Sòm 19 - Bib Sen An: Kreyòl Ayisyen

Pou direktè koral la; yon sòm David

¹ Syèl yo ap pale glwa Bondye a. Jan yo tèlman gran deklare zèv men Li yo.

² Jou apre jou, l ap pale san rete; Nwit apre nwit, li revele konesans.

³ Nanpwen langaj, ni pa gen pawòl kote nou pa tande vwa yo.

⁴ Sepandan, eko yo retanti sou tout latè, ak sa yo pale jis nan ekstremite latè a. Nan mitan yo, Li te plase yon tant pou solèy la,

⁵ ki tankou yon jennonm ki fenk marye k ap sòti nan chanm li. Li rejwi kon yon nonm fò k ap fè kous.

⁶ Li leve soti nan yon pwent syèl, pou fè wonn li rive jis nan lòt pwent lan. Anyen pa chape devan chalè li.

⁷ Lalwa SENYÈ a pafè Li rekonfòte nanm. Temwayaj SENYÈ a vrè, k ap fè saj yo senp.

⁸ Prensip a SENYÈ yo dwat, ki fè kè rejwi. Kòmandman SENYÈ a san tach. Li fè zye yo limen.

⁹ Lakrent SENYÈ a pi; Li dire jis pou tout tan. Jijman yo SENYÈ a vrè; Yo jis san manke.

¹⁰ Yo pi chè pase lò, wi, pase anpil lò fen. Yo pi dous pase myèl, pase siwo a ki tonbe nan gato myèl la.

¹¹ Anplis, se pa yo menm ke sèvitè Ou a resevwa avètisman pou fè atansyon. Pou sila ki kenbe yo, gen gran rekonpans.

¹² Se kilès ki kab rekonèt fot li? Padone mwen pou fot ke m pa konnen yo.

¹³ Anplis, pwoteje sèvitè ou a kont peche ògèy yo. Pa kite yo vin domine m. Konsa, mwen kab rete san fot, epi va inosan a gran peche.

¹⁴ Kite pawòl bouch mwen a avèk refleksyon kè m vin akseptab devan zye Ou, O SENYÈ, wòch mwen, ak sovè mwen an.