1 SAMUĔL 9 - TÖHET LĪPÖRE (Re-edited) Bible (BSI)

Meuk Kūö Samuěl Ang Sôl

¹ Ngaich hĕng tak ök umuh tarik aṅ Penyamin, ök töminënyu tö Kis, kikōnyö kūön Apī-el, ök kikōnyö kūön Seròr, ök kikōnyö kūön Pēkōrāt, ök kikōnyö kūön Afīa, ök kikōnyö kūön ök töhĕng tak aṅ Penyamin, tökôlò nö tarik tökalēḵ.

² Hĕng tak kūön anga-aṅ tök kikōnyö, ök töminënyu tö Sôl, ṙāl tarik tövai inrē: öt ōtngöre tarik in yip kūön Israĕl tösamötlöng vanāyö tö ò: löktökūö nuk elranôṙö ò kū-ö tö tulöng anga-aṅ nö marôlòng tö yik töng tarik.

³ Ngaich chatngen nuk köttö ök yöng Sôl ang Kis. Ngaich ngö ṙô ang Kis tök kikōnyö kūönre ang Sôl, Choholre man hĕng tak ngahôṅ tö holre i më tarik, kuṙòh chöh nup köttö.

⁴ Ngaich anga-aṅ nö lök ip rung panam Ifrēm, lök ip panam Salīsa inrē, öt kôtökūö pöri cha-a tö u: ngaich lök panam Sa-ālim cha-a, ngaich hö-ö anū-ö nö umuh: lök panam Penyamin anga-aṅ, hö-ö pöri cha-a nö kôtökūö tö u.

⁵ Ngaich hē cha nö sölta nö ip panam Suf, ngö ṙô Sôl ngaich tök tarikre ök mi-in ò, Tā-a tai ngaich havan; ṙā-ang pinṙūtölōnre öp min yöng chu kikōnyö tö nuk köttö, ngaich vaichtenre nö piṙūtken hā.

⁶ Ngaich ngö ṙô anga-aṅ tö ò, Yĕh meuk, hĕng taka öp tarik ngam Tēv el ngih elpanam, tarik apa tömilēkaṙen; ṙòkhöre nup ṙô ò nö teungtakūö; tā-a tai chuh umuh; amahtuṙen ap min nö kô nö ve-eny nang hā töng röönö hā.

⁷ Ngaich ngö ṙô Sôl tök tarikre, Yĕh meuk, yē hā kiröönngöre öre, ngaich suh öre min kumṙen hā ip tarik? Tön keuheūt nö ngaich nuk rôti el chūökṙen hā öt, kūmu ayā-a tö raneushö öp tarik ngam Tēv. Asuh ap in hā?

⁸ Ngaich hēk ök tarik nö sap ṙô Sôl, nö ngö ṙô, Yĕh meuk, aṅhaṅv eltī chin chū-ö tö rupīö finënö alaha siköl: angū-ö an min tī chu ip tarik ngam Tēv hòṅ ò nö vë-enynang hā töng röönö hā.

⁹ (Ik lā-urĕh misī i Israĕl, yē ngòh tarik nö kiröönngöre nö hatöntöre nö im Tēv, ngö ṙô anga-aṅ, Tā-a tai chuh ip mameuk: pò öp pròfĕt töngamuh nö mameuk tö ṙô ik lā-urĕh.)

¹⁰ Ngaich ngö ṙô Sôl tök tarikre, Vāyö ṙô man; tā-a, tai kiröönngöre. Kiröönngöre cha-a ngaich nö chuh im elpanam i chūök ök tarik ngam Tēv.

¹¹ Peūlöre cha-a ngaich nö ik elpanam, kôtökūö cha-a ngaich tö yik ṙālö kikānö mahalanṙen, kumnyī-inyre nö fòk mak ngö ṙô tö cha, Ihih öp mameuk?

¹² Ngaich sapṙô cha acha-a, nö ngö ṙô, Umuh apa; yĕh meuk urēhĕkūö nā ap: ka-eūyen yin tön yih ap töngamuh nö im elpanam; pò yip tarik töngamuh nö kētö tökētu ip tömarô-òl chūök chūökö:

¹³ Yē nā höng teunghë elpanam iṙūö chöhan panchö min, urēhĕkūö ò nö chuh ip tömarô-òl chūök chūökö nö nyā: pò yip tarik min nö öl nö nyā yĕn öl anga-aṅ nö yih, pò ò nö hakôlò ap tökētu; ngaich unôich cha-a nö nyā yip töhavëtu. Lökten nan ngaich kuṙòh; tön ngih ön ṙētak nā kôtökūö tö ò.

¹⁴ Peūlöre cha-a ngaich nö ik elpanam; ngaich hē cha nö ngaich nö lātuhēt nö elpanam, yĕh meuk, asaha cha ngaich ang Samu-ĕl, nö chuh ip tömarô-òl chūök chūökö.

