1 SAMUĔL 1 - TÖHET LĪPÖRE (Re-edited) Bible (BSI)

Elkānā Tö Yik Mikūönö Ò Nö I Sīloh

¹ Hĕng taka ök umuh tarik aṅ Ramatēmsōfim, ip rung panam Ifrēm, Elkānā ök minë-eny ò, kikōnyö ök kūön Yēroham, ök kikōnyö kūön Elihū, ök kikōnyö kūön Tohū, ök kikōnyö kūön Suf, aṅ Ifrēm.

² Nët tak pīhö anga-aṅ; Hëna minënyö ök töhĕng taka: Pëninah minënyö ök tahëng taka kūönu ök Pënīnah, öt kūönu pöri Hëna.

³ Ngaich anga-aṅ ngòh tarik nö ṙā-ang ip elpanamre nö kaheuk samyeūheu nö chuh Sailō nö vë-ekūötēv kētö tökētu inrē nö im Mā Tēv yip tömaṙôngö. Umuh inrē nak kikōnyö kūön Ēlī, Hōfni, Finehas inrē, kūönṙô ngam Mā Tēv.

⁴ Ngaich hē ngam sakāmö Elkānā nö kētö tökētu, nö söltakūö, kē-ĕkūö ök pīhöre anga-aṅ töminchöḵö ang Pënīnah, I yik kūön ò kikōnyö kikānö inrē:

⁵ Höng hēngö minchöḵö pöri Hëna tö tī ò: hāngenlōn pöri anga-aṅ tö Hëna löpikūö chūök kanūönö pöri anga-aṅ tö ngam Mā Tēv.

⁶ Halôpnyö kumnyahlōn ò ngaich ök Kamsālan, pòn hōten ò nö līplölōn, pò ngam Mā Tēv nö löpngökūö chūök kanūönö ò.

⁷ Kaheuk samyeūheu anga-aṅ nö ngatī, hē Hëna nö chuh el patī ngam Mā Tēv, ngaich ngatī Pënīnah nö halīplölōn ò; lökten ò nö peuiny, öt nyā inrē.

⁸ Ngaich ök pīhö ò Elkāna nö ngö ṙô tö ò, Hëna, kūöyòh öm peuiny? Kūöyòh inrē öm öt nyā? Kūöyòh öm haṙīvö ellōn? Öt mötlö öich chū-ö in meh tö tösöm tak nyīö kikōnyö?

Hëna Nāṅ Ēlī

⁹ Lökten Hëna nö choholre tö kinheūtökūö cha nö nyā nö i Sailō, tö kinheūtökūö cha inrē nö òk. Ūichhakṙen ök kūönṙô Ēli nö el ök anūchöre ik inkūp i rööntö machööḵlö ök töhet chūök ngam Mā Tēv.

¹⁰ Ngaich ang Hëna nö ik yöng miṙivlōnre, ngaich ve-ekūö ngam Mā Tēv, kalē-ĕ ṙô inrē nö peūiny.

¹¹ Ngaich chūöku ṙô anga-aṅ nö kilēḵngöṙôre, nö ngö ṙô, Ō Mā Tēv tömaṙôngö, yē meh hōḵ ngëichkö kanihngen ngòh tarik meh kikānö, fēken chu inrē, un vāchi inrē ngòh tarik meh kikānö, kē-ĕkūö ngòh tarik meh pöri kikānö tö kikōnyö nyīö, ngaich kēten ò chū-ö min im Mā Tēv i rô-òten ò nö aṅ, hö-ö öp min nö kamöpka keūyö.

¹² Ngaich hē ò nö iṙūöhö ṙô nö vë-ekuötēv nö i kūö ngam Mā Tēv, hē Ēli nö ngëichngö minlöösö minuh ò.

¹³ Löknyö ellōnre ṙô ang Hëna nö ṙô-òv; höng nup minuh ò mahalöinyköre, öt hāṅngö ṙô pöri anga-aṅ: lökten anga-aṅ tölōn Ēli nö hiyōi.

¹⁴ Ngaich Ēli nö ngö ṙô tö ò, I ṙôktöre hinyōyö ömeh? Ṙūöngö ngam vāin man nö ṙā-ang in meh.

