Sòm 8 - Bib Sen An: Kreyòl Ayisyen

Yon sòm David.

¹ O SENYÈ, Senyè nou an, A la non Ou gran sou tout latè! Ou te fè parèt klè mayifisans Ou piwo pase syèl yo!

² Soti nan bouch a ti bebe ki fenk fèt yo, ak timoun k ap tete yo, Ou te etabli pwisans Ou, akoz advèsè Ou yo, pou fè lènmi an avèk vanjè a sispann.

³ Lè m reflechi sou syèl Ou yo, zèv men Ou yo, lalin ak zetwal ke Ou te fè yo,

⁴ Kisa lòm nan ye, pou Ou reflechi sou li? Oswa fis a lòm nan, pou Ou pran swen li?

⁵ Malgre, Ou te fè li yon ti kras pi ba pase Bondye, e te kouwone li ak glwa avèk lonè!

⁶ Ou fè li regne sou zèv men Ou yo. Ou te mete tout bagay anba pye li:

⁷ Tout mouton yo ak bèf yo, avèk bèt sovaj nan chan,

⁸ zwazo nan syèl yo, avèk pwason lanmè yo, ak tout sa ki pase nan chemen lanmè yo.

⁹ O SENYÈ, mèt nou an, a la non Ou gran sou tout latè a.