Sòm 149 - Bib Sen An: Kreyòl Ayisyen

¹ Louwe SENYÈ a! Chante a SENYÈ a yon chan tounèf, avèk lwanj Li nan asanble fidèl Li yo.

² Kite Israël fè kè kontan nan Kreyatè li a. Kite fis a Sion yo rejwi nan Wa yo a.

³ Kite yo louwe non Li avèk dans! Kite yo chante lwanj a Li avèk tanbouren ak gita.

⁴ Paske SENYÈ a pran plezi nan pèp Li a. Li va anbeli enb yo avèk sali Li.

⁵ Kite fidèl yo leve wo nan glwa. Kite yo chante ak lajwa sou kabann yo.

⁶ Ke gwo lwanj a Bondye yo kapab nan bouch yo, ak yon nepe file de bò nan men yo,

⁷ pou fè vanjans sou nasyon yo, avèk pinisyon sou lòt pèp yo;

⁸ pou mare wa yo ak chenn, ak moun pwisan yo nan gwo chenn an fè,

⁹ pou egzekite sou yo jijman ki te ekri a. Sa se lonè de tout fidèl Li yo. Louwe SENYÈ a!