Sòm 76 - Bib Sen An: Kreyòl Ayisyen

Yon Sòm Asaph, yon Chanson

¹ Bondye byen rekonèt nan Juda. Non Li gran an Israël.

² Tabènak Li a nan Salem. Abitasyon Li an osi nan Sion.

³ La, Li te kase flèch dife yo, boukliye ak nepe ak zam lagè yo.

⁴ Ou manyifik, pi majeste pase mòn ak bèt lachas yo.

⁵ Sila ak gran kouraj yo te piyaje, yo te fonse tonbe nan dòmi mò a. Okenn nan gèrye yo ka sèvi men yo.

⁶ Nan repwòch Ou, O Bondye Jacob, ni chevalye yo ak cheval la te tonbe nan yon pwofon somèy.

⁷ Ou menm, Ou merite lakrent. Se kilès ki kab kanpe nan prezans Ou lè Ou fache?

⁸ Ou te fè jijman tande soti nan syèl la. Latè te krent, e te kanpe rete an plas

⁹ lè Bondye te leve nan jijman an, pou sove tout enb sou latè yo. Tan

¹⁰ Paske kòlè a lòm va bay Ou glwa. Se retay kòlè pa W, ki sispann fè mal.

¹¹ Fè ve Ou yo a SENYÈ a, Bondye Ou a e akonpli yo. Kite tout sila ki antoure Li yo mennen don a Sila ki merite lakrent lan.

¹² Li va koupe retire nanm a prens yo. Wa latè yo gen lakrent Li.