¹⁵ Hameukhumat ang Samu-ĕl tö ngam Mā Tēv ik sakāmö urĕh tö yanīhih Sôl, nö ngö ṙô;

¹⁶ Huṙöich i ngih ṙētak öich hĕng tak tahīnti tö tarik aṅ panam Penyamin, ngaich hacham elkui ò pömchö nö rācha vē tarik chu Israĕl, anga-aṅ öp min mahayöken vē tarik chu nö ṙā-ang eltī vē Filistain: pò chu ngëichtö kui vē tarikre pò nup ṙô cha nö peuiny nö söllö nö in chu.

¹⁷ Ngaich hē Samu-ĕl nö meūkö Sôl, ngö ṙô ngaich ngam Mā Tēv tö ò, Yĕh meuk ngam tarik ngam ṙô chu tö meh! Anga-aṅ an min töchönguvö nö i kui vē tarik chu.

¹⁸ Ṙūötöre ngaich Sôl nö in Samu-ĕl nö i kūö inkūp, ngaich ngö ṙô, Vë-ekūö meh chin, Vë-eny nang chu, tö chūök öp patī öp mameuk.

¹⁹ Ngaich sapṙô Sôl ang Samu-ĕl, nö ngö ṙô, Chū-ö chin mameuk; pöh urēhĕkūö chu ngaich im tömarôl-òl chūök chūökö, tön holkūö chu nan min nyā töngamuh: ngaich ip peuheū chū-ö min hökngen meh kiröönngöre, ngaich keuheūtnyöre ṙô chū-ö min ve-eny nang meh tö nup ellōn meh.

²⁰ Nup köttö meh pöri tölūöi hang sumkam ngaich nö chatngen, uh man piṙūtkö u: tön kôtī nup nö ngaich. Achīö ṙöng ap lōn vē aṅ Israĕl? Röh öm më-eṅ, tö yip aṅ patī yöng meh inrē nö ṙòkhöre?

²¹ Ngaich ngö ṙô Sôl nö sapṙô, Röh öich chū-ö aṅ Penyamin, aṅ ip manā-angkūö ṙôkö miyöngö Israĕl? Tökūöṅnö inrē öp mupīhö chu nö i mupīhö yip miyöngö Penyamin? Kūöyòh lökten öm ngatī ṙô tö chu?

²² Ngô-òṅ Sôl ngaich ang Samu-ĕl tök tarik alaha ò inrē, ngaich ngôṅten cha nö el ap urôhò lööṙö yamih, ngaich ha-ūichngen cha nö el chūök mā nö in cha yik töhavëtu, yik tö lohten nö lūöi anāi tum taka.

²³ Ngaich ngö ṙô Samu-ĕl tök kamhul, Kētö ap umuh mana tömichöḵöyö öp kahëtö chu in meh, öich ngö ṙô tö meh, Ṙātö e nöng röhta nö in meh.

²⁴ Ngaich ök kamhul nö kē ök takeun tö nuk töng pā-aka nö in e, ṙātö e ngaich nö i kūö Sôl. Ngaich ngö ṙô ang Samu-ĕl, Yĕh meuk ngam hinöngken! Ṙātö e i kūöre ngaich nyā-aṅvkūö; tön töhalēnkaṙen an tö pòkūö meh ip hē ṙētak, pò chu ngö ṙô, Havëtö yip tarik chin. Nyā-aṅvkūö ngaich Sôl nö holkūö Samu-ĕl ik sakāmö angū-ö.

²⁵ Ngaich hē cha nö peūtöre nö im elpanam nö ṙā-ang ik tömarô-òl chūök chūökö, vë-ekūö Sôl ngaich anga-aṅ nö i kūö Sôl ngaich anga-aṅ nö i kui patī.

²⁶ A Ka-eūilökūö cha-a ngaich nö hōklöre; b ngaich hē hanatlö ngam sakāmö, havëlen Sôl ngaich ang Samu-ĕl nö i kui patī, nö ngö ṙô, Choholre, hòṅ chu ngaich tīnngörit meh. Chōholre ngaich Sôl, ngaich nëtre taka cha-a nö kunyī-inyre, nö elkahôyö, anga-aṅ tö Samu-ĕl inrē.

Hacham Kui Sôl Ang Samuěl Nö Mahayöng

²⁷ Ngaich hē cha nö peūtöre nö ik tölngö kūö ngam elpanam, ngaich ngö ṙô Samu-ĕl tö Sôl, Tölṙô ngam tarikre man nö chööḵökūöre urĕh tö hā, (chööḵökūöre ngaich anga-aṅ,) sökngöre pöri më-eṅ töngamuh um halöinyköre, hòṅ chu ahangnyö elnang meh tö ṙô ngam Tēv.