Sòm 121 - Bib Sen An: Kreyòl Ayisyen

Yon Sòm pou monte vè tanp lan

¹ Mwen leve zye m vè mòn yo. Se kibò sekou mwen va sòti?

² Sekou m sòti nan SENYÈ a, ki te fè syèl la ak tè a.

³ Li p ap kite pye ou chape. Sila ki kenbe ou a p ap kabicha, ni dòmi.

⁴ Gade byen, Sila ki kenbe Israël p ap kabicha, ni Li p ap dòmi.

⁵ SENYÈ a se gadyen ou. SENYÈ a se lonbraj a men dwat ou.

⁶ Solèy p ap frape ou lajounen, ni lalin pandan lannwit.

⁷ SENYÈ a va pwoteje ou de tout mal. Li va kenbe nanm ou.

⁸ Li va pwoteje ou lè ou sòti ak lè ou antre, depi nan moman sa a e jis rive pou tout tan.