Sòm 137 - Bib Sen An: Kreyòl Ayisyen

¹ Bò rivyè a Babylone yo, se la nou te chita. Nou te kriye, lè nou te sonje Sion.

² Sou pye sikrèn nan mitan li an, nou te pandye ap nou yo.

³ Paske la, ravisè nou yo te mande nou chante pou yo, e bouwo nou yo ak gwo kè kontan, t ap di: “Chante pou nou youn nan chanson Sion yo.”

⁴ Kijan pou nou ta chante chan SENYÈ a nan yon peyi etranje?

⁵ Si mwen ta bliye ou, O Jérusalem, kite men dwat mwen bliye kapasite li.

⁶ Ke lang mwen kole rèd anlè bouch mwen, Si m pa ta sonje ou, si m pa ta leve Jérusalem wo, pi wo ke pi gwo plezi m yo.

⁷ Sonje, O SENYÈ, kont fis a Édom yo, jou a Jérusalem nan, ke yo te di: “Raze l nèt! Raze l jis rive nan fondasyon li.”

⁸ O fi a Babylone nan, Ou menm ki te devaste nou an, A la beni sila ki rekonpanse ou ak menm rekonpans ke ou te rekonpanse nou an va beni!

⁹ A la beni sila ki sezi pitit ou yo, e ki kraze yo nan wòch la va beni!