1 SAMUĔL 16 - TÖHET LĪPÖRE (Re-edited) Bible (BSI)

Hachāmökui Tāvit Nö Rācha

¹ Ngaich ngam Mā Tēv nö ngö ṙô tö Samu-ĕl, I rô-òtö miṙivlōn öm min tö Sôl, yĕh meuk tö chu ngaich sō-en ò nö rācha nö i kui Israĕl? Asëlö aṅ ngam sinrōl man tö tavī-i, kuṙòh, töich tinngen meh in Yēsī öp aṅ Pĕtlihem: tön i yip kūön ò chin kikōnyö meukṙenre tö rācha.

² Ngaich ngö ṙô Samu-ĕl, Sitih kanô-òṅ öich kiröönngöre? Fëlngen chu öp yih min Sôl yē ò nö hāngö e. Ngaich ngö ṙô ngam Mā Tēv, Kē kōiny man kun nuā hĕng nòng kum meh, ngaich ngö ṙô pömchö, Yih chin kētö tökētu im Mā Tēv.

³ Havëten Yēsī nö ip tökētuvö, hameukhömat meh chin min töp inlahen meh: hacham el kui ò pömchö öp töminënyu tö ṙô chu min in meh.

⁴ Ngaich Samu-ĕl nö teūngen tö ök ṙô ngam Mā Tēv, ngaich yih nö i Pĕtlihem. Ngaich yik mā im el panam nöng kichëyöre nö yih nö höngkūö ò, nö ngö ṙô, Lāmö yanīhih ömeh?

⁵ Ngaich ngö ṙô anga-aṅ, Lāmö yanīhih chin: yih chin kētö tökētu im Mā Tēv: ahetlöre yin, yihtöre in chu ing tökētu. Ahetlen Yēsī ngaich anga-aṅ tö yik kikōnyö kūön ò, havëten cha ngaich nö ik tökētu.

⁶ Ngaich, hē cha ngaich nö yih, hatīönken Ēlīap ngaich anga-aṅ nö ngö ṙô, Ngòh takô an nö ngaich i kūö ò töhachāmö kui tö ngam Mā Tēv.

⁷ Ngö ṙô pöri ngam Mā Tēv tö Samu-ĕl, Uh man ngëichkö arëkūö ò hēk um ngëichkö rôlòng ò; sō-en ò chin; pò ngam Mā Tēv nö öt sā mat tarik nö meuk; pò ngòh tarik nöng meuk lā-uk, meuk ellōn pöri ngam Mā Tēv.

⁸ Havëten Apīnatap ngaich Yēsī, ngaich hōten ò nö lökngö kūö Samu-ĕl. Ngaich ngö ṙô anga-aṅ, Öt rēhĕn ön ngòh nö katöllöng tö ngam Mā Tēv.

⁹ Hōten Sāma ngaich Yēsī nö lökngö in ò. Ngaich ngö ṙô anga-aṅ, öt rēhĕn ön ngòh nö katöllöng tö ngam Mā Tēv.

¹⁰ Ngaich Yēsī nö hōten yik tösat tak kikōnyö kūön ò nö lök ngö kūö Samu-ĕl. Ngaich Samu-ĕl nö ngö ṙô tö Yēsī, Öt katöllöngö yin vē tö ngam Mā Tēv.

¹¹ Ngaich Samu-ĕl nö ngö ṙô tö Yēsī, Ṙòkhöre aich vē kūön meh nö ihih? Ngaich ngö ṙô anga-aṅ, Öp manāngö takô apa tö-öl, yĕh, meuk, aṅtö nup sīnp ap. Ngaich Samu-ĕl nö ngö ṙô tö Yēsī, Tīnngö kame-eṅren ò: tön rö-ö in kô höng ūichhakṙen hanöng saha ò nö yih.

¹² Tīnhang anga-aṅ ngaich, ngaich kēhĕtnen ò. Töturëṙökūö ök tövāyö arëkūö inrē, vāyö mineūkö inrē. Ngaich ngö ṙô ngam Mā Tēv, Chöholre, hacham, elkui ò: tön anga-aṅ an.

¹³ Kē ök sinrōl tavī-i ngaich Samuĕl ngaich hacham el kui ò nö elṙôngö yik mëm ò: ngaich ngam ma-alaha aṅ im Mā Tēv nö kalēḵ nö teungtöre nö i kui Tāvit löktökūö ik sakāmö angū-ö nö iṙūöhöröön. Hōklöre ngaich Samu-ĕl, ngaich chuh Rāma.

Elpatī Sôl Ang Tāvit

¹⁴ Ngaich ök ma-alaha aṅ im Mā Tēv nö ṙāngen Sôl, ngaich hakihten ò ök tötlöök ma-alaha aṅ im Mā Tēv.

¹⁵ Ngaich ngö ṙô yik tarik Sôl tö ò, Yĕh meuk, hakihtuṙen man tö ngam tötlöök ma-alaha aṅ im Tēv.

¹⁶ Tölṙô vē tarikre an yēḵ ngam Mā ih, vē mi-ikūö ò, nö hĕng tak chahöh tö tarik öp töhuveū nö röng hārp: ngaich mīnö, hē ngam tötlöök ma-alaha aṅ im Tēv nö in meh, röng min ngaich anga-aṅ nö aṅtī tö kuntire, ngaich lööken min më-eṅ.

¹⁷ Ngaich ngö ṙô Sôl tö yik tarikre, Meukten chu yin ngaich tö tarik hĕng tak öp tökô nö vāyö tī nö röng, ngaich kēten ò in chu.

¹⁸ Ngaich hĕng tak ök ṙāl tarik samap ṙô, nö ngö ṙô, Yĕh meuk, meuk öp kūön Yēsī chin chū-ö hĕng tak aṅ Pĕtlihem öp töhuveū nö röng tökalēḵ inrē nö tarik töt pa-ekūö, kumyung öp inrē nö tarik, tö akaha vane-enkūö, tövai inrē nö tarik in ò inrē ngam Mā Tēv.

¹⁹ Lökten Sôl nö tīnngö ma-ahānga nö in Yēsī, nö ngö ṙô, Tīntap kūönre man Tēvit in chu, öp mī-i nup sīṅp.

²⁰ Hĕng nòng kahë ngaich Yēsī tö köttö tö aṅ uk tö rôtī, hĕng ök uk chūök vāin inrē hĕng nòng kun pököre, söömtu anū-ö nö in Sôl nö kum ök kūön ò Tāvit.

²¹ Chalô ngaich Tāvit nö in Sôl, ngaich sökhak nö i kūö ò: kirööngen hanāngenlōn ngaich anga-aṅ tö ò; kētöre anga-aṅ ngaich nö kameunkö ök lanaklö ò.

²² Ngaich söömtö ṙô Sôl nö in Yēsī, nö ngö, Vë-ekūö meh chin, hökngen Tāvit nö sökhak nö i kūö chu; tön hāngen chin tö ò.

²³ Ngaich angū-ö hē ngam tötlöök ma-alaha aṅ im Tēv nö in Sôl, kē ök hārp ngaich Tāvit, ngaich röng nö aṅtī tö kuntīre: lööklöre alaha ngaich Sôl, ngaich lööken, ṙāngen ò ngaich ök tötlöök ma-alaha.