1 SAMUĔL 2 - TÖHET LĪPÖRE (Re-edited) Bible (BSI)

ṘÔ Hëna Nö Vë-ekūötēv

¹ Ngaich vë-ekūötēv Hëna nö ngö ṙô, Im Mā Tēv chin pōyen ṙānāmölōn, Im Mā Tēv ngam sinrōl chu nö ṙūölöngö: I yip lā-al chu ngam elvāng chu nö pōiti: Pò chu ṙamölōn im inyööken tī meh.

² Öt hĕng töhet nö sā ngam Mā Tēv: Pò meh öt hōluvö Öt rēhĕn ihong tö sā ngam Tēv hī.

³ Un yāha inkeūlen ṙô; Un löknyö elvāng meh tökiröng ṙô; Tön Tēv inkaha an ngam Mā Tēv, Kalaha lumngan nup inlahen tö ò.

⁴ Ohngö nuk nö ngaich linreny tökalēḵ tarik, nyëklöng ṙat inrē tökumlēḵ yip tö kavē- ĕre.

⁵ Haṙāi nyā-aṅkūöre yip tö tö- tööḵngen töre; Öt ōtre inrē ngaich yik tö kapahare: Hôṅ, sat tak kayônyi ngam tötmikūönlö; Ngaich anga-aṅ nö öt kalē-en ngam töṙōl mameuk kūön.

⁶ Kapahatī An ngam Mā Tēv. Aṅhaṅtī inrē: Kē-ĕtī An nö im anūlö, Kēhölö inrē.

⁷ Vīten yāich an ngam Mā Tēv, vīten tökôlò inrē: Tumṙeū-euti An, hachohhölö inrē.

⁸ Hachohlö yāich an ṙā-ang el tumlat hachohlö töhāṅten An ṙa-ang im rung sôḵ nuā, nö vīten chān holtöṙah kūön mā nö ūichhaka, amīnu inrē tö kantēra minā-aṅ: pò nup machööḵlö ngih panam nö aṅ im Mā Tēv, töönglö ngam panam anga-aṅ inrē nö i kui u.

⁹ Haköp röön yip in re An tölöök, Ngam tötlöök pöri min nö el singūlö nö sōtu nö ṙô-òv: Pò ngam tarik min nö öt lökten i kumlēḵ nö mihôiṅ.

¹⁰ Cha-a yip töhòṅ lā-al ngam Mā Tēv ohngö min nö panyeiny; Kunṙôk tökui cha min anga-aṅ nö el halīöngö; Akah manā-angkūö ngam tumlat ngam Mā Tēv min: Kētö kumlēḵ ngam rāchare min anga-aṅ, Hapōilö sinrōl ngam töhachā- mö kui tö ò.

¹¹ Chuh patīre ngaich Elkānā nö i Rāma. Ngaich ngam nyīö nö meukṙen ngam Mā Tēv nö ikūö Ēli ök kūönṙò.

Yik Kikōnyö Kūön Ēlī

¹² Ngaich nak kikōnyö kūön Ēli nö kūön sāṙen; öt akahakūö cha-a tö ngam Mā Tēv.

¹³ Ngaich fehere yip kūönṙô nö in yip tarik, yē öp tarik nö kētö tökētu, yihtöre ngaich öp tarik öp kūönṙô, i saha nup alaha nö sūmö, nö aṅ eltītö kinvòk alaha öp tölūöyö kūö;

¹⁴ Ngaich kavòktö kūö e anga-aṅ nö el tanīöyö, el pôich, el kaltiròng, el tanīöyö inrē; keuheūtlöre ngaich nup tö-kavòklöre nö i kūö ngam vòk alaha nö kē-ĕ tö kūönṙô. Ngatī inlahen cha-a nö i Sailō nö i yik aṅ Israel nö ṙòkhöre yik yamihtökūö nö umuh.

¹⁵ Hôṅ, yihtöre ök tarik ngam kūönṙô, urēhĕkūö tī cha nö föng nuk tösangöö, ngaich ngö ṙô tök tarik kamëtö tökētu, Kētö alaha kā öp kūönṙô tö töharāngö; tön sōḵ öp tö tösūmö aṅ in meh tö-uhāv pöri.

¹⁶ Ngaich yē ök tarik nö ngö ṙô tö ò, Hòṅ urĕh yin nö föng ngam tösangöö, ngaich möl me-eṅ kô-òren kēḵ ip ṙôken lōnre; ngaich kô-òren anga-aṅ nö ngö ṙô, Hö-ö ötkô man öt kētö e in chu töngamuh höng kētöre chin min tö e yē meh öt kē-ĕti.

¹⁷ Ngaich ngam tökööl minā ṙāl tarik nö kiröng nö i kūö ngam Mā Tēv: pò tarik nö mināchṙen tö tökētu nö im Mā Tēv.

I Sīloh Ang Samuěl

¹⁸ Meukṙen pöri nö i kuö ngam Mā Tēv ang Samu-ĕl, nöng ṙòngmö nyīö nö inyuttö līnen sörplis.

¹⁹ Hēk inrē ök kikānö yöng ò nö vī kun tö aṙū-uti inyut ngaich kaheuk samyeūheu nö kē-ĕti nö in ò, yē ò nö yih nö holröön ök pīhöre nö kētö tökētu i töhĕng samyeūheu.