¹⁵ Ngaich sap ṙô ang Hëna nö ngö ṙô, Hö-ö, mā chu, töhaṙīvö ellōn chin chū-ö öich kikānö: rö-ö chin taheui òk vāin öt rēhĕn òk tökalēk, vōknyö aṅ ellōnre pöri chū-ö ikūö ngam Mā Tēv.

¹⁶ Un kaheuktu ön ngòh kūön meh kikānö nö sā kikānö kūön sāṙen: tön löknyö i töpōyen miṙivlōn chin öich ve-eny miṙivlōnre.

¹⁷ Ngaich ngö ṙô Ēli nö sap ṙô ò, Kuṙòh im kumchikṙen man ngaich; kētö öp havëkö meh an yēḵ ngam Tēv Israel öp havëkö meh taheui in ò.

¹⁸ Ngaich ngö ṙô anga-aṅ, Hökngen ngòh tarikre man yēḵ nö kôtökūö tö neūkölōn nö i kūö meh. Kiröönngöre ngaich ngam kikānö, ngaich nyā, ngaich ōtren nö ikūö ò ök anūnökūö ò.

Kinyôḵnyö Samuĕl Tök Kinëhöt Ò

¹⁹ Hōklöre cha-a ngaich nö ka-euilö kūö tö peuheū, vë-ekūötēv ngaich nö i kūö ngam Mā Tēv, ngaich havanngöre, yih ngaich nö i patīre i Rāma: in ök pīhöre ngaich Elkānā ang Hëna; köpölōn ngam Mā Tēv ngaich tö ò.

²⁰ Ngaich hē ngam hē nö teungtökūö, pirūkö nyīö ngaich Hëna, ngaich kayônyö nyīö kikōnyö; ngaich kaheuk minë-eny ò anga-aṅ nö Samu-ĕl, nö ngö ṙô, Pò chu havëken ò im Mā Tēv.

²¹ Ngaich kaheuk samyeūheu ök tarik Elkānā tö yik aṅ patī ò inrē nö chuh im Mā Tēv nö kētö tökētu, inteungngö töchūöku kinlēḵngô ò inrē.

²² Hö-ö pöri Hëna nö kiröönngöre; pòn ngö ṙô anga-aṅ tök pīhöre, Hö-ö chin chū-ö hòṅ kirööngöre hanöng saha ngòh nyīö nö ṙā-aikūö nö pō, ngaich möl chū-ö min kumten ò hòṅ ò nö meūkö nö i kūö ngam Mā Tēv, ngaich urāḵngen nö höngngöh nö umuh.

²³ Ngaich ngö ṙô ök pīhö ò Elkānā tö ò, Meukköp tölöök man lōnre; höng-ngöh hanöng saha meh ṙā-angkūö ò nö pō; höng hòṅ haköpī ap ṙô im Mā Tēv. Ngaich höng ngöh ngam kikānö nö hapōḵlö ngam kūönre kikōnyö, hanöng saha ò nö ṙā-ang kūö ò nö pō.

²⁴ Ngaich hē ò nö ṙā-ang kūö ò nö pō, kē an ngaich anga-aṅ nö inre, nö hol tö nuk kōiny nuā lūöi nòng, hĕng kumvôkö ök atra, hĕng ök pilön vāin inrē ngaich kēten ò nö i Sailō nö i patī ngam Mā Tēv: ṙòngmöng nyīö ngam nyīö.

²⁵ Ṙatnyö likeun kōiny nuā cha-a ngaich, ngaich kēten ngam nyīö nö in Ēli.

²⁶ Ngaich ngö ṙô anga-aṅ, Mah, mā chu, sā ngam nômö meh nö tö-aṅ mā chu, chū-ö chin kòl misī kikānö samökhaka ihih in meh, öich ve-ekūö ngam Mā Tev.

²⁷ Ngòh ön yih nyīö havëkö chu; ngaich An ngam Mā Tēv inrē nö kē-ĕkūö chu tö ngam havëkö chu in ò:

²⁸ Lökten chin chū-ö inrē kēten ò im Mā Tēv; kētu an im Mā Tēv hanöng saha rô-òten ò nö aṅ. Salām ngam Mā Tēv ngaich cha-a nö umuh.