1 RĀCHA 3 - TÖHET LĪPÖRE (Re-edited) Bible (BSI)

Havëkö mikah re ang Sòlòmön

¹ Ngaich ang Sòlòmön nö vī kinlēḵngôre nö in Fërō ök rācha aṅ Aikup, ngaich kē ök kikānö kūön Fërō, ngaich kēten ò nö ik elpanam Tāvit, hanöng saha kinheūtö tī ò nö mānlö ök patī re, tö ök patī ngam Mā Tēv, tö ök kinlonglö Yērūsalem nö vinngö

² Höng i kui rung sin yik tarik nö kētö tökētu, pòn öl nö mānlöng patī nö i minëyö ngam Mā Tēv i nuk sakāmö anū-ö.

³ Hāngenlōn ang Sòlòmön tö ngam Mā Tēv, lök i nup chöngö Tāvit ök kikōnyö yöng ò: höng kētö tökētu anga-aṅ föng lōpān inrē nö i kui nuk rung.

⁴ Ngaich chuh Kīpiön ök rācha nö kētö tökētu nö umuh; pòn angū-ö tömarô-òl kui rung: hĕng köṅny nuk töföngö tökētu tī Sòlòmön nö el ök tahāklö.

⁵ I Kipīön ngam Mā Tēv nö meūkö tö Sòlòmön tö hatööm nö i heūvö: ngaich ngö ṙô ngam Tēv, Kē-ĕkūö meh chin min töp havëkö meh.

⁶ Ngaich ngö ṙô Sòlòmön, Hameuk tö tökiröng man ngaich neūkölōn ik tarik re Tāvit ök kikōnyö yöng chu, asā lahök ò nö i kūö meh im kanô-en, im lanöökö, i chaniplö ellōn nö in meh; ngaich më-eṅ ṙā-akūö ò tö ngih tökiröng neūkölōn, tö meh ngaich kētö kūön ò tö kikōnyö nö ūich el kantēra ò, sā e ing töngamuh.

⁷ Ngaich töngamuh Ō Mā Tēv, Tēv chu, öm vīlö ngòh tarik re nö rācha nö ṙënngen Tāvit ök kikōnyö yöng chu: ngaich pöri chū-ö höng kun nyīö; öt huveū-en chin kunyī-inyre hēk kuhēthötre.

⁸ Ngaich ngòh tarik meh vē katöllö meh, töpōyen tarik, vē töt kanṙeūken tö ṙôngö re.

⁹ Lökten man yĕh kētö mikah ellōn ngòh kūön meh nö akah tölöök tötlöök inrē; achīö ṙöng öp tökô nö akah fālen vē töpōyen tarik i ngih sakāmö?

¹⁰ Ṙāmölōn tī ngaich ngam ṙô tö ngam Mā Tēv kūö Sòlòmön nö havëken e angū-ö.

¹¹ Ngaich ngö ṙô ngam Tēv tö ò, Kūö meh havëken e angū-ö, ngaich rö-ö havëkö rô-òtö nômö re; öt rĕhĕn öm havëkö kanôlòre, öt rēhĕn öm havëkö nômö yip lā-al re; havëkö mikah elmat re pöri më-eṅ im inkaha fālen;

¹² Yĕh meuk, ngaich tī chin sā ṙô meh; yĕh meuk, kē-ĕkūö meh chin ngaich öm huveū-en ane inrē kē-ĕkūö meh tö ngam mikah ellōn; hòn öt hĕng tak tösā meh tö yik lamā urĕh tö meh, öt rēhĕn nö unôich min tö meh chamôhòlre nö tösā meh.

¹³ Kē-ĕkūö meh chin ngaich inrē tö ngam töt havëkö meh, hĕnghöre kanôlò ineū-euṅ inrē hòṅ meh öt asā-av min nö i vē rācha, i rô-òtö sakāmö meh.

¹⁴ Ngaich yē meh mīnö hōḵ lök el në talöökö chu, öm haköp në chöngö chu në inchöngten tö chu, sā ök kikōnyö yöng meh Tāvit nö lök in u, ngaich chū-ö mīnö ṙūöten në sakāmö meh.

