1 SAMUĔL 8 - TÖHET LĪPÖRE (Re-edited) Bible (BSI)

Havëkö Rācha Yik Tarīk

¹ Ngaich hē Samu-ĕl nö ngaich nö köiny, vīlö nak kūönre ngaich anga-aṅ kikōnyö nö hayöngö Israĕl,

² Yô-el minënyi ök lanòh; Apīchā, minënyi ök innëtö: hayöng cha-a nö i Pīrsīpā.

³ Öt lök el talöökö ò pöri nak kūön ò, kānngöre pöri nö i tökôlòtī taneūngen, ngaich kētö tö-ulāitu ṙāire, hachōichngö ngam inkaha fālen inrē.

⁴ Ngaich hamūlöre yik mā aṅ Israĕl, yihtöre ngaich nö in Samuĕl nö i Rāma;

⁵ Ngaich ngö ṙô cha-a tö ò, Yĕh meuk, ngaich man köiny, ngaich minā kūön meh nö öt lök el talöökö meh: vīlö rācha ih man yĕh ngaich töngamuh tö mahayöngö ih sā vē pumnāmö tarik nö ṙòkhöre.

⁶ Kunyahalōn pöri Samu-ĕl tö e, hē cha nö ngö ṙô, Kētö rācha ih man nö mahayöngö ih. Ngaich samu-ĕl nö vë-ekūö ngam Mā Tēv.

⁷ Ngaich ngö ṙô ngam Mā Tēv tö Samu-ĕl, Hang ṙô më tarik man i nup ṙô cha tö meh: tön rö-ö yin nö sōḵen meh, sōḵen chu pöri cha-a, nö sōḵten chu rācha i kui cha.

⁸ Sā nup la-en cha nö ṙòkhöre tökēkaṙen hēten tök sakāmö chu kēnyen cha ṙā-ang Aikup söl ing töngamuh, acha-a nö ṙāngen chu, ngaich lök la-en tahëng tēv, ngatī tī yin tö meh inrē,

⁹ Lökten hang ṙô cha ngaich: uh pöri më-eṅ öt vëken cha min, hameukhömat cha inrē më-eṅ tö inlahen öp rācha öp mahayöngö cha min.

¹⁰ Ngaich Samu-ĕl nö keuheūtnyöre ṙô nö i yik tarik tö nuk ṙô ngam Mā Tēv yik mahavëkö rācha nö in ò.

¹¹ Ngö ṙô anga-aṅ, Ngih ön yih min inlahen öp rācha öp mahayöngö yīö min: kē yip kūön yīö ap min kikōnyö, ngaich vīlen cha nö in ò, nö yōm inröl ò, mi-i-uk kōra ò inrē; ngaich cha-a min nö fal urēhĕkūö nup inröl ò:

¹² Ngaich vīlen cha min anga-aṅ nö in ò nö yöngkūö töhĕng köṅny, yöngkūö tö taneūi anāi inrē; ane inrē kumrus ngam tumlat ò, uvòhlö ṙòng sāiny inrē, vamī aṅtī ò inrē nö i kinyūngö, chehen nup inröl ò inrē.

¹³ Kē yip kikānö kūön yīö min anga-aṅ nö vamī tötahūsa, kamhul nyā-aṅkūö, vamī rôti inrē.

¹⁴ Kē nup taṙeū yīö min anga-aṅ, nup panô-òṅ vāin yīö, panô-òṅ ôliv yiö inrē, anū-ö nup tölngö tökôlò in u, ngaich kēten u min nö in yip tarik ò.

¹⁵ Ngaich anga-aṅ min inrē nö kē nup kulöl in yīö hĕng i tösöm, nup panô-òṅ vāin yīö inrē, ngaich kēten u nö in yip yöngṙen, in yip tarik ò inrē.

¹⁶ Ngaich anga-aṅ min inrē nö kē yip tarik yīö kikōnyö, tarik yīö kikānö inrē yip tövai ṙāl tarik in yīö inrē, tö nup köttö yīö, ngaich kēten cha i nup la-en ò.

¹⁷ Ngaich anga-aṅ min nö kē nup pököre yīö hĕng i tösöm: ngaich tarik ò min yī-ö inrē.

¹⁸ Ngaich ip sakāmö angū-ö yī-ö min ayôṙa ṙô tökūö öp rācha yīö, ngaich hö-ö pöri min ngam Mā Tēv nö sapṙô yīö ip sakāmö angū-ö.

¹⁹ Sōḵ pöri yik tarik nö hang ṙô Samu-ĕl; ngö ṙô cha-a, Hö-ö; hòṅ rāchavö in töp mahayöngö ih;

²⁰ Pò ih inrē hòṅ sā yip pumnāmö tarik nö ṙòkhöre; hòṅ öp rācha ih inrē nö kahôkken ih, kiröönngöre inrē nö urēhĕkūö ih, kiyung inrē i nup kinyūngö ih.

²¹ Hang nuk ṙô yik tarik ang Samu-ĕl nö ṙòkhöre, ngaich ahangnyen u nö elnang ngam Mā Tēv.

²² Ngaich ngö ṙô ngam Mā Tēv tö Samu-ĕl, Hang ṙô cha man ngaich, vīlö rācha cha. Ngaich Samu-ĕl nö ngö ṙô tö yik tarik Israĕl, Kö chuh elpanamre yin ngaich kuṙòh.