Sòm 128 - Bib Sen An: Kreyòl Ayisyen

Yon chan pou monte vè tanp lan.

¹ A la beni se tout sila ki gen lakrent SENYÈ yo, ki mache nan chemen Li yo.

² Lè ou manje nan fwi a men ou yo, ou va kontan e sa va ale byen pou ou.

³ Madanm ou ap tankou yon chan rezen ki bay anpil rezen lakay ou. Pitit ou yo va tankou plan bwa doliv ki antoure tab ou.

⁴ Gade byen, paske se konsa nonm ki krent SENYÈ a va beni.

⁵ Ke SENYÈ a beni ou depi nan Sion; ke ou wè pwosperite Jérusalem nan pandan tout jou lavi ou yo!

⁶ Wi, pou ou ka wè pitit a pitit ou yo! Ke lapè rete sou Israël!