1 SAMUĔL 11 - TÖHET LĪPÖRE (Re-edited) Bible (BSI)

Mihôiṅ Sôl Tö Yik Aṅ Amòn

¹ Yih ngaich Nāhas aṅ Amön, ngaich iyöngtöre nö lā-al Yapeskilīöt: ṙòkhöre ṙô ngaich yik tarik aṅ Yapes nö ngö ṙô tö Nāhas Vītö kinlēḵngô man in ih, ngaich īhö min kūön alaha meh.

² Ngö ṙô ngaich Nāhas tö cha tö aṅ Amön, Ngih ön min tī chu vīten e in yīö, ṙòkhöre nup lāhāmö mat yīö nö piôknyu, ngaich chū-ö min ṙāten e nö minṙēngö in yip Israĕl nö ṙòkhöre.

³ Ngö ṙô ngaich yik mā-aṅ Yapes tö ò, Kētö ṙētak ih man sat sumkam, hòṅ ih tīnngö ma-ahāngö i kūöngö panam Israĕl nö ṙòkhöre: ngaich yĕn öt hĕng tak min mahayööken ih, kunyī-inyre ngaich īhö min in meh.

⁴ Yih ngaich yik ma-ahānga nö i Kīpīa in Sôl, ngaich ṙô tö në ṙô nö el nang yik tarik: ṙòkhöre ngaich yik tarik nö ayôṙa, ngaich peuiny.

⁵ Yih ngaich Sôl nö ṙā-ang el panô-òṅ; nö tömrit nuk kōiny nuā ngö ṙô ngaich Sôl, Asuh ap halöiny yip tarik töp lökten cha nö peuiny? Vë-eny nang ò ngaich cha-a tö nuk ṙô yik tarik aṅ Yapes.

⁶ Kalē-ĕ yanīhih ngaich ngam ma-alaha aṅ im Tēv nö in Sôl hē ò nö hang nuk ṙô, hūlökūö ngaich ök tanānyö ò nö kiröng.

⁷ Hĕng tahôl kahë ngaich anga-aṅ tö tamūök inröl kōiny nuā, tālö u ngaich nö pinyënyö u, söömngen u ngaich nö keuheūt kūöngö panam Israĕl lökten eltī yik ma-ahānga, nö ngö ṙô, Öp töt yamih nö tömrit Sôl tömrit samu-ĕl inrē, ngatī inlinken min nup kōiny nuā ò. Fuk in yik tarik ngaich ök pinhë-eṅkūö tö ngam Mā Tēv, kunyī-inyre cha-a ngaich sā tarik töng hĕng tak.

⁸ Kaheūkö cha ngaich anga-aṅ nö i Pīsek; lūöyòng köṅny ngaich yik kūön Israĕl, lūöi anāi köṅny inrē yik tarik Yūtā.

⁹ Ngö ṙô cha-a ngaich tö yik ma-ahānga yamih, Ngö ṙô yin tö yip tarik aṅ Yapeskilīöt, Ṙinānyu yin min, huṙöich, ip ṙanāchlö mat ngam tavūöi. Yih ngaich yik ma-ahānga ngaich vë-eny nang yik tarik aṅ Yapes; ṙāmölōn cha-a ngaich.

¹⁰ Lökten yik tarik aṅ Yapes nö ngö ṙô, Huṙöich in kunyī-inyre in yīö, ngaich kahanglōnre yī-ö tö tīre in ih sā öp tölöök lōn yīö.

¹¹ Ngaich im huṙöich ang Sôl nö ṙāḵ yik tarik nö lūöi kiteūmö; yihtöre cha-a ngaich nö ellōn ök elyöngö im inahati tö peuheū, fël yik aṅ Amön ngaich hanöng saha ṙanāchlö ngam sakāmö: ngaich yip tö-ōtren tö cha nö parātiyö, ngaich lökten nö öt nët tak tö cha töṙa-āyö nö holre.

¹² Ngaich ngö ṙô yik tarik tö Samu-ĕl, Achīö ap anga-aṅ tö ngö ṙô, Hayöngö hī öp min Sôl? Kētö yip tarik cha-a, hòṅ ih kumpahangvah cha.

¹³ Ngaich ngö ṙô Sôl, Öt hĕng tak min tarik tökumpahaivah i ngih sakāmö; pòn tī tö ṙinānyö Israĕl ngam Mā Tēv töngamuh.

¹⁴ Ngö ṙô ngaich Samu-ĕl tö yik tarik, Tā-a töi chuh Kilkāl, ngaich umuh tumfömlö ngam pūlngö.

¹⁵ Ṙòkhöre ngaich yik tarik nö chuh Kilkal; umuh cha-a ngaich nö vīlen Sôl nö rācha nö i kūö ngam Mā Tēv i Kilkāl; in e cha-a ngaich i kūö ngam Mā Tēv nö kētö tökētu inlāmö; in e inrē, Sôl tö yik tarik Israel nö ṙòkhöre nö pōyen ṙanāmölōn.