²⁰ Hakôlò nāṅ Elkāna ngaich Ēli tö pīhöre nö ngö ṙô, Kētö kūön meh an ngam Mā Tēv i ngòh kikānö tökūö ngam töhaṙūöngka nö kētu nö im Mā Tēv. Chuh patīre ngaich cha-a.

²¹ Chöhka ngaich Hëna tö ngam Mā Tēv, pirūkö nyīö ngaich anga-aṅ, ngaich lūöi tak kayônyi tö nyīö kikōnyö nët kikānö inrē. Ngaich ngam nyīö Samu-ĕl nö pōyö nö i kuö ngam Mā Tēv.

Ēlī Tö Yik Kūön Ò Kikōnyö

²² Köiny ngaich ang Ēli; hang nup inlahen nak kikōnyö kūönre anga-aṅ nö in yik aṅ Israĕl nö ṙòkhöre, tö inlahen cha inrē nö holtöṙah yik kikānö yik töla-evṙen nö i kūö inkūp ök rūkui manūlö.

²³ Ngö ṙô ngaich anga-aṅ tö cha, Kūöyòh an ngatī la-en? tö chu hang nup tötlöök la-en nāṅ in vē tarik nö ṙòkhöre.

²⁴ Hö-ö, nā-aṅ kūön chu: pò nup ahang chu ineūken nö öt tölöök: vīten vē tarik ngam Mā Tēv nan nö köölö fālen.

²⁵ Yĕn hĕng tak öp tarik tököölö fālen nö ip tahëng, kahòkkaṙen min anga-aṅ tö ngam Tēv: yĕn hĕng tak pöri tarik tököölö fālen nö im Mā Tēv, chīö ap min vamë-elkui ò? Hö-ö pöri cha-a nö hang ṙô ök yöngre, pò ngam Mā Tēv nö hòṅ fëlngen cha.

²⁶ Pōyö ngaich ngam nyīö Samu-ĕl, ngaich hĕnghöre aheukhuvö tö ngam Mā Tēv, tö tarik inrē.

Ṙô I Yik Mikūönö Ēlī

²⁷ Ngaich hĕng tak ök umuh tarik ngam Tēv yamih nö in Ēli, tö ngö ṙô tö ò, Ngö ṙô an ngam Mā Tēv, Hameuktöre öich misī i patī-ök yöng meh, hē cha nö i Aikup, el inkövö tö Fërō?

²⁸ Katöllen ò hòng chū-ö inrē nö kūönṙô chu nö ṙā-ang i nup miyöngö Israĕl, nö hōtu nö vānglöre nö im tahāklö chu, nö föng tötahūsa, nö hayūtöre tö sörplis nö i kūö cha? I patī ök yöng meh tī öich misī tö nup tökētu töföngö tö yip kūön Israĕl nö ṙòkhöre?

²⁹ Kūöyòh öi röönngöngam tökētu nö in chu, ngam töhōtu tö chu nö el ngam chūök chu; ngaich me-eṅ milēḵ-ṙen tö nap kūönre nö mötlö tö chu, pò yīö hòṅ vīnyö ṙôkö alahare tö nup yöngkūö nup tökētuvö tö yip tarik Israĕl?

³⁰ Lökten an ngam Mā Tēv, nö ngö ṙô, ngam Tēv Israĕl, Kô-en chin ṙô-òv tö ngam patī meh, patī ngam yöng meh inrē, öich hōten u nö örheūheu nö lök i kūö chu: ngaich pöri töngamuh nö ngö ṙô ngam Mā Tēv, Marôvat an yēḵ tö chu; milēḵṙen chin min tö cha yip tömilēḵṙen tö chu, ngaich acha-a yip tömināch tö chu nö kūöṅnen hananghuṙen min.

³¹ Yĕh meuk, yih nup sakāmö, hē chu min rökngö kël meh, kël ngam patī ngam yöng meh inrē, hòn öt tököṅnyu tarik el patī meh min.

³² Ngaich me-eṅ min meuk inkihten ngam chūök chu i nup kanôlò kahëtö ngam Tēv min in Israel: öt tökönyu min tarik i patī meh örheūheu.

³³ Ngaich ap tarik meh, ap töt rökiṙen min tö chu nö im tahāklö chu nö töngeūṅktu nö meūkivah tö meh, nö miṙivngö lōn meh inrē: ṙòkhöre yip tö sīöplö nö el patī meh min nö kapah i saha cha nö ayal.

³⁴ Ngih ön min minkahtökūö meh, nö tameunghö kui nap kūön meh min, i kui Hòfnī, i kui Finehas inrē; nëtre taka nap min nöng hĕng sumkam kinpaha.

³⁵ Ngaich chū-ö min hachohlö öp tökô-en kūönṙô öp töla-evṙen min tö tösā lōn chu, tösā kuilōn chu inrē: ngaich chū-ö min mānlö tököp patī ò; lök i kūö ngam töhachāmö kui tö chu min inrē anga-aṅ nö örheūheu.

³⁶ Ngaich mīnö, öp tö ōtren nö i patī meh nö yihtöre nö sōnngöre nö i kūö ò nö havëkö töhĕng tāk rupīö hĕng michööḵö rôtī inrē nö ngö ṙô min, Ve-ekūö meh chin, Ṙāten chu hĕng kang chūök i chūök la-en kūönṙô, hòṅ chu höng hĕng vat hanam tö rôtī.