Sòm 12 - Bib Sen An: Kreyòl Ayisyen

Yon sòm David.

¹ Sekou, SENYÈ, paske moun ladwati yo sispann egziste, Paske fidèl yo vin disparèt pami fis a lòm yo.

² Yo pale sa ki fo a youn lòt. Lèv flatè yo ak kè doub yo pale.

³ Ke SENYÈ a vin koupe tout lèv flatè yo, ak lang ki pale gwo bagay yo;

⁴ ki te di: “Avèk lang nou, nou va reyisi. Lèv nou se pou nou. Se kilès ki kab mèt sou nou?”

⁵ “Akoz dega a aflije yo, akoz kri a malere yo, koulye a, Mwen va leve”, pale SENYÈ a; “Mwen va mete li ansekirite de sila ki maltrete l la.”

⁶ Pawòl a SENYÈ a se pawòl ki san tach; tankou ajan ki teste nan founo, rafine nan tè sèt fwa.

⁷ Ou menm, O SENYÈ, va pwoteje yo. Ou va prezève yo soti nan jenerasyon sila a jis pou tout tan.

⁸ Mechan yo pwomennen toupatou tout kote lè bagay ki lèd vin leve wo pami fis a lòm yo.