TƏ́DA 9 - Bible sar

Ndɔ̄ rāā nāā Pákə

¹ Kɔ́ɔ̄ɓē ɔr̄ najə̄ kə Moijə kem dəla loo kə́ *Sinai tə́, i kem nāā kə́ ta kəga dɔ yā ɓāl̄ ń utə̄ gō nge ń ngán *Israel gə̄ teēnəń kɔ̄ɔ́ Ejiptə ní.

² Ni-əda Moijə na: Ādə̄ ngán Israel gə̄ rāān̄ nāā *Pákə kə ndɔ̄neé.

³ Ā ī-rāāī nāā i ta loo tíbə́ tə́, kə ndɔ̄ kə́ nge ko̰ kutə gidə i sɔ́ yā nāā ń toō. Ā ī-rāāī i kə gō ń *ndū najə̄ ō, yá̰a̰ kāgə̄ ɓē ō ɔjəń ní.

⁴ Moijə əda ngán *Israel gə̄ kadə̄ rāān̄ nāā *Pákə.

⁵ Nin̄ rāān̄ nāā ní ta jī loo tíbə́ tə́, kə ndɔ̄ kə́ nge ko̰ kutə gidə i sɔ́ yā nāā kə́ ta kəga dɔ, kem dəla loo kə́ *Sinai tə́. Ngán Israel gə̄ rāān̄ yá̰á̰ ń Kɔ́ɔ̄ɓē əda Moijə ní kə gōó majə.

⁶ Banī de kə́rēý gə̄ ń ɔdən̄ rɔ̄ nīń ní asən̄ rāā pétə́ *Pákə ndɔ̄ ń noō tə́ alé, tɔdɔ̄ majaĺ tákə̄də́. Ndɔ̄ nəkɔ́ ń noō tə́ nin̄ ədan̄ Moijə nin̄ kə *Aaro̰ na:

⁷ J-ɔdə rɔ̄ nīń adə̄ majaĺ tákə̄jí, ba i tām̄ rí tə́ á ɔgə̄n̄jí ndējə̄ Kɔ́ɔ̄ɓē yá̰a̰ tītə̄ yā gotə ngán *Israel gə̄ kə ndɔ̄neé ní?

⁸ Moijə tél ədadə́ na: Ī-ngóōī ādə̄ m-ōō najə̄ ń Kɔ́ɔ̄ɓē a əda dɔsí tə́ ní pá tá.

^9-10 Kɔ́ɔ̄ɓē mēr̄ Moijə kəda ngán Israel gə̄ na: Najə̄ ń toō i tām̄ yāsí tə́ ō, tām̄ yā ngáńsí gə̄ tə́ ō, ngán kaasí gə̄ tə́ ō. Ré majaĺ tákə̄ deē kógə̄ḿ ndɔ̄ nāā *Pákə tə́ tām̄ ni ɔdə nīń deē, aké aw̄ i mbā kə́ sa̰y tə́ anī, deē ní a rāā nāā *Pákə yā rɔȳń Kɔ́ɔ̄ɓē,

¹¹ banī a rāā i ta jī loo tíbə́ tə́, kə ndɔ̄ kə́ nge ko̰ kutə gidə i sɔ́ yā nāā kə́ nge ko̰ jōó. A əsa ngōn̄ batə̄ kə mápá kə́ rāā kanjə̄ *kaa mápa ō, kə mbī kámbə́ kə́ katə̄ ō.

¹² A əya̰ gotə ngōn̄ dā̰ batə̄ ní kadə̄ loo tīī dɔ tə́ aĺ ō, a tétə̄ kəngān gə̄ aĺ ō. A rāā nāā Pákə́ ní i kə gō looneé.

¹³ Banī deē ń majaĺ tákə̄n aĺ ō, aw̄ mbā tə́ aĺ ō, ba rāā najə̄ yā nāā *Pákə i kə njaneé, adə̄ ni ɔdə rāā nāā *Pákə kə ndɔ̄ *Pákə aĺ ní, deē ń noō a ɔr̄nən̄ kɔ̄ɔ́ dan ngán *Israel gə̄ tə́. Ni-ndējə̄ Kɔ́ɔ̄ɓē yá̰a̰ kə ndɔ̄neé aĺ ní, yá̰á̰ kə́ tōr̄ tām̄ yā majaĺ yān tə́ a rāān i nəkɔ́.

¹⁴ Ré tə̄rā ń ndi ɓē sesí ní ndigə rāā nāā *Pákə yā kɔsəń gɔn Kɔ́ɔ̄ɓē anī, a rāā i kə gō ndū najá ō, yá̰a̰ kāgə̄ ɓē ō kə́ dɔ tə́. *Ndū najə̄ ní i tām̄ yā ngán Israel gə̄ tə́ ō, tə̄rā gə̄ tə́ ō.

Kil̄ man̄ utə̄ dɔ kújə yā Nə́ɓā

¹⁵ Ndɔ̄ ń udənə̄ń kújə yā Nə́ɓā tə́ ní, kil̄ man̄ reē utə̄ dɔ. Kújə́ ní i kújə tandā ń sandúkə *ndū najə̄ i kemeé ní. Ndɔ̄ɔ́ anī kil̄ man̄ ní unjə̄ tītə̄ hor bátə́ kadə̄ loo tīiń.

¹⁶ To i tītə̄ ń noō kə ndɔ̄ gə̄: Kadaá anī kil̄ man̄ utə̄ dɔ kújə́ ní, ba ndɔ̄ɔ́ anī unjə̄ tītə̄ hor beé.

¹⁷ Ré kil̄ man̄ ní ḭḭ kɔ̄ɔ́ anī ngán *Israel gə̄ ndɔ́tə̄n̄ ɓē ō, ré dəba gotoó anī nin̄ ndin̄ ɓē loo ń noō tə́ ō.

¹⁸ Adə̄ ngán Israel gə̄ a ɔrə̄n̄ dɔɔ́ ō, a ndin̄ gotoó ō, i kə gō ndū Kɔ́ɔ̄ɓē. Ré kil̄ man̄ ndi dɔ kújə yā Nə́ɓā tə́ ɓáý anī ngán Israel gə̄ a ndin̄ i gotoó.

¹⁹ Ré ndi i ndɔ̄ ngá̰ý anī ngán *Israel gə̄ a oōn̄ i ta Kɔ́ɔ̄ɓē adə̄ a əsōn̄ róbó alé.

²⁰ Kə́rēý gə̄ anī ndi dɔ kújə́ tə́ rāā ndɔ̄ ngá̰ý alé. Adə̄ ngán Israel gə̄ a ndin̄ gotoó ō, a ɔrə̄n̄ dɔɔ́ ō, i kə gō ndū Kɔ́ɔ̄ɓē.

²¹ Dan kə́rēý gə̄ tə́ anī kil̄ man̄ ní a dəba gotoó i ndɔ̄ɔ́ kadə̄ loo tīī dɔn tə́ ngóy. Ré ḭḭ kɔ̄ɔ́ kə ndɔ̄ý anī ɔrə̄n̄ dɔɔ́ ō. Aláa dəba gotoó kadaá ō, ndɔ̄ɔ́ ō ngóy. Ba ré ḭḭ kɔ̄ɔ́ anī ɔrə̄n̄ dɔɔ́ ō.

²² Ré kil̄ man̄ ní ndi dɔ kújə yā Nə́ɓā tə́ rāā i ndɔ̄ jōó, aké rāā i nāā kógə̄ḿ, aké rāā i ndɔ̄ ngá̰ý gə̄gē anī, ngán *Israel gə̄ a ndin̄ i gotoó ba a ɔrə̄n̄ dɔɔ́ alé. Ré kil̄ man̄ ní ḭḭ kɔ̄ɔ́ anī ɔrə̄n̄ dɔɔ́ ō.

²³ Nin̄ a ndin̄ gotə kógə̄ḿ i kə gō ndū Kɔ́ɔ̄ɓēé ō, a ɔrə̄n̄ dɔɔ́ i kə gō ndū Kɔ́ɔ̄ɓēé ō. Ran̄ kəla yā Kɔ́ɔ̄ɓē i kə gō ndū Kɔ́ɔ̄ɓē ń adə̄ Moijə ní.