1 SAMUĔL 7 - TÖHET LĪPÖRE (Re-edited) Bible (BSI)

¹ Yih ngaich tarik aṅ Kirīat-yēarim nö kē-ĕrö ök kasòng ngam Mā Tēv, ngaich kētö e nö i patī Apīnatap nö i kui öp rung, ngaich ahetlen Ēlīēsör ök kikōnyö kūön ò nö hayōm ngam kasòng ngam Mā Tēv.

Hayöngö Israel Ang Samuěl

² Ngaich hēten tö ngam sakāmö ngam kasòng nö iyöng Kiriatyēarim, nö marô-òten; pò e nö ngaich nö nët anāi samyeūheu: ngaich ṙòkhöre yik aṅ patī Israĕl nö haramhökūö ngam Mā Tēv.

³ Ngaich Samu-ĕl nö vë-ekūö yik aṅ patī Israĕl nö ṙòkhöre, nö ngö ṙô, Yē yīö hòṅ havantöre im Mā Tēv öi keuheūttö ellōnre, kavalngö nup tēv yin yĕh tötohtöre tö ngam Astaròt inrē nö ṙā-ang in yīö, ngaich halēn ellōnre yī-ö im Mā Tēv, ngaich lök la-en ò nöng anga-aṅ: ngaich ṙānyen yīö min anga-aṅ nö ṙā-ang eltī yip Filistain.

⁴ Ngaich yik kūön Israĕl nö kavalngö nuk Pē-al tö nuk Astaròt, ngaich lök la-en ngam Mā Tēv nöng anga-aṅ.

⁵ Ngaich Samu-ĕl nö ngö ṙô, Hamūl yip Israĕl nö ṙòkhöre nö i Mispah, hòṅ chu vë-elkui yīö im Mā Tēv.

⁶ Hamūlöre cha-a ngaich nö i Mispah, fòk mak ngaich, ngaich rösten e nö ikūö ngam Mā Tēv, ahik ngaich im sakāmö angū-ö, ngaich ngö ṙô nö umuh, Köölö fālen in ngaich im Mā Tēv. I Mispah ang Samuĕl nö hayöng yik kūön Israĕl.

⁷ Hē yik Filistain nö hang yik kūön Israĕl nö hamūlöre nö i Mispah, kiröönngöre ngaich yik mā aṅ Filistain nö lā-al Israĕl. Hē yik kūön Israĕl nö hāngö e, pa-ekūö cha-a ngaich tö yik Filistain.

⁸ Ve-ekūö Samu-ĕl ngaich yik kūön Israel nö ngö ṙô, Uh man ṙāngôre peuinyhökūö ngam Tēv hī ngam Mā Tēv öm chööḵnyôten tö ih, hòṅ ò nö hayööken ih nö ṙā-ang eltī yip Filistain.

⁹ Ngaich hĕng nòng kahë töpamôḵ kōiny kūön pököre, ngaich kēten ò nöng nòngre nö töföngö tökētu nö im Mā Tēv: ngaich Samu-ĕl nö ve-ekūö ngam Tēv Israĕl; sap ṙô ò ngaich ngam Mā Tēv.

¹⁰ Hē Samu-ĕl nö kētö ök töföngö tökētu, ṙūötöre ngaich yik Filistain nö kiyung nö lā-al yik Israel: kunṙôktö kui yik Filistain pöri ngam Mā Tēv ik sakāmö angū-ö tö töpōitô kunṙôkö ngaich ötkô cha-a tö tī ò; ngaich cha-a nö ötkô nö i kūö yik Israĕl.

¹¹ Ṙā-ang Mispah ngaich yik tarik Israĕl nö lūḵ yik Filistain, fëlö cha ngaich, hanöng saha cha nö sölta nö elkatòh Petkār.

¹² Hēngö kahë ngaich Samuēl tö ihong, asöklen e ngaich nö ihôi Mispah tö Yĕsĕt, kahēūkö e ngaich anga-aṅ nö Epenīsör nö ngö ṙô, Holṙen hī an ngam Mā Tēv nö ihih.

¹³ Lökten yik Filistain nö ngaich nö tumṙeūtu, öt hēk cha-a inrē nö vānghöt nö el kūöngö panam Israĕl: lā-al yik Filistain inrē ngam kël ngam Mā Tēv i ṙô-òtö nuk sakāmö Samu-ĕl.

¹⁴ Havantuvö inrē nuk elpanam nö in Israĕl nuk tökē-ĕ tö yik Filistain nö in Israĕl löktökūö Ēkròn sölngö nö i Kāt; nuk kūöngö u inrē töṙānyu tö Israĕl nö ṙā-ang eltī yik Filistain, Lām inrē Israĕl nö in Amôr.

¹⁵ Hayöngö Israĕl ang Samuēl i rô-òten ò nö aṅ.

¹⁶ Ngaich kiröönngöre anga-aṅ nö havī nö chuh Pētĕl, Kilkāl, Mispah inrē; in u anga-aṅ nö chūökö nö hayöngö Israĕl.

¹⁷ Im invānöre anga-aṅ nö i Rāma, pòn in e ök patī ò; in e anga-aṅ inrē nö hayöngö Israĕl; vīlö tahāklö ngam Mā Tēv inrē anga-aṅ nö umuh.