Sòm 146 - Bib Sen An: Kreyòl Ayisyen

¹ Beni SENYÈ a! Beni SENYÈ a, O nanm mwen!

² Mwen va beni SENYÈ a pandan mwen ap viv. Mwen va chante lwanj a Bondye pa mwen an pandan mwen sou latè a.

³ Pa mete konfyans nan prens yo. Nan lòm mòtèl, nan sila nanpwen Sali a.

⁴ Lespri li pa rete; li retounen nan tè a. Nan menm jou sa a, panse li yo vin peri.

⁵ A la beni sila ki gen sekou nan Bondye Jacob la beni, sila ki mete espwa li nan SENYÈ a, Bondye li a,

⁶ Ki te fè syèl la avèk tè a, lanmè ak tout sa ki ladann. Ki fidèl jis pou tout tan.

⁷ Ki egzekite jistis pou oprime yo. Ki bay manje a moun grangou yo. SENYÈ a mete prizonye yo an libète.

⁸ SENYÈ a ouvri zye a avèg yo. SENYÈ a leve sila ki vin pwostène yo. SENYÈ a renmen moun ladwati yo.

⁹ SENYÈ a pwoteje etranje yo. Li bay soutyen a òfelen an ak vèv la, men Li jennen wout mechan an.

¹⁰ SENYÈ a va renye jis pou tout tan, Bondye pa Ou a, O Sion, jis pou tout jenerasyon yo. Louwe SENYÈ a!