¹⁵ Aṅhen ngaich ang Sòlòmön ngaich meūkö e, nö heūvö: yih ngaich anga-aṅ nö i Yērusalem, ngaich sökhaka nö lā kūö ök kasòng ngam kinlēḵngô ngam Mā Tēv, kētö töföngö tökētu, ane inrē kētö tökētu nö inlām, ngaich vī tökiröngen nyā-aṅkūö yik tarik ò.

Kahòkken Tö Kihngen Fālen Ang Sòlòmön

¹⁶ Ngaich yih nak tönët tak kikānö nö ik rācha, nak mī-inyihköre ngaich söklöre nö i kūö ò.

¹⁷ Ngö ṙô ngaich ök hĕng tak kikānö, Ō mā chu mī-iyöng ël töhĕng an patī āyö tö ngòh kikānö, kayôḵnyö kūön re chū-ö el ngampatī öich holtöṙah ò.

¹⁸ Ngaich ngö inlahen im linūöyö sakāmö urôichrit chu kayôḵ, ngaich ngòh kikānö inrē nö kayôḵ ngaich holtöṙahre āyö; öthĕng tak aṅ tahëng in ai el ap patī höng āyö nët taka el ap patī.

¹⁹ Ngaich kapah ök kūön ngòh kikānö tö hatööm; pò ò nö taṙam tö kui ò.

²⁰ Ngaich chōholre anga-aṅ tö chūölhatööm, ngaich kēngö ök kūön chu kikōnyö nö ṙā-ang in chu, i saha ngòh tarik meh kikānö nö haṙòh, ngaich haṙōlngen ò nö lākūö re, ngaich haṙōltö ök tökapah kūönre nö i kūö chu.

²¹ Ngaich hē chu chōholre im peuheū öich hapō ap kūön re, yĕh meuk, kapah anga-aṅ: ngaich hē chu ngëichken ò im peuheū, yĕh meuk, ngaich rö-ö anga-aṅ nö ngam kikōnyö kūön chu, ök kayôḵnyö chu.

²² Ngaich ngö ṙô ök tahëng kikānö, Hö-ö, kūön chu an ngam kikōnyö tö-aṅ, kūön meh ngam kikōnyö tökapah, ngaich ngö ṙô anga-aṅ, Hö-ö; ngam tökapah an kūön meh kikōnyö, kūön chu an nö kikōnyö ngam tö-aṅ. Ngatī ṙô cha-a nö i kūö ök rācha.

²³ Ngaich ngö ṙô ök rācha, Hĕng tak ngam tö ngö ṙô, kūön chu an ngam tö-aṅ kikōnyö, kūön meh ngam tökapah kikōnyö: ngö ṙô ök tahëng, Hö-ö; tön kūön meh an ngam kikōnyö tökapah, kūön chu an ngam tö-aṅ kikōnyö.

²⁴ Ngaich ngö ṙô ök rācha, Kētö tachôi fël in chu. Ngaich cha-a nö hĕng nòng kahëti tö tachôi fël nö i kūö ök rācha.

²⁵ Ngaich ngö ṙô ök rācha, Michööḵ ngam tö-aṅ nyīö nö nët tit, hĕng tāk kahëti in ngam töhĕng tak, hĕng tāk inrē imtahëng.

²⁶ Ngaich ngö ṙô ök kikānö tök rācha ök tökūönu tök tö-aṅ, kūö ò nö haṙivlōn tök kūön re kikōnyö, ngaich ngö ṙô anga-aṅ, Ō mā chu, kētöm tö-aṅ nyīö in ò, uh an nö fëli. Ngö ṙô pöri ngam tahëng, öt rēhĕn an min nö kūön chu öt rēhĕn nö kūön meh; haròngten ò.

²⁷ Ngaich ngö ṙô ngam rācha nö sap ṙô, Kē-ĕ kūö ngam mu-urĕh yöngnyīö töm tö-aṅ nyīö, uh an nö fëli: anga-aṅ an yöng ò.

²⁸ Ngaich ṙòkhöre yik aṅ Israĕl nö hang ök inkaha fālen tök rācha: pa-ekūö ngaich cha-a tök rācha: pò cha nö meuk tö ngam mikah ngam Tēv nö in ò nö akah fālen.