Pwovèb 10 - Bib Sen An: Kreyòl Ayisyen

¹ Pwovèb a Salomon yo. Yon fis ki saj fè papa li kontan, men yon fis ki plen ak foli se yon gwo doulè pou manman l.

² Richès ranmase pa mechanste pa reyisi, men ladwati delivre soti nan lanmò.

³ SENYÈ a p ap kite moun ladwati yo grangou, men l ap rejte lanvi mechan an.

⁴ Malere se sila ki travay ak men lach; men lamen moun dilijan an, anrichi.

⁵ Sila ki fè rekòlt nan gran sezon an a, se yon fis ki aji ak sajès; men sila ki dòmi nan lè rekòlt la, fè gwo wont.

⁶ Benediksyon se sou tèt a moun dwat la; men bouch mechan an kache vyolans.

⁷ Memwa a moun dwat la beni; men non mechan an vin pouri.

⁸ Saj nan kè yo va resevwa lòd chèf la; men yon moun fou ki pale anpil ap pèdi.

⁹ Sila ki mache ak entegrite a, mache an sekirite; men sila ki fè wout kwochi a va vin dekouvri.

¹⁰ Sila ki bat zye a, koze pwoblèm, e moun fou a ki pale anpil, fè dega.

¹¹ Bouch a moun dwat se yon fontèn dlo lavi, men bouch a mechan an kache vyolans.

¹² Rayisman pwovoke konfli; men lanmou kouvri tout fot.

¹³ Sou lèv a moun ki konn disène, nou twouve sajès; men gen baton pou do a sila ki manke konprann nan.

¹⁴ Moun saj yo ranmase konesans; men ak bouch moun fou a, destriksyon an toupre.

¹⁵ Byen a moun rich se yon sitadèl pou li. Sa ki detwi malere a se mizè.

¹⁶ Salè a moun dwat se lavi; revni a mechan an se pinisyon.

¹⁷ Sila ki swiv enstriksyon an, sou wout lavi; men sila ki pa tande repwòch la vin egare nèt.

¹⁸ Sila ki kache rayisman an gen lèv k ap bay manti; e sila ki gaye difamasyon an se yon moun fou.

¹⁹ Lè gen anpil pawòl, transgresyon pa kab evite; men sila ki frennen lèv li gen sajès.

²⁰ Lang a moun dwat yo se tankou ajan pi chwazi a; men kè a mechan an vo piti.

²¹ Lèv a moun dwat yo fè anpil moun manje; men moun fou yo mouri akoz mank bon konprann.

²² Benediksyon SENYÈ a fè moun rich; konsa li pa mele ak chagren.

²³ Fè mal se tankou fè spò pou moun san konprann nan; e se konsa sajès la ye pou moun entèlijan an.

²⁴ Sa ke mechan an pè a, ap rive sou li; men sa ke moun dwat la vle, va vin reyisi.

²⁵ Lè toubiyon an fin pase, mechan an vin disparèt; men moun dwat la gen yon fondasyon etènèl.

²⁶ Tankou vinèg anba dan ak lafimen nan zye; se konsa parese a ye pou sila ki voye li yo.

²⁷ Lakrent SENYÈ a pwolonje lavi; men lane mechan yo va kout.

²⁸ Lespwa a moun dwat la se kè kontan; men entansyon mechan an va peri.

²⁹ Chemen Bondye a se yon sitadèl pou moun dwat yo; men destriksyon nèt pou tout ouvriye inikite yo.

³⁰ Moun ladwati a p ap janm souke; men mechan yo p ap demere nan peyi a.

³¹ Bouch a moun dwat la koule ak sajès; men lang pèvès la vin koupe.

³² Lèv a moun dwat yo fè parèt sa ki bon; men bouch a mechan an, sa ki pèvèti.