Sòm 11 - Bib Sen An: Kreyòl Ayisyen

Pou direktè koral la; yon sòm David

¹ Se nan SENYÈ a ke m kache. Kijan ou kapab di a nanm mwen: “Sove ale kon yon zwazo nan mòn ou;

² Paske, gade byen, mechan yo koube banza, Yo fè flèch yo parèt sou kòd la, pou tire nan fènwa sou sila ak kè ki dwat yo.

³ Si fondasyon yo vin detwi, se kisa moun dwat yo kab fè?”

⁴ SENYÈ a nan sen tanp Li an. SENYÈ a sou twon Li nan syèl la. Zye Li veye. Pòpyè zye Li sonde fis a lòm yo.

⁵ SENYÈ a sonde sila ki jis yo avèk sila ki mechan yo; men sila ki renmen vyolans, Li rayi nan kè L.

⁶ Sou mechan yo, Li va voye chabon cho tankou lapli; dife avèk souf avèk chabon brile va mele nan bwason yo.

⁷ Paske Bondye dwat. Li renmen ladwati. Sila ki kanpe dwat yo va wè figi Li.