Pwovèb 29 - Bib Sen An: Kreyòl Ayisyen

¹ Yon nonm ki fè tèt di apre anpil repwòch va vin kraze sibitman san remèd.

² Lè moun dwat yo vin ogmante, pèp la rejwi; men lè yon moun mechan gouvène, pèp la jemi.

³ Yon nonm ki renmen sajès fè papa l kontan; men sila ki pase tan l ak pwostitiye yo gate byen li.

⁴ Avèk jistis, wa a fè tout peyi a vin estab; men yon nonm ki aksepte kòb anba tab boulvèse li.

⁵ Yon nonm ki flate vwazen li ap ouvri filè pou pla pye li.

⁶ Pa transgresyon yon nonm mechan vin pran nan pyèj nèt; men moun dwat la va chante e rejwi.

⁷ Moun ladwati a gen kè pou dwa malere; men mechan an pa menm konprann afè sa a.

⁸ Mokè yo, fè gwo vil la pran dife; men moun saj yo kalme kòlè.

⁹ Lè yon nonm saj gen yon kont ak yon moun san konprann, moun san konprann nan anraje oswa ri, e nanpwen repo.

¹⁰ Moun k ap vèse san rayi inosan an; men moun dwat yo pwoteje lavi li.

¹¹ Moun san konprann toujou fache; men yon nonm saj kenbe tèt li anba kontwòl.

¹² Si gouvènè a prete atansyon a manti, tout minis li yo va vin mechan.

¹³ Malere a ak opresè a gen yon bagay ki sanble; se SENYÈ a ki mete limyè nan zye tou de.

¹⁴ Si yon wa jije pòv yo ak verite, twòn li va etabli jis pou tout tan.

¹⁵ Baton ak repwòch bay sajès; men timoun ki fè sa li pito a mennen wont sou manman l.

¹⁶ Lè mechan yo vin plis, transgresyon yo ogmante; men moun dwat yo va wè tonbe yo.

¹⁷ Korije fis ou e li va ba ou rekonfò; anplis, li va bay nanm ou gwo plezi.

¹⁸ Kote nanpwen vizyon, pèp la san fren; men byen kontan se sila ki kenbe lalwa a.

¹⁹ Pawòl sèl p ap ka enstwi yon esklav; paske malgre li konprann, li p ap reponn.

²⁰ Èske ou wè yon nonm ki pale vit san reflechi? Gen plis espwa pou moun fou a pase li menm.

²¹ Sila ki byen swaye esklav li depi li piti a, nan lafen, twouve yon fis.

²² Yon nonm an kòlè pwovoke konfli e yon nonm ki plen fachèz fè anpil tò.

²³ Ògèy a yon nonm va mennen li ba; men yon lespri enb va jwenn respè.

²⁴ Sila ki fè konplo ak yon volè rayi pwòp lavi li; li pran sèman an men li pa pale anyen.

²⁵ Lakrent a lòm mennen yon pèlen; men sila ki mete konfyans li nan SENYÈ a va leve wo.

²⁶ Gen anpil moun k ap chache favè a sila ki gouvène a; men lajistis pou lòm va sòti nan SENYÈ a.

²⁷ Tankou yon nonm enjis abominab a moun dwat, yon nonm ladwati abominab a mechan yo.