāṙö tö anūlö.

¹⁷ Tön ngö ṙô An ngam Mā Tēv Öt meuk kuföt yin min, öt rēhĕn yī-ö min meuk kumṙah ngaich pöri ngih achāṙö nö tööḵlö min tö mak: ngaich òk min yī-ö hĕnghöre nup nuā yīö tö nup töṙeūla yīö inrē,

¹⁸ Ṙòngmö töhöhövṙen pöri ngih nö i kūö ngam Mā Tēv; kētö yip aṅ Mô-āp ap min inrē nö eltī yīö.

¹⁹ Ngaich yī-ö min keuheūtngöre tī tiṙōlngö tökinlōngu elpanam, keuheūtlöre inrē tölöök elpanam, keuheūtngöre tī min inrē tö tökôlò chōn, asökiröön min inrē nup mak töhëmlö, nup tölöök inrē tumlat nö vītu nö ihōngu ël.

²⁰ Ngaich ngö inlahen angū-ö ip peuheū, i ṙētaka öp tökētuvö, ngaich yĕh meuk hëmti ök mak nö el talöökö i Ētöm, tööḵlö ngaich ngam panam tö mak.

²¹ Ngaich hē yik aṅ Mô-āp nö hang yik rācha nö yih nö kiyung nö lā-al cha, mūl cha-a ngaich nö hamūlöre, ṙòkhöre yik tökô nö hayutlöre tö lanaklö, yik tösamötlöng inrē sökhaka ngaich nö i kūöngö ngam panam.

²² Ka-euilökūö ngaich cha-a tö peuheū nö chōholre, yëichö mat ngaich ngam tavūöi nö ël ök mak, ngaich yik aṅ Mô-āp nö meuk ngam mak kamtö cha nö ngāṅv nö sā mahām:

²³ Ngö ṙô cha-a ngaich, Mahām ana; ṙòkngöre vah yik rācha nö ngaich nö fëli, ngaich cha-a nöng kö fëlngö hol re; lökten, Mô-āp, pöh i nup taneūngen hī.

²⁴ Ngaich hē cha nö sölta nö ik elyöngö Israĕl, chōholre ngaich yik aṅ Israĕl nö kiyung yik aṅ Mô-āp, lökten cha nö falngöre nö i kūö cha: ngaich acha-a nö kū-ötö lākūö re nö im panam nö kiyung yik aṅ Mô-āp.

²⁵ Tiṙōlngö nuk elpanam cha-a, ngaich el nuk tölöök tumlat cha-a nö kö suktö ihong, ngaich hatööḵöl e; löpngö kūö nup mak cha-a inrē, kūöltö nup tökôlò chōn inrē, hanöng saha tī cha nö ṙāngö nuk ihong nö i Kirhārēsĕt höng iṙūöhötī pöri yik chumvil kunleh nö havīlö e, ngaich piyāingö e.

²⁶ Ngaich hē ök rācha aṅ Mô-āp nö meuk ngam kinyūngö nö kalēḵ tö ò, sātòng kahëḵ anga-aṅ tö tarik nö hol ò yik tösanëtu, nö tumlungnyöre nö löknyö ik rācha aṅ Ētöm: ötkô pöri cha-a.

²⁷ Kēḵ ök maṙöinylö ngaich anga-aṅ kūön re kikōnyö ök ṙënngen ò öre nö hayöng, kēten ò ngaich nö töföngö nö i kui ök kinlōngö. Yöng lanīnö ngaich angū-ö nö in yik aṅ Israĕl: ṙāngen ò ngaich cha-a nö kiröönngöre, ngaich havantöre nö i panam re.