1 SAMUĔL 4 - TÖHET LĪPÖRE (Re-edited) Bible (BSI)

Kē Ök Kasòng Chöngö

¹ Yih ök ṙô Samu-ĕl nö in Israĕl nö ṙòkhöre. Hē e Israĕl nö kiröönngöre nö kiyung lā-al yik Filistain, ngaich vītö chūökre nö i Epenīsör: vītöchūökre inrē yik Filistain nö i Afek.

² Haṙāköre ngaich yik Filistain nö lā-al Israĕl: ngaich hē cha nö rultenre nö kiyung, ötkô ngaich Israĕl tö yik Filistain fën köṅny ngaich yik tarik aṅ i yik kumyung tökapah nö el kahôyö.

³ Ngaich hē yik tarik nö yih nö im elyöngö, ngaich ngö ṙô yik mā aṅ Israĕl, Sitih Ang ngam Mā Tēv nö fëlngen hī töngamuh i kūö vē filistain! Ta-a töi kē-ĕrö öp kasòng kinlēḵngô ngam Mā Tēv nö ṙā-ang Sailō nö in hī, hòṅ e nö yih nö in hī, ngaich hayöölen hī ṙā-ang eltī vē lā-al hī.

⁴ Lökten yik tarik nö tīnngö chamuh Sailō, ngaich ṙā-ang umuh cha-a nö kumtö ök kasòng kinlēḵngô ngam Mā Tēv yip tömaṙôngö, ök mi-ikui nuk kërupim: umuh inrē nak kikōnyö kūön Ēli, nā Hòfnī nā Finehes in ök kasòng kinlēḵngô ngam Tēv.

⁵ Ngaich hē ngam kasòng kinlēḵngô ngam Mā Tēv nö yih nö im elyöngö, pōitô ngaich yik Israĕl nö ṙòkhöre nö ayôṙa, lökten ngam tumlat nö karöl kötiṙô nö hēk.

⁶ Ngaich hē yik Filistain nö hang ṙën ṙô tö ayôṙa, ngaich ngö ṙô Cha-a, Asuh ap ṙënṙô yip tö ayôṙa ṙô nö pōitô nö ip elyöngö yip HIprū? Ngaich cha-a nö akahalōn tö ök kasòng ngam Mā Tēv nö yih nö im elyöngö.

⁷ Pa-ekūö ngaich yik Filistain, pò cha nö ngö ṙô, Yih ap Tēv nö im elyöngö. Ngaich ngö ṙô cha-a, Ötkôlò in ayī-ö! Pòn öt töngatī-ivö misī nö tösā e töngamuh.

⁸ Ötkôlò in ayī-ö! Chiāp min ṙamānyen hī ṙā-ang eltī vē tökalēḵ tēv? Cha-a yin vē tēv famëlngö yik aṅ Aikup nö aṅtī tö töṙōlkangen invah tölëlngökūö nö el tönyalnyi.

⁹ Hangë-eṅre yin, Ō yī-ö Filistain, hameuktöre yin sā tarik, hòṅ yīö öt kūön alaha yip Hīprū, nö sā cha cha-a nö in yīö: hameuktöre yin sā tarik, öi kiyung.

¹⁰ Kiyung ngaich yik aṅ Filitain, ötkô ngaich yik aṅ Israĕl, kö falngöre cha-a ngaich nö el inrūkuire: pōihang vah ngaich yik töfëli; pòn lūöi anāi köṅny yik kumröön kumyung aṅ Israĕl töfukngö.

¹¹ Kē-ĕ ök kasòng chöngö ngam Tēv; fëlö inrē nak tönët tak kikōnyö kūön Ēli, nā Hōfni nā Finehas.

Kapah Ngaīch Ēlī

¹² Ngaich hēng tak ök umuh tarik aṅ Penyamin ṙāma-ang i yik kumyung, yamih nö i Sailō hē e nöng takācha inyut, tumlātu elkui inrē.

¹³ Ngaich hē ò nö chalôköti, yĕh meuk ūichhak Ēli nö lö el anūchöre i taseū talöökö nö aṅhati pò ò nö kichëyöre ellōn tökūö ök kasòng ngam Tēv. Hē ngam tarik nö sölhöt nö elpanam, vë-eny e ngaich, ngaich ṙòknyöre ṙô yik aṅ elpanam nö peūiny.

¹⁴ Ngaich hē Ēli nö hang ṙô pameūiny, ngaich ngö ṙô anga-aṅ, Asūap tinṙōlen ṙënṙô? Kurāten ngaich ök tarik, ngaich yihtöre nö ve-eny nang Ēli.

¹⁵ Machūötör anāi hëvhöre samyeūheu ök Ēli hē e; meūich-hak nuk mat ò, ötkô anga-aṅ nö meuk.

¹⁶ Ngaich ngö ṙô ök tarik tö Ēli, ṙama-ang i yip kumyung chin chū-ö, ngaich öich falngöre ṙā-ang i yip kumyung. Ngaich ngö ṙô anga-aṅ, Kakūönö, sitih ap lāinyngen?

¹⁷ Ngaich sap ṙô ò ök tökumtö ngam inhānga nö ngö ṙô, Falngöre yik Israĕl nö ṙā-ang i kūö yip Filistain, pōihang vah yik töfëli nö ngaich aṅ i yip tarik, kapah nak inrē tönët nak kūön meh nā Hofni nā Finehas, kē-ĕ ök inrē kasòng ngam Tēv.

¹⁸ Ngaich, hē ò nö kakkö ngam kasòng ngam Tēv, ngaich parātrit anga-aṅ nö suktöre nö ṙā-ang el ök anūchöre mi-in ök inkūp, ōhö likeun ngaich anga-aṅ ngaich kapah: pò ò nö köiny nö tarik, langan inrē. Fën anāi samyeūheu anga-aṅ nö hayöngö Israĕl.

Kinpāha Ök Tafīösī Finēhās

¹⁹ Ngaich ök kankūön ò, pīhö Finehas, ök puyōsö, töröhten nö hòṅ kayôḵ: hē ò nö hang vine-eny ök kasòng ngam Tēv nö kĕ-ĕyö, hang ök yöng pīhöre inrē, tök pīhö ò nö kapah, sōnngöre anga-aṅ nö hòṅ kayôḵ; pòn yit ök chanöökö ò nö ngaich.

²⁰ Hē kinpaha ò ök kikānö tö sökhak nö in ò ngö ṙô tö ò, Um pa-ekūö: tön kayôḵnyö kikōnyö man nyīö. Hö-ö pöri anga-aṅ nö sap ṙô, öt rēhĕn nö akahaiṙen tö e.

²¹ Ngaich anga-aṅ nö kaheuk mine-eny ök nyīö nö Ichapōt nö ngö ṙô Ṙāngö in Israĕl ök nö ngaich kanôlò: pò ök kasòng ngam Tēv nö kē-ĕ, kūö ök yöng pīhö ò inrē tök pīhö ò.

²² Ngaich ngö ṙô anga-aṅ, Ṙāngen Israĕl ök kanôlò: pòn kē-ĕnyö ök kasòng ngam Tēv.