Sòm 64 - Bib Sen An: Kreyòl Ayisyen

Pou direktè koral la. Yon Sòm David.

¹ Tande vwa m, O Bondye nan plent mwen an. Konsève lavi m kont laperèz lènmi an.

² Pwoteje m kont konsèy sekrè a malfektè yo, kont boulvèsman a sila ki fè mechanste yo.

³ Ki te file lang yo tankou nepe. Yo te pwente flèch pawòl anmè yo,

⁴ pou tire an kachèt sou sila ki inosan yo. Sibitman yo tire sou li, san lakrent.

⁵ Yo kenbe fèm a pwòp desen mechan yo. Yo pale sou pyèj ke y ap fòme an sekrè yo. Yo di: “Se kilès ki kab wè yo?”

⁶ Yo fè manèv pou enjistis e di: “Nou prè pou yon konplo byen fòme”. Paske panse lenteryè a moun se byen fon.

⁷ Men Bondye va tire sou yo avèk yon flèch. Sibitman, yo va blese.

⁸ Konsa, yo va chape tonbe. Pwòp lang pa yo va kont yo. Tout moun ki wè yo va souke tèt yo.

⁹ Nan moman sa a, tout moun va krent. Konsa, yo va deklare zèv Bondye yo. Ak sajès yo va konsidere sa Li te fè a.

¹⁰ Nonm ladwati a va kontan nan SENYÈ a! Yo va pran refij nan Li, epi tout moun dwat yo va fè kè kontan.