1 RĀCHA 2 - TÖHET LĪPÖRE (Re-edited) Bible (BSI)

Manā-aṅ Ṙô Tāvit Nö Vë-ekūö Sòlòmön

¹ Röhta ngaich nuk sakamö hē Tāvit nö kapah: ngaich ngö ṙô anga-aṅ nö tölṙô ap kikōnyö kūönre Sòlòmön.

² Kiröönngöre chin el talöökö taṙòkhöre aṅ ngih panam: lökten man hangëḵeṅre, hameuktöre öm sātarik:

³ Haköp chöngö ngam mā Tēv ngam Tēv meh, lök ël nup talöökö ò, haköp nup chöngö ò nup hachöngten ò inrē, nup inkaha fālen aṅ in ò inrē nup inmeuktö kanô-en inrē nö sā ap tökūichi im chöngö Môsös, hòṅ meh huveū-en i nup taṙòkhöre vahīṙen meh ip töng lā-a kūö meh inrē havöökūöre:

⁴ Hòṅ ngam Mā Tēv nö haköpngö ngam ṙô re ngam ṙô ò tö inlahen chu nö ngö ṙô, Yē yip kūön meh min nö haṙēmngenre nö el talöököre, nö lök i kūö chu nö kô-en holtö ellōnre höltö nômöre inrē, öthō nö rööḵngöre tarik min nö in meh, tö ṙô ò nö el kantēra Israel.

⁵ Akahalōn man inrē tö tī Yô-ap nö in chu öp kikōnyö kūön Sērūyā, tö tī ò inrē nö in nap tönët tak yöngkūö kumyung aṅ Israĕl, tö Apnör öp kikōnyö kūön Nör, tö Amāsā inrē öp kikōnyö kūön Yētör, nak famëlngen ò, nö kiktaknyö mahām hē el töt kinyūngö, ngaich hamāichtö mahām kinyūngö nö ik inmöpṙatre ök i ṙat ò, i nuk kunröpö ò inrē mī-i röön ò.

⁶ Kētöre man ngaich lökten sā ap mikah meh, un hökiṙen nup pakūkui ò nö chuh el anūlö nö im kumchikṙen.

⁷ Hameuktö miṙēlōn re pöri in yip kikōnyö kūön Pārsilāi öp aṅ Kilīöt, hökngen cha nö nyamā nö el mīs meh: pò cha nö yihtöre nö in chu hē chu pāngö töp mëm meh Apsalem.

⁸ Yĕh meuk, in meh ap umuh Sīmei kikōnyö kūön Kērā, aṅ Penyamin, ap i Pahūrim, ap ramūtngö vah chu tö töchōich öt linëkô ik sakāmö angū-ö hē chu chuh Mahanēm: yih pöri anga-aṅ nö höngkūö chu nö i Yôtön, ngaich chūöku ṙô chū-ö im Mā Tēv kilēḵngôre in ò, öich ngö ṙô, Hö-ö chin hōḵ aṅtī tö sanët kumpahangvah meh.

⁹ Lökten uh ap nö töt fāluṙen tö tī meh, tön tö-akaha man öm tarik; akahalōn man min töp tī re in ò, kētö nup pakūkui ò man el anūlö nö holtö mahām.

Kapah Ngaich Ang Tāvit

¹⁰ Haṙòh ngaich Tāvit nö in yik yöng re, ngaich lāpi nö elpanam Tāvit.

¹¹ Në nun sakāmö Tāvit nö hayöng nö i kui Israĕl fën anāi samyeūheu; sat samyeūheu anga-aṅ nö hayöng nö i Hepròn, lūöi anāi lūöi samyeūhue nö hayöng nö i Yērusalem.

¹² Ūichhak ngaich Sòlòmön nö el kantēra ök yöng re Tāvit; ngaich ök pūlngö ò nö haköpi.

Kinröönngö Apiātār Ngaich Kinpāha Yôap.

¹³ Ngaich Atōnīyā ök kikōnyö kūön Hakit nö yih nö in Petsīpā kikānö yöng Sòlòmön. Ngaich ngö ṙô anga-aṅ, Lāmö röön öm yih? Ngö ṙô ngaich anga-aṅ, Lāmö röön chin.

¹⁴ Ngö ṙô inrē anga-aṅ Rahëichyen ap ṙô chu in meh. Ngaich ngö ṙô anga-aṅ, Yĕh ṙô-òv.

¹⁵ Ngö ṙô ngaich anga-aṅ, Akahalōn man tö ngam pūlngö nö chū-ö chu, ṙòkhöre inrē yip aṅ Israĕl nö lā in chu kūö, öich hōtu hayöngö: ngaich pöri ngam pūlngö nö havēṙi kūö, kētöre an nö ngaich nö pūlngö ap kahëm chu: pò e nö amin ò nö ṙeū-eung im Mā Tēv.

¹⁶ Ngaich chin pöchö hēngö havëka in meh, uich rö-öv el nang. Ngö ṙô ngaich anga-aṅ tö ò, Yĕh rô-òv.

¹⁷ Ngaich ngö ṙô anga-aṅ, Vë-ekūö meh chin, öm vë-ekūö ap rācha Sòlòmön, (tön öthō ap min nö rö-öv ṙô nö in meh), hòṅ ò nö kēten Apīsak nö in chu nö pīhö chu ap aṅ Sunam.

¹⁸ Ngö ṙô ngaich ang Petsīpā, Hôṅ yĕh ngaich; ṙônyö ṙô meh chin min ip rācha.

¹⁹ Lökten ang petsīpā nö chuh ik rācha Sòlòmön, nö ṙônyö ṙô Atōnīyā nö in ò. Choholre ngaich ök rācha Sòlòmön, nö ṙônyö ṙô Atōnīyā nö in ò. Choholre ngaich ök rācha nö höngkūö ò, Sōnngöre ngaich nö in ò, ūichngöre ngaich nö el kantēra, ngaich hōtö töhĕng kantēra nö ṙātu nö kantēra ök kikānö yöng ök rācha; ūichngöre ngaich anga-aṅ nö lāhāmö ò.

²⁰ Ngö ṙô ngaich anga-aṅ, Hĕng öp kun havëkö chu in meh; uich rö-öv el nang. Ngö ṙô ngaich ök rācha tö ò, Kayöngö iṙūöhö ṙô töp havëköre: tön öthō chin rö-öv ṙô tö meh.

²¹ Ngö ṙô ngaich anga-aṅ, hök-ngen Apīsak man yĕh öp aṅ Sunam nö kētu nö pīhö Atōnīyā ap mëm meh.

²² Ngö ṙô ngaich ök rācha Sòlòmön nö sap ṙô ök yöng re kikānö, Kūöyòh öm havëken Apīsak öp aṅ Sunam nö pīhö Atōnīyā? Havëkö ngam pūlngö man yĕh inrē nö pūlngö ò tön maṙöinylö ap nö mëm chu; chööḵnyöten tö ò yĕh chööḵnyöten tö Apīatör inrē ap kūönṙô, chööḵnyöten tö Yô-ap inrē kikōnyö kūön Serūyā.

²³ Chūöku ṙô ngaich ök rācha Sòlòmön nö im Mā Tēv, nö ngö ṙò, Ngati tī An yēḵ ngam Tēv tö chu, hēk mötlö inrē, yē Atōnīyā öre nö öt ṙô-òv tö ngih ṙô nö lā-al kūö ngam nômö re.

²⁴ Lökten sā ngam Mā Tēv nö tö-aṅ, ngam mahaköpö chu, maha-ūichlen chu inrē el kantēra ök yöng chu Tāvit, ngam vamīlö patī chu, sā ṙô ò nö kilēḵngôre, öthō ap min Atōnīyā i ngih sakāmö nö öt kumpahai vah.

²⁵ Ngaich ök rācha Sòlòmön nö tīnngen Pënayā ök kikōnyö kūön Yēhōi-ata; fëlngen ò ngaich anga-aṅ, ngaich kapah anga-aṅ.

²⁶ Ngö ṙô inrē ök rācha tö Apiātör ök kūönṙô, Chuh Anātòt man ngaich, ip taṙeūre; tön töhòṅ kumpaha man. Hö-ö pöri chū-ö hòṅ kumpaha meh töngamuh, pò meh keunkö ngam kasòng ngam Mā Tēv, öm i kūö ök yöng chu Tāvit, kūö meh inrē kihngen öm i kanihngen ök yöng chu kikōnyö.

²⁷ Ha-ōnyu ngaich Apiātör tö Sòlòmön nö öt kūönṙô ngam Mā Tēv; hòṅ ò nö keuheūtngen ngam ṙô ngam Mā Tēv, ngam ṙô ò nö i patī Eli nö i Sailō.

²⁸ Sölta ngaich ngam hināngö e nö in Yô-ap: pò Yô-ap nö havöötöre nö tömrit Atōnīyā, pòrô sin nö öt havöötöre nö tömrit Apsalem. Falngöre ngaich Yôap nö ik inrūkui ngam Mā Tēv, kiṙapngö tīre ngaich anga-aṅ nö i nuk sinrōl ök tahāklö.

²⁹ Vënyu ngaich angū-ö nö ik rācha Sòlòmön, tö Yô-ap nö faltöre nö ik inrūkui ngam Mā Tēv, yĕh meuk, ip tahāklö apa, tīnngen Pënayā ngaich ang Sòlòmön ök kikōnyö kūön Yēhōiata, nö ngö ṙô, Kuṙòh fëlngen ò.

³⁰ Yihtöre ngaich Pënayā nö el inrūkui ngam Mā Tēv, ngaich ngö ṙô tö ò, Ngö ṙô ap rācha, Tā-a, kunyī-inyre man. Ngö ṙô ngaich anga-aṅ, Hö-ö; höng hòṅ ihih chin kapah. Kumtö ṙô ngaich Pënayā nö hēk nö ik rācha, nö ngö ṙô, Ngö ṙô ap taheui Yô-ap, ngö ṙô inrē anga-aṅ nö sapṙô chu.

³¹ Ngö ṙô ngaich ök rācha tö ò, Tinī-iv man ngaich sā ṙô ò, kumpāhan, lāpngen ò ngaich; hòṅ meh kēngö ök mahām, ök tö kitaknyu tö Yô-ap nöng öt chööḵnyu ṙā-ang in chu ṙā-ang patī ap yöng chu inrē.

³² Havantu an min ngam mahām ò nö i kui ò, pò ò nö Fëlngö nak tönët tak tarik tömötlö lanöökö tö ēhten inrē tö ò, ngaich fëlngen cha nö aṅtī tö sanët, öt akahalōn ök yöng chu Tāvit tö e, nā Apnör ök kikōnyö kūön Nör, yöngkūö kumyung aṅ Israĕl, Amāsā inrē ök kikōnyö kūön Yētar, yöngkūö kumyung aṅ Yūtā.

³³ Hòṅ nuk mahām cha nö havantöre nö i kui Yô-ap, i kui yip kūön inrē nöng örheūheu: in Tāvit pöri, ip kūön ò inrē, i patī ò, el kantēra ò inrē ngam lanāmö min nöng örheūheu nö ṙeū-eung im Mā Tēv.

³⁴ Kiröönngöre ngaich Pënayā ök kikōnyö kūön Yēhōiata, fëlngen ò ngaich, nö kapahatī tö ò; lāpi ngaich anga-aṅ nö el ök patī re eltönyalnyi.

³⁵ Ngaich ök rācha nö ṙāten Pënayā ök kikōnyö kūön Yēhōiata nö i kui yik kumyung i chūök ò: ṙātu inrē Sētòk ök kūönṙô tök rācha nö i chūök Apiātör.

Kapah Ngaich ang Simëi

³⁶ Tīnngö mahavëken Sīmëi ngaich ök rācha, ngaich ngö ṙô tö ò, Mānlö patīre man i Yērusalem, ngaich iyöng umuh, umkū-övö ṙā-ang in e.

³⁷ Tön ip sakamö hē meh kiröönngöre, öm havāngngö kui ngam töhëm mak Kitròn, akahalōn man tö meh öthō min öt kapah; i kui meh min ap mahām meh.

³⁸ Ngaich ngö ṙô Simëi tök rācha, Tövai an ngam ṙô: sā ṙô ngam mā chu nö ngaich ngam rācha, ngatī inlahen min ngòh tarik meh. Ṙōl sumkam ngaich Simēi nö iyöng Yērusalem.

³⁹ Ngaich hē kinheūten tölūöi samyeūheu, falngöre nak tarik Sīmëi nët tak nö chuh in Akis, ök kikōnyö kūön Mēakah; rācha aṅ Kāt. Ngö ṙô cha-a nö vë-eny nang Sīmëi, Yĕh meuk, i Kāt nap tarik meh.

⁴⁰ Choholre ngaich ang Sīmëi, ngaich hanāmlö uk ök köttö re, kiröönngöre ngaich nö chuh Kāt, nö in Akis, nö chöh nak tarik re: kiröönngöre ngaich Sīmëi, ngaich kumtö nak tarik re nö ṙā-ang Kāt.

⁴¹ Vënyu ngaich angū-ö nö in Sòlòmön, tö Sīmëi nö kiröönngöre nö ṙā-ang Yērusalem nö chuh Kāt, ngaich yih nö hēk.

⁴² Tīnngö mahavëten Sīmëi ngaich ök rācha, ngö ṙô tö ò. Röh öichu hōten meh chūöku ṙô im Mā Tēv, öich ngö ṙô ngālnyi ṙô in meh, Köpölōn man, tö meh min kô-en kumpahaivah ip sakāmö meh kiröönngöre, öm maṙô-òl kūö ip kū-öre? Tölöök an ngam ṙô ngam töhāngö tö chu.

⁴³ Kūöyòh öm pökeh öt haköp ngam töchūöku ṙô im Mā Tēv, ngam chöngö chu inrē tinöölô meh tö chu?

⁴⁴ Ngö ṙô inrē ngam rācha tö Sīmëi, Akahalōn man tap ötlanöökö töhayunka nö ellōn meh, öp tī meh ik yöng chu Tāvit: lökten an ngam Mā Tēv nö havan tö ngam öt lanöökö meh nö el kui meh.

⁴⁵ Hòṅ ngam rācha Sòlòmön min nö tölöök ngam kantēra Tāvit min inrē nö haköpi nö i kūö ngam Mā Tēv nö tö örheūheu.

⁴⁶ Lökten ngam rācha nö tölṙô Pënāya ök kikōnyö kūön Yēhōiata; kunyī-inyre anga-aṅ ngaich, ngaich fëlngen ò, kapah ngaich anga-aṅ. Köp ngaich ngam pūlngö nö eltī Sòlòmön.