Sòm 26 - Bib Sen An: Kreyòl Ayisyen

Yon sòm David

¹ Fè m jistis, O SENYÈ, paske mwen te mache nan entegrite mwen. Mwen te mete konfyans mwen nan SENYÈ a san varye.

² Chache anndan m, O SENYÈ, e pase mwen a leprèv. Sonde panse mwen avèk kè m.

³ Paske lanmou dous Ou a devan zye m. Mwen te mache nan verite Ou.

⁴ Mwen pa chita avèk mesye k ap twonpe moun yo. Ni mwen pa pale avèk sila k ap pran poz yo.

⁵ Mwen rayi asanble malfektè yo, e mwen pa chita avèk mechan yo.

⁶ Mwen va lave men m nan inosans, e mwen va antoure lotèl Ou, O SENYÈ,

⁷ pou m kapab pwoklame avèk vwa remèsiman a, e deklare tout mèvèy Ou yo.

⁸ O SENYÈ, Mwen renmen abitasyon lakay Ou, avèk kote ke glwa Ou rete a.

⁹ Pa retire nanm mwen ansanm avèk pechè yo, ni lavi m avèk mesye ki vèse san yo,

¹⁰ nan men a sila ki gen manèv mechan yo, ki nan mechanste pote kado vèse anba tab yo.

¹¹ Men pou mwen, mwen va mache nan entegrite mwen. Delivre mwen e fè m gras.

¹² Pye m kanpe sou yon plas byen plat. Nan asanble a, mwen va beni SENYÈ a.