Sòm 52 - Bib Sen An: Kreyòl Ayisyen

Pou direktè koral la. Yon Sòm David, lè Doeg, Edomit lan te vin di Saül “David gen tan rive lakay Achimélic.”

¹ Poukisa ou ògeye nan mechanste ou, O lòm pwisan? Lanmou dous Bondye a dire tout lajounen.

² Lang ou envante destriksyon, tankou yon razwa ki file, plen desepsyon.

³ Ou renmen mechanste plis pase sa ki bon. Fo bagay plis pase pale verite a.

⁴ Ou renmen tout pawòl ki devore, yon lang mantè.

⁵ Men Bondye va kase fè ou desann nèt; Li va kenbe ou byen vit e chire fè ou sòti nan tant ou an, Epi dechouke fè ou sòti nan peyi vivan yo. Tan

⁶ Moun dwat yo va wè, va gen lakrent; yo va ri sou li epi di:

⁷ “Gade byen, men nonm ki refize pran refij nan Bondye a, men ki te mete konfyans nan abondans richès li yo. Li te ranfòse tèt li ak mechanste.”

⁸ Men pou mwen menm, mwen tankou yon pye doliv vèt lakay Bondye. Mwen mete konfyans mwen nan lanmou dous Bondye a pou tout tan e pou tout tan.

⁹ Mwen va bay Ou remèsiman pou tout tan, paske Ou te fè sa. Mwen va mete espwa nan non Ou, paske sa bon nan prezans a fidèl Ou yo.