1 TIMÒTĪ 3 - TÖHET LĪPÖRE (Re-edited) Bible (BSI)

Yöngkūö El Ngam Māṅ

¹ Tökô-en ön ngih nö ṙô, yĕn tarīku tö hòṅ chöh la-en Pisköp; tö lōntö tölöök la-en an anga-aṅ.

² Lökten ön ngòh Pisköp nö tötkô nö īnu tö töchōich, töng hĕnglö tö pihöre, öt saṙākiṙen, öt saṙākilōn, lēn, tömiṙūöt mahaköphöti;

³ Öt lamā-alkūö, öt töchökhuti, öt kësen, töṙēm pöri, öt lā-alkūö, öt töhāngen tö rupīö,

⁴ Tö lēnö tī nö hayöng patīre, kūönu tö yip töt maha-ôngen, holtö öt tinyāchen,

⁵ Yē tarik pöri nö öt huveū-en nö hayöng patīre, sītih kanô-en ang min nö meukkö ngam Māṅ ngam Tēv?

⁶ Un tufömtören, hòn öt luföölöre ngaich fukngö anga-aṅ nö im öt inkôlò tö tī ngam sī-ö.

⁷ Hēk inrē anga-aṅ nö tö hòṅ löökö ineūka tö yip aṅ el kahôyö, hòṅ ò nö öt fuk im minṙēḵngö el tinngöp ngam sī-ö inrē.

Hamòlṙen El Ngam Māṅ

⁸ Ngatī inrē vē Tīkön, öt tayāchaṙen, öt tö nëtö litāk, öt kēngöre nö im, tö pōyen vāin, öt yal i tötlöök taneūngen.

⁹ Kiṙapkö ngam öt mikahkūö aṅ im mikah, holtö hanëtö el kuilōn.

¹⁰ Hökngen u anū-ö nö urĕh nö hameuktu, ngaich möl paichchö nö la-evṙen tö la-en Tikön, yē cha nö öt vinëku.

¹¹ Ngatī vē kikānö inrē nö un tayāchaṙen un samūöcha, öt saṙākiṙen, kô-en i tökeuheūttöre.

¹² Hökngen ngòh Tīkön nö töng hĕnglö tö pihöre, löökö tī nö hayöng kūönre, patīre inrē.

¹³ Pò cha vē Tīkön tö löökö inlahen nö la-evṙen, nö teūngen tö nyanatlö nö in re, ngaich öt pinheṅ-evkūö nö im mikah in Kristū Yēsū.

Tökiröng Öt Mikahkūö

¹⁴ Kūichtö në chin in meh öt ṙôktörevö chin meūkkenre yih,

¹⁵ Hòṅ meh akahalōn, yē chu öt hēḵen yih, tö inlahen tarik nö el ngam patī ngam Tēv, ngam Māṅ ngam tö-aṅ Tēv, ngam machööḵlö, röön tö ngam kanô-en inrē.

¹⁶ Kiröng an ngam öt mikahkūö aṅ im lanöökö, öt kilka nö ṙô; Anga-aṅ ngam tö hameuktu nö im alaha, hameuktu nö ma-alaha nö tölöök, meūkö tö ma-ahānga, ahangka i vē tarik, in Ò nö ṙātö ellōnre vē aṅ ngih panam, kēḵlöngö im kanôlò.