Pwovèb 13 - Bib Sen An: Kreyòl Ayisyen

¹ Yon fis ki saj aksepte disiplin a papa l, men yon mokè pa koute repwòch.

² Fwi pawòl la ki soti nan bouch moun se rejwisans de sa ki bon; men volonte moun infidèl se vyolans.

³ Sila ki kontwole bouch li, konsève lavi li; sila ki ouvri lèv li byen laj va detwi nèt.

⁴ Nanm a parese a anvi, e li pa jwenn; men nanm a moun dilijan an vin gra.

⁵ Yon nonm dwat rayi sa ki fo; men zak mechan yo degoutan e fè gwo wont.

⁶ Ladwati se yon pwotèj pou sila ki san fot la; men mechanste fè pechè a vin souye nèt.

⁷ Genyen moun ki pretann yo rich, men yo pa gen anyen; yon lòt pretann li malere men li gen gwo richès.

⁸ Ranson pou lavi a yon nonm rich se richès li; men malere a pa tande menas.

⁹ Limyè a moun dwat la se rejwisans; men lanp a mechan an va etenn.

¹⁰ Ògèy pa pote anyen sof ke konfli; men sajès rete ak sila ki resevwa konsèy yo.

¹¹ Richès ki sòti nan manti koule ale; men sila ki rasanble ak men li, fè l grandi.

¹² Lespwa jennen fè kè a malad; men dezi acheve a se yon pyebwa lavi.

¹³ Sila ki meprize lenstriksyon va peye fwe a; men sila ki respekte lòd yo va resevwa rekonpans li.

¹⁴ Lenstriksyon a saj yo se yon fontèn dlo lavi pou detounen pèlen lanmò a.

¹⁵ Bon konprann pwodwi favè; men chemen moun ki pa fidèl la di.

¹⁶ Tout moun ki pridan aji ak konesans; men yon moun san konprann parèt ak foli li.

¹⁷ Yon mesaje mechan tonbe nan advèsite; men sila ki pote pawòl ak bòn fwa a, pote gerizon

¹⁸ Mizè ak wont se pou sila ki manke disiplin nan; men sila ki konsidere repwòch la va onore.

¹⁹ Yon dezi ki realize se dous a nanm nan, men moun bèt pa vle kite mechanste.

²⁰ Sila ki mache ak moun saj va vin saj; men bon zanmi a moun ensanse a va soufri.

²¹ Se malè ki kouri dèyè pechè yo; men moun dwat yo va pwospere.

²² Yon bon moun va lese eritaj pou pitit pitit li; men richès a pechè yo konsève pou moun dwat yo.

²³ Gen anpil manje nan tè malere a; men li fin bale nèt akoz enjistis.

²⁴ Sila ki ralanti baton li, rayi fis li; men sila ki renmen l va ba li disiplin ak dilijans.

²⁵ Moun dwat la gen kont pou satisfè dezi li; men vant mechan an toujou gen bezwen.