Sòm 67 - Bib Sen An: Kreyòl Ayisyen

Pou direktè koral la; avèk enstriman ak kòd yo. Yon Sòm; Yon Chan

¹ Ke Bondye ka fè nou gras, beni nou e fè vizaj Li vin klere sou nou——

² Ke chemen Ou kapab byen koni sou tè a, ak sali Ou pami tout nasyon yo.

³ Kite pèp yo louwe Ou, O Bondye. Kite tout pèp yo louwe Ou.

⁴ Kite nasyon yo fè kè kontan e chante ak jwa, paske Ou va jije pèp yo avèk ladwati e gide nasyon yo sou tè a. Tan

⁵ Kite pèp yo louwe Ou, O Bondye. Kite tout pèp yo louwe Ou.

⁶ Latè te bay pwodwi li. Bondye, Bondye pa nou an, ap toujou beni nou.

⁷ Bondye ap toujou beni nou. Dènye pwent latè a va gen lakrent Li.