Sòm 124 - Bib Sen An: Kreyòl Ayisyen

Yon Sòm pou monte vè tanp lan. Yon Sòm David.

¹ Si se pa t SENYÈ a ki te pou nou, kite Israël di koulye a,

² Si se pa t SENYÈ a ki te pou nou, lè lezòm te leve kont nou yo,

³ Alò, yo t ap gen tan fin vale nou tou vivan, lè kòlè yo te limen kont nou an.

⁴ Nan lè sa a, dlo yo t ap fin anglouti nou nèt. Kouran dlo yo ta fin pase sou nanm nou.

⁵ Nan lè sa a, dlo anraje yo t ap fin pase sou nanm nou.

⁶ Beni se SENYÈ a, ki pa t livre nou pou chire nan dan yo.

⁷ Nanm nou gen tan fin chape tankou yon zwazo ki sòti nan pèlen a moun k ap fè lachas yo. Pèlen an fin kase e nou chape.

⁸ Sekou nou se nan non SENYÈ a, ki te fè syèl la ak tè a.