Sòm 95 - Bib Sen An: Kreyòl Ayisyen

¹ O vini, annou chante a SENYÈ a! Annou rele fò avèk jwa a wòch ki sove nou an;

² Annou vini devan prezans Li avèk remèsiman, Annou rele fò a Li menm avèk sòm.

³ Paske SENYÈ a se yon gran Bondye, e yon gran wa pi wo ke tout dye yo.

⁴ Nan men Sila pwofondè latè yo ye a. Pwent mòn yo osi se pou Li.

⁵ Lanmè a se pou Li, paske se te Li menm ki te fè l. Ak men L, Li te fòme tè sèch la.

⁶ Vini, annou fè adorasyon, e annou pwostène. Annou mete ajenou devan SENYÈ ki te fè nou an.

⁷ Paske se Li menm ki Bondye nou an. Nou se moun patiraj Li ak mouton men Li yo. Jodi a, si nou ta vle tande vwa L,

⁸ pa fè kè nou vin di tankou nan Meriba, tankou nan jou a Massa nan dezè yo,

⁹ “lè papa zansèt nou yo te pase M a leprèv. Yo te tante Mwen, malgre yo te deja wè zèv Mwen yo.

¹⁰ Pandan karantan, Mwen te rayi jenerasyon sila a e te di: “Yo se yon pèp ki egare nan kè yo. Yo pa rekonèt chemen Mwen yo.”

¹¹ Akoz sa, Mwen te sèmante nan kòlè Mwen, “Anverite, yo p ap antre nan repo Mwen